1 Kwambuli iyo, nie Paulo, mfungigwa wa Kilisito Yesu kwambuli yenu, nompula Mulungu. 2 Ni kweli mmala kuhulika kua Mulungu, kwa unovu wake, kaning'ha sang'hano ino niisang'hane kwa kumweda kwenu. 3 Nie nilagusiligwa kwa nzila ya ugubulo wa mbuli yake inogile ija Mulungu hanawalongela wanhu. Nyandika kwa uguhi kwambuli ino, 4 na mweye mhagasoma Mayandiko gangu modaha kuvimanya vija viniimanyile mbuli ija Mulungu hanawalongela wanhu kwambuli ya Kilisito. 5 Umwaka wanhu hawalongeligwe mbuli iyo, mbali sambi Mulungu kawalagusila hazelu kubitila watumigwa wake na walagusi wake kwa nzila ya Muhe wa Mulungu. 6 Mbuli ija Mulungu hanawalongela wanhu iyo ino, kwa nzila ya Usenga Unogile wobokela hanhu hao hamwe na Wayahudi muiganogile golawa kwa Mulungu, wao ni vilungo va lukuli uuja, na wobokela laliko idija diyatendile Mulungu kwa nzila ya Kilisito Yesu.

7 Nie nitendigwa kua mtumigwa wa Usenga Unogile kwa ganogile ga Mulungu gaiyeka gayaning'ile Mulungu kwa udaho wake mkulu. 8 Nie namdodo kubita wanhu wose wa Mulungu, mbali kaning'ha ganogile gake, ili niwaligulile wanhu haweli Wayahudi unovu wake Kilisito uja haupimika, 9 kaidi niwabung'hulile wanhu wose waone vija mbuli inogile ya Mulungu viisang'hanika. Mulungu mulumbaji wa vinhu vose kafisa mbuli ija hanawalongela wanhu kulawa mwaka, 10 ili sambi, kwa nzila ya wanhu wamtogole Kilisito, wakulu na weli na ulongozi wa kuulanga kwa Mulungu wadahe kuimanya nzewele ya Mulungu viilibule chipimo.

11 Mulungu kasang'hana mbuli ino kuilinga na gaja gayalondile kulawa mwaka dija diyatendile kwa nzila ya Kilisito Yesu Mndewa wetu. 12 Baho, kwa kuilumba na Kilisito na kwa kumtogola iyo, cheye chodaha kuita kwa Mulungu bila kudumba. 13 Kwaivo, nompulani sekemuhombe kwambuli ya madununzo ganibokela kwambuli yenu, kwavija gago ni kwambuli ya kumweda kwenu.

14 Kwambuli iyo nofugama mavindi kwa Tata Mulungu, 15 yeli chanduso cha vilumbe vose muiisi na kuulanga kwa Mulungu. 16 Nompula Mulungu, kulawa na uzenzi wake ukulu, yamwing'heni kwa udaho wa Muhe wake, udaho wa kugendelela goya mui sang'hano ili mgati yenu, 17 nayo Kilisito yakale mmoyo mmwenu kwa nzila ya kumtogola. Baho wende wake wokua kama mizizi na usimikilo wa ugima wenu, 18 ili mweye hamwe na wanhu wose wa Mulungu, mvimanye vija Kilisito viyali na wende na mweye, kwa wende uja ulibule mhaka. 19 Enaa, mdahe kuvimanya wende wa Kilisito ubita umanyi wose, mmemezigwe ng'hani ganogile gose genele ga Mulungu.

20 Iyo yeli na udaho usang'hana sang'hano mgati yetu kodaha kusang'hana mbuli ng'hulu ng'hani kubita zija zichidaha kupula na kugatonga. 21 Mulungu yatogoligwe kwa ukulu wake kwa bumbila da wamtogole Kilisito, msimo wose na mazua galibule uhelelo! Pepaa.