1 Mweye mwa wanage Mulungu wa wende, kwaivo sang'haneni kama viyalonda Mulungu. 2 Wende ulongoze ugima wenu kama vija Kilisito viyaching'ile wende, kwambuli yenu kailava mwenyego kama nhambiko inung'ila goya na nhosa imnogeza Mulungu.

3 Baho luhadu seke utambuligwe mmwenu, hebu ubananzi wowose uja wa kuhondomola hebu maya seke vitambuligwe mmwenu ng'o, kwavija mweye mwa wanhu wa Mulungu. 4 Kaidi mbuli za chinyala, za ubozi hebu udulu, gose gago hagafaya mmwenu, mbuli za kumwing'ha hewela Mulungu izo zofaya. 5 Mvimanye kua yeli na luhadu yoyose hebu mbananzi hebu yeli na maya ihile, iyo honda yauhazi mbee ufaume wa Kilisito na wa Mulungu. Munhu yeli na maya iyo kofugamila milungu ya nyang'iti

6 Sekemtogole kuvwiziligwa na munhu yoyose kwa mbuli za ubozi, kwavija, ludoko lwa Mulungu lowemila wanhu wose waja howamtegeleza Mulungu. 7 Ivo, sekemsang'hane hamwe nao. 8 Umwaka mweye mkala mdiziza mana hamummanyile Mulungu, mbali sambi mwamdibung'hulo yani mommanya Mulungu kwa kuilumba na Mndewa. Kaleni kama wanage Mulungu, 9 kwavija malawilo ga bung'hulo gogala kukala vija viyolonda Mulungu, kutogoligwa na Mulungu na ukweli.

10 Gezeni kugamanya gaja gamnogeza Mndewa. 11 Sekemwingile mzisang'hano zija hazifaya zili mdiziza, ila mzifisule. 12 Mbuli zisang'hanika kwa chifiso chinyala hata kuzilonga. 13 Mbali chila chinhu chihafisuligwa na bung'hulo, ukweli wake wokwikigwa hazelu, 14 na chila chikigwe hazelu chokua bung'hulo. Iyo mana yolongigwa,

"Lamuka gweye uwasile,

uzilibuke kulawa kwa wafile,

nayo Kilisito kokwiza kukubung'hulila bung'hulo jake."

15 Baho, mlolegoya vija vumkala. Sekemkale kama wabozi, mbali kama weli na nzewele. 16 Tumileni goya nyafasi mlinayo kwavija mazua gano geha. 17 Kwaivo, seke muwe wabozi, ila gezeni kuvimanya vija viyalonda Mndewa.

18 Lekeni kukoligwa upele kwavija iyo yomwagizani, mbali mlongozigwe na Muhe wa Mulungu. 19 Muimbile nyila za zabuli, na nyila za kumwing'ha Mndewa hewela na nyila zimwenga zilongozigwa na Muhe wa Mulungu.

20 Mwing'heni hewela Mulungu Tata mazua gose kwambuli ya wose, kwa zina da Mndewa wetu Yesu Kilisito.

21 Chila munhu na yamtegeleze miage kwambuli ya utegelezi mlinayo kwa Kilisito.

22 Wehe na wawategeleze walume zao kama kumtegeleza Mndewa. 23 Mulume kanao undewa kwa mwehe wake, kalinga Kilisito viyali na Undewa kwa bumbila da wamtogole Kilisito, nayo Kilisito mwenyego kodikombola bumbila da wamtogole Kilisito uwo lukuli lwake. 24 Kama vija bumbila da wamtogole Kilisito viwomtegeleza Kilisito, ivija wehe na wawategeleze walume zao kwa chila mbuli.

25 Na mweye walume weng'heni wende wehe zenu kama vija Kilisito viyali na wende na bumbila da wamtogole Kilisito, kailava mwenyego nhosa kwambuli yao. 26 Kasang'hana ivo ili kwa usenga wake yawabagule kwambuli ya Mulungu, badili ya kudibatiza kwa kudisunha mmazi, 27 ili yapate bumbila dikigwe kwambuli ya Mulungu da wamtogole Kilisito dibung'huke kabisa, bumbila da wamtogole Kilisito welibule ng'ovu na nhale hebu chochose chiliivo. 28 Baho, walume wolondeka kuweng'ha wende wehe zao kama nhuli zao wenyego. Yomwing'ha wende mwehe wake iyo koing'ha wende mwenyego. 29 Habule munhu yoyose yowihila lukuli lwake, badili ya kuwihila, koulisa na kuuvaza. Ivo ivija Kilisito viyawasang'hanila goya bumbila da wamtogole Kilisito, 30 kwavija cheye cha vilungo va lukuli lwake. 31 Kama Mayandiko vigandikigwe, "Kwambuli iyo mulume komleka tata na mami yake, koilumba na mwehe wake, nawo waidi wokua lukuli lumwe." 32 Hana ukweli uifisile mui mbuli ino, nanie noona ni kwambuli ya Kilisito na bumbila da wamtogole Kilisito. 33 Mbali ivija na kwambuli yenu. Chila mulume kolondeka yamwing'he wende mwehe wake kama viyoing'ha wende mwenyego, nayo mwehe kolondeka yamtegeleze mulumaake.