1 Mweye mkala mfile kwa ubananzi wenu na kwa malozo genu. 2 Chipindi chija mkala mokala kuilinga na nzila ihile ya isi ino, mkala momtegeleza mkulu wa vinyamkela weli na udaho wa ulanga, vinyamkela waja wowalongoza vino sambi waja hawamtegeleza Mulungu. 3 Hata cheye wose chikala kama wao, chikala chokala kuilinga na maya zetu za muiisi na kusang'hana gaja tu gazilonda ng'huli na nzewele zetu. Muiisi, cheye chose kama wao ivija, chilondeka kubokela ludoko lwa Mulungu.

4 Mbali Mulungu kana bazi kulu. Kaching'ha wende uja haupimika, 5 hata yahawa chikala chifile kwambuli ya malozo, kachitenda chawagima hamwe na Kilisito. Kwa unovu mkulu wa Mulungu mweye muloholigwa. 6 Kwakuilumba na Kilisito Yesu, Mulungu kachizilibula hamwe nayo, chikalongoze hamwe nayo kuulanga kwa Mulungu. 7 Ivo viyalondile kulagusa kwa wanhu wa msimo ukwiza ukulu wa wake mkulu uyaching'ile kwa nying'ha yake kwa kuilumba na Kilisito Yesu. 8 Kwavija, kwa unovu wa Mulungu mloholigwa kwa nzila ya kutogola. Mbuli ino sio kwambuli ya kuiyoha kwenu, mbali ni nhuza ya Mulungu, 9 hebu hailawile kwa sang'hano zenu wenyego, seke yalawile munhu yaigodele chinhu. 10 Cheye cha vilumbe vake Mulungu, na kwa kuilumba na Kilisito Yesu, kachilumba kwambuli ya kukala na ugima wa sang'hano zinogile ziyachitandile chizisang'hane.

11 Mweye kulawa mwaka mli wanhu wa isi zimwenga, mkemigwa, "Hamwingila kumbi" na Wayahudi waja woikema, "Wengila kumbi," kwambuli ya chija chiwazitendela ng'huli zao, seke muisemwe vumkalile kulawa umwaka. 12 Chipindi chija mweye mkala bule Kilisito na mkala hamuilumbile na wanhu wa Izilaeli, mkala nyambenyambe na mkala bule hanhu mga malagano gaja gayawalalike Mulungu. Mkala bule tumanilo na kama wanhu hawammanyile Mulungu hano muiisi. 13 Mweye waja baho haumwanduso mkala kutali, mbali sambi kwa kuilumba na Kilisito Yesu, mwikigwa behi kwa nzila ya damu yake Kilisito. 14 Kwavija Kilisito mwenyego kachigalila utindiwala kwa kuwatenda Wayahudi na wanhu wa isi zimwenga kua chinhu chimwe. Kwa lukuli lwake iyo mwenyego kaubomola uja luambaza uwabagule na kuwatenda waihasanye. 15 Kaisegeza ija ndagizi hamwe na ulamuzi na nzila zake, ili kulawa mwa wanhu wao wa banzi mbili awalumbe sambi wawe lukolo lumwe kwa kuilumba nayo na ivo kugala utindiwala. 16 Kwa lukuli lwake, Kilisito kaubananga uhasanyi wao, kwa msalaba wake kawalumba hamwe wanhu wa banzi izo mbili na kuwalumba na Mulungu. 17 Baho, Kilisito keza na kaligula Usenga Unogile wa utindiwala kumwenu mweye wanhu wa isi zimwenga mkalile kutali na Mulungu, na kwa Wayahudi wakalile behi na Mulungu. 18 Ivo, kwanzila yake, cheye chose, Wayahudi na wanhu wa isi zimwenga, chodaha kumuwinza Tata kwa Muhe imwe wa Mulungu.

19 Ivo, mweye sio nyambenyambe kaidi, hebu si wanhu wa isi za kunze. Mweye ni wanhu hamwe na wanhu wa Mulungu, ivija ni wanhu wakala hamwe na Mulungu. 20 Namweye ivija mzengigwa muusimikilo wikigwe na watumigwa wa Mulungu na walagusi wa Mulungu, nayo Kilisito mwenyego kalinga iyo dibwe kulu da usimikilo digogelela ng'anda. 21 Iyo iyo yodilumba zengo jose na kuditenda diwe kulu kama ng'anda ya Mulungu mwenyego kwa kwambuli ya Mndewa. 22 Kwa kuilumba nayo, mweye hamli Wayahudi, ivija mlumbigwa hamwe na wose wamwenga, muwe ukazi wa Mulungu kwanzila ya Muhe wake.