Kuilumba muulukuli lwa Kilisito
1 Baho, nie nili mfungigwa kwavija nomsang’hanila Mndewa, nompulani mkale goya, kwa kukala kama vija viilonda sang’hano imkemeligwe na Mulungu. 2 Mkale mazua gose kwa kutegeleza na kwa uhole na wenye kufunya moyo, muifunyile moyo mweye kwa mweye kwa wende.
3 Muiyohe ng’hani kwika ukalahamwe ugaligwa na Muhe wa Mulungu kwa kuwinza utindiwala uli hagati yenu. 4 Hana lukuli lumwe na Muhe imwe, kama vija tamanilo dimkemeligwe na Mulungu ni dimwe. 5 Hana Mndewa imwe, kutogola kumwe na kubatizigwa kumwe, 6 hana Mulungu imwe na Tata wa wose, yolongoza vinhu vose, kosang’hana sang’hano kwa vose na kauko kwa wanhu wose. 7 Chila munhu mmwetu kabokela unovu wa Mulungu kuilinga na vija Kilisito viyalondile kumwing’ha. 8 Iyo mana Mayandiko golonga,
"Viyasoligwe uchanha ng’hani kuulanga,
kawagela wanhu mmakono,
na kaweng’ha wanhu nhunza."
9 Ivo, viyalongile, Kasoligwa uchanha," yolagusa choni? Yolagusa kua, mosi kahulumuka mbaka hasi kabisa muiisi. 10 Baho, iyo yahulumuke hano muiisi iyo yasoligwe uchanha kuulanga kose ili yawe chila hanhu. 11 Iyo yaweng’ile wanhu nhunza, wamwenga kawetenda wawe wasenga wa Mulungu, wamwenga walagusi wa Mulungu, wamwenga wawe wapwililisaji Usenga Unogile, wamwenga wasusilaji na wafundaji. 12 Kasang’hana ivo ili yawatande wanhu wose wa Mulungu kwambuli ya sang’hano ya kumsang’hanila Kilisito wagangamale kama viili lukuli lwa Kilisito.