Daniel 10

ଦାନିୟେଲତି କାଜା ସେୟାଁଣା ହାପାନା

1 ପାରସ୍ୟତି ରାଜା କରସତି ସା଼ଲୱି କିହିମାଚି ତୀନି ବାର୍ସା ବେ଼ଲାତା ବେଲଟ୍‌ସସ୍‌ର ଦ଼ରୁଟି ୱେ଼ଙ୍ଗିତି ଦାନିୟେଲକି ର଼ କାତା ତ଼ଞ୍ଜାଆ଼ତେ ଅ଼ଡ଼େ ଏ଼ଦି ସାତା, ଏ଼ଦି ର଼ କାଜା ଜୁଜୁତି କାତା; ଇଞ୍ଜାଁ, ଏ଼ୱାସି ଏ଼ଦାଆଁ ତେଲ୍‌ହିତେସି ଅ଼ଡ଼େ ଏ଼ ସେୟାଁଣା ହାପାନାତି କାତା ଏ଼ୱାଣାକି ପୁଣ୍‌ମ୍ବି ଆ଼ତେ।

2 ଏ଼ ବେ଼ଲାତା ନା଼ନୁ, ଦାନିୟେଲ, ତୀନି ୱା଼ରା ପାତେକା ଡ଼ୀହେ଼ ମାଚେଏଁ। 3 ତୀନି ୱା଼ରା ଆ଼ନି ପାତେକା ନା଼ନୁ ଏ଼ନି ରା଼ନ୍ଦା ତିନାଆତେଏଁ, କି ଊଙ୍ଗା କି ଅଙ୍ଗୁରି ରାସା ଗହ୍‌ଆତେଏଁ, କି ଆଙ୍ଗାତା ନିୟୁଁ ଊହ୍‌ଆତେଏଁ।

4 ଇଞ୍ଜାଁ, ମୂଲୁ ଲେ଼ଞ୍ଜୁତି କଡ଼େ ସା଼ରି ଦିନାତା ନା଼ନୁ ହିଦେକଲ ଦ଼ରୁଗାଟି କାଜା କାଡା ଗାଟୁତା ମାଚି ବେ଼ଲାତା, 5 ନା଼ନୁ କାନୁ ଦେଚାହାଁ ମେସ୍ତେଏଁ, ଅ଼ଡ଼େ ମେହ୍‌ଦୁ, ଦବ୍‌ଲା ବାସ୍ତେରି ତୁର୍‌ହି ର଼ ମାଣ୍‌ସି, ତାନି ଟେଡେଲିତା ଅଟ୍‌ହି ବାଂଗାରା ବୁଡ଼୍‌ପାମା଼ଡ଼ା ତଲେ ଦସ୍‌ପି ଆ଼ହାମାଚେ; 6 ତାନି ଆଙ୍ଗା ପୁସା ମା଼ଡ଼ା ହୀଙ୍ଗା ୱା଼ଣା ମ୍ଣିହ୍‌ନି ୱାଲି ଲେହେଁତାୟି, ତାନି ମୂମ୍ବୁ ମିଣ୍‌ସିମାନି ଉଜେଡ଼ି ଲେହେଁ, ଅ଼ଡ଼େ ତାନି କାଣ୍‌କା ଡ଼ୀଞ୍ଜିମାନି ଦୀୱଁ ଲେହେଁ; ତାନି ବାହା ଅ଼ଡ଼େ କଡାୟାଁ ମିଣ୍‌ସିମାନି ପିତାଡ଼ାତି ଉଜେଡ଼ି ଲେହେଁ, ଅ଼ଡ଼େ ତାନି ବ଼ଲୁତି ହା଼ଡା ଲ଼କୁତି ଗିୟାଁ ଲେହେଁ।

7 ଇଞ୍ଜାଁ ନା଼ନୁ, ଦାନିୟେଲ, ରଣ୍ତିଏ ରଅତେଏଁ ଏ଼ ସେୟାଁଣା ହାପାନା ମେସ୍ତେଏଁ; ଇଚିହିଁ ନା଼ ତ଼ଣେ ଲ଼କୁ ଏ଼ ସେୟାଁଣା ହାପାନା ମେହ୍‌ଆତେରି; ସାମା ଏ଼ୱାରି ହା଼ରେକା ତୀର୍‌ଗିତେରି ଅ଼ଡ଼େ ଜାହା ଜାହାରାଇଁ ଡ଼ୁକ୍‌ହାଲି ତାକି ହଟେରି। 8 ଏଚେଟିଏ ନା଼ନୁ ରଅତେଏଁ ଡ଼ୟାହାଁ ଈ କାଜା ସେୟାଁଣା ହାପାନା ମେସ୍ତେଏଁ ଅ଼ଡ଼େ ନା଼ ତା଼ଣା ଇଚାୟି ବା଼ଡ଼୍‌ୟୁ ଡ଼ୟାଆତେ; ଇଚିହିଁ ନା଼ ମୂମ୍ବୁତି ଉଜେଡ଼ି ଡ଼ୟାଆତେ ଅ଼ଡ଼େ ନା଼ନୁ ଇଚାଣି ବା଼ଡ଼୍‌ୟୁ ଇଟାଲି ଆ଼ଡାଆତେଏଁ। 9 ଆ଼ତିଜିକେଏ ନା଼ନୁ ତାନି ବ଼ଲୁତି ଗିୟାଁ ୱେଚେଏଁ; ଅ଼ଡ଼େ, ଏଚିବେ଼ଲା ନା଼ନୁ ଏ଼ୱାଣି ବ଼ଲୁତି ଗିୟାଁ ୱେଚେଏଁ, ଏଚିବେ଼ଲା ନା଼ନୁ ମାର୍‌ହାଁ ହା଼ରେକା ଇଦା କିତେଏଁ। 10 ଏଚେଟିଏ ମେହ୍‌ଦୁ, ର଼ କେୟୁ ଡୀଗାହାଁ ନାଙ୍ଗେ ମେଣ୍ତାୟାଁ ଅ଼ଡ଼େ କେୟୁତି ପାଟାନାକିତା ବା଼ଡ଼୍‌ୟୁ କିୱିକିୟାତେ।

11 ଇଞ୍ଜାଁ, ଏ଼ୱାସି ନାଙ୍ଗେ ଏଲେଇଞ୍ଜାତେସି, ହେ଼ ହା଼ରେ ଜୀୱୁତି ଦାନିୟେଲ, ନା଼ନୁ ନିଙ୍ଗେ ଏମିନି ଏମିନି ବ଼ଲୁ ୱେସ୍ତାଇଁ, ଏ଼ଦାଆଁ ତେଲ୍‌ହାମୁ ଅ଼ଡ଼େ ସଲ୍‌କେ ଆ଼ହାଁ ନିମୁ; ଇଚିହିଁ ନୀଏଁ ନା଼ନୁ ନୀ ତା଼ଣା ପାଣ୍ତ୍‌ୱି ଆ଼ହାମାଇଁ; ଏ଼ୱାସି ନାଙ୍ଗେ ଈ କାତା ୱେସାଲିଏ ନା଼ନୁ ତୀର୍‌ଗି ତୀର୍‌ଗିହିଁ ନିତେଏଁ।

12 ଏଚେଟିଏ ଏ଼ୱାସି ନାଙ୍ଗେ ଏଲେଇଞ୍ଜାତେସି, "ହେ଼ ଦାନିୟେଲ, ଆଜାଆନି; ଇଚିହିଁ ନୀନୁ ଏମିନି ମୂଲୁ ଦିନାଟିଏ ତେଲ୍‌ହାଲି ତାକି ଅ଼ଡ଼େ ନୀ ମାହାପୂରୁ ନ଼କିତା ଜାହାରାଇଁ ଊଣା କିହାଲି ନୀ ମ଼ନ ହୀତି, ଏ଼ ଦିନାଟିଏ ନୀ ବ଼ଲୁ ୱେଣ୍‌ମ୍ବି ଆ଼ତେ; ଅ଼ଡ଼େ ନୀ ବ଼ଲୁ ତାକି ନା଼ନୁ ୱା଼ହାମାଇଁ। 13 ସାମା ପାରସ୍ୟ ରା଼ଜିତି ସା଼ଲୱି କିନାସି କଡ଼େ ର଼ ଦିନା ପାତେକା ବା଼ଦା କିୟାତେସି; ସାମା ମେହ୍‌ଦୁ, କାଜା ସା଼ଲୱି କିନାରି ବିତ୍ରାଟି ମିକାୟେଲ ଇନାସି ନା଼ ସା଼ୟେମି କିହାଲି ୱା଼ତେସି; ଅ଼ଡ଼େ, ନା଼ନୁ ଏ଼ ଟା଼ୟୁତା ପାରସ୍ୟତି ରାଜାୟାଁ ତଲେ ଡ଼ୟିତେଏଁ। 14 ନୀଏଁ, ରା଼ନି କା଼ଲାତା ନୀ ଲ଼କୁ ତାକି ଏ଼ନାୟି ଆ଼ନେ, ଏ଼ଦାଆଁ ନିଙ୍ଗେ ତେଲ୍‌ହି କିହାଲି ତାକି ନା଼ନୁ ୱା଼ହାମାଇଁ; ଇଚିହିଁ ସେୟାଁଣା ହାପାନା ଅ଼ଡ଼େ ହା଼ରେକା କା଼ଲା ପାତେକା ମାନେ।"

15 ଏ଼ୱାସି ନାଙ୍ଗେ ଇଲେକିହିଁ କାତା ଆୟାତି ଡା଼ୟୁ ନା଼ନୁ ବୂମି ୱାକି ମୂମ୍ବୁ କିହାଁ ସାପି ଆ଼ତେଏଁ। 16 ଏମ୍ବାଟିଏ ମେହ୍‌ଦୁ, ମାଣ୍‌ସି ମୀର୍‌କାତି ବମା ଲେହେଁତି ର଼ ମାଣ୍‌ସି ନା଼ ଲୂଡ଼ାତା ଡୀଗାତେସି; ଏମ୍ବାଟିଏ ନା଼ନୁ ନା଼ ଗୂତି ଦେଚାହାଁ ନା଼ ନ଼କିତା ନିଚାମାନି ମାଣ୍‌ସିଇଁ ଏଲେଇଚେଏଁ, "ହେ଼ ନା଼ ବା଼ବୁ, ଈ ସେୟାଁଣା ହାପାନା ତାକି ନା଼ ଦୁକୁ ନାଙ୍ଗେ ବା଼ଦା ହୀହିମାଞ୍ଜାନେ ଅ଼ଡ଼େ ନା଼ନୁ ରଚାଣି ବା଼ଡ଼୍‌ୟୁ ଆ଼ହାଲି ଆ଼ଡିହିଲଅଁ। 17 ଇଚିହିଁ ନା଼ ଈ ପ୍ରବୁତି ହ଼ଲେଏସି ଏ଼ନିକିହିଁ ଈ ନା଼ ପ୍ରବୁ ତଲେ କାତା ଆ଼ହାଲି ଆ଼ଡିନେସି ?" ଏ଼ ଦେବୁଣିଏ ନା଼ ତା଼ଣା ରଚାୟି ବା଼ଡ଼୍‌ୟୁ କି ନେ଼ସ୍ତେରି ଡ଼ୟାଆତେ।

18 ଏଚିବେ଼ଲା ମାଣ୍‌ସି ଲେହେଁତି ରଅସି ୱେଣ୍ତେ ନାଙ୍ଗେ ଡୀଗାହାଁ ଆ଼ଟ୍‌ୱା କିୟାତେସି। 19 ଇଞ୍ଜାଁ, ଏ଼ୱାସି ଏଲେଇଞ୍ଜାତେସି, "ହେ଼ ହା଼ରେ ଜୀୱୁତି ମାଣ୍‌ସି, ଆଜାଆନି; ନିଙ୍ଗେ ହିତ୍‌ଡ଼ି ଆୟାପେ, ଆ଼ଟ୍‌ୱା ଆ଼ମୁ, ଆ଼ଟ୍‌ୱା ଆ଼ମୁ!" ଏ଼ୱାସି ନାଙ୍ଗେ ଏଲେଇଞ୍ଜାଲିଏ, ନା଼ନୁ ବା଼ଡ଼୍‌ୟୁ ଆ଼ହାଁ ଏଲେଇଚେଏଁ, "ନା଼ ପ୍ରବୁ ୱେସ୍ତାମୁ ଇଚିହିଁ ନୀନୁ ନାଙ୍ଗେ ଆ଼ଟ୍‌ୱା କିହାମାଞ୍ଜାଦି।"

20 ଏମ୍ବାଟିଏ ଏ଼ୱାସି ଏଲେଇଞ୍ଜାତେସି, "ନା଼ନୁ ଏ଼ନାଆଁତାକି ନୀ ତା଼ଣା ୱା଼ହାମାଇଁ, ଏ଼ଦାଆଁ ନୀନୁ ପୁଞ୍ଜାମାଞ୍ଜି କି ? ନୀଏଁ ନା଼ନୁ ପାରସ୍ୟତି ସା଼ଲୱି କିନାଣି ତଲେ ଜୁଜୁ କିହାଲି ତାକି ୱେଣ୍ତାହାଇଁ; ନା଼ନୁ ହାଚିସାରେ, ମେହ୍‌ମୁ, ଗ୍ରିସ୍‌ତି ସା଼ଲୱି କିନାସି ୱା଼ନେସି। 21 ସାମା ସାତା ସା଼ସ୍ତେରିତା ଏ଼ନାୟି ରା଼ସ୍‌କି ଆ଼ହାମାନେ, ଏ଼ଦାଆଁ ନା଼ନୁ ନିଙ୍ଗେ ପୁଣ୍‌ମ୍ବି କିୟାଇଁ; ଈୱାରି କ଼ପାଟି ମା଼ ସା଼ୟେମି କିହାଲି ତାକି ମୀ ସା଼ଲୱି କିନାସି ମିକାୟେଲ ପିସ୍‌ପେ ଅ଼ଡ଼େ ଆମ୍ବାଆସି ହିଲଅସି।"