Daniel 3

28 ନବକୁଦ୍‌ନିସ୍‌ଚର ଏଲେଇଚେସି, ସଦ୍ରକ ମେୟିସକ୍‌ ଅ଼ଡ଼େ ଅବେଦ୍‌ନଗ ମାହାପୂରୁ ଜହରା, ଇଚିହିଁ ଏ଼ୱାସି ତାନି ଦୂତୁ ପାଣ୍ତାତେସି, ଏମିନି ଗାଟାରି ତାନି ତା଼ଣା ନାମିତେରି ଅ଼ଡ଼େ ତାମି ମାହାପୂରୁ ପିସ୍‌ପେ ଏ଼ନି ପେ଼ନୁତି ସେ଼ବା କି ଜହରା କିଅରି, ଏ଼ଦାଆଁତାକି ରାଜା ବ଼ଲୁ ମା଼ନୱି ଆ଼ଆନା ଜାହାରା ଆଙ୍ଗାତି ହେର୍‌ପିତେରି, ଏ଼ୱାସି ଏ଼ୱାରାଇଁ ଗେଲ୍‌ପିତେସି।

29 ଏ଼ଦାଆଁତାକି ନା଼ନୁ ଈ ହୁକୁମି କିହିମାଇଁ, ଏମିନି ବାରେ କୂଡ଼ା, ଦେ଼ସାତି ବାରେ ବା଼ସାଗାଟି ଲ଼କୁ, ସଦ୍ରକ, ମେୟିସକ୍‌ ଅ଼ଡ଼େ ଅବେଦ୍‌ନଗତି ମାହାପୂରୁତି କ଼ପାଟି ଏ଼ନି କାତା ଜ଼ଲିନେରି, ଏ଼ୱାରି ଗାଣ୍ତ୍ରା ଗାଣ୍ତ୍ରା ଦା଼ପି ଆ଼ନେରି ଅ଼ଡ଼େ ତାମି ଇଲୁ ଗାତାକ଼ଟି ଆ଼ନେ; ଇଚିହିଁ ଇଲେକିଁ ଗେଲ୍‌ପାଲି ଆ଼ଡିନି ଏ଼ନି ପେ଼ନୁ ହିଲେଏ।