1 ବାରେ କାତାତି ସମାନା କା଼ଲମି ମାନେ ଅ଼ଡ଼େ ହା଼ଗୁ ଡ଼଼ଇ ବାରେତାକି ସମାନା କା଼ଲମି ମାନେ।

2 ଜାର୍ନା ଆ଼ନି ବେ଼ଲା ଅ଼ଡ଼େ ହା଼ନି ବେ଼ଲା;

ଉହିନି କା଼ଲମି ଅ଼ଡ଼େ ଏମିନାୟି ଉହ୍‌ୱି ଆ଼ହାମାନେ, ଏ଼ଦାଆଁ ମେକ୍‌ନି କା଼ଲମି;

3 ପା଼ୟିନି ବେ଼ଲା ଅ଼ଡ଼େ ନେହିଁ କିନି ବେ଼ଲା;

ଡିକ୍‌ନି ବେ଼ଲା ଅ଼ଡ଼େ ତିୟାରା କିନି ବେ଼ଲା;

4 ଡ଼ୀନି ବେ଼ଲା ଅ଼ଡ଼େ କାକ୍‌ନି ବେ଼ଲା;

ଦୁକୁଟି ଡ଼ୀନି ବେ଼ଲା ଅ଼ଡ଼େ ଏ଼ନ୍ଦିନି ବେ଼ଲା;

5 ୱାଲ୍‌କା କୁତିନି ବେ଼ଲା ଅ଼ଡ଼େ ୱାଲ୍‌କା କୂଡ଼ିକିନି ବେ଼ଲା;

ପମ୍‌କିଆ଼ନି ବେ଼ଲା ଅ଼ଡ଼େ ପମ୍‌କିଆ଼ନି ତା଼ଣାଟି ପିସ୍‌ପିଆ଼ନି ବେ଼ଲା;

6 ପାରିନି ବେ଼ଲା ଅ଼ଡ଼େ ଜା଼କ୍‌ନି ବେ଼ଲା;

ଇଟିନି ବେ଼ଲା ଅ଼ଡ଼େ କୁତୁହ୍‌ନି ବେ଼ଲା;

7 ଗେହ୍‌ନି ବେ଼ଲା ଅ଼ଡ଼େ ରା଼ଚିନି ବେ଼ଲା;

ସାପି ଡ଼ୟିନି ବେ଼ଲା ଅ଼ଡ଼େ କାତା ଜ଼ଲିନି ବେ଼ଲା;

8 ଜୀୱୁ ନ଼ନି ବେ଼ଲା ଅ଼ଡ଼େ ଅ଼ପାଆଗାଟି ବେ଼ଲା;

ଜୁଜୁତି ବେ଼ଲା ଅ଼ଡ଼େ ହିତ୍‌ଡ଼ି ବେ଼ଲା ମାନେ।

9 କାମା କିନି ମାଣ୍‌ସିକି ତାନି କାମାତା ଏ଼ନି ଲା଼ବା ? 10 ମାହାପୂରୁ ମାଣ୍‌ସି ମୀର୍‌କାକି ବିଲ୍‌କି ଆ଼ହାଲି ତାକି ଏମିନି କାମା ହୀହାମାନେସି, ଏ଼ଦାଆଁ ନା଼ନୁ ମେସାମାଇଁ। 11 ଏ଼ୱାସି ବାରେତି ତାନି କା଼ଲାତି ଲେକା ତଲେ ଅ଼ଜି କିହାମାନେସି; ଇଞ୍ଜାଁ ଏ଼ୱାସି ମାଣ୍‌ସି ହିୟାଁତା କା଼ଲେଏ ଇଟାମାନେସି; ଆ଼ତିଜିକେଏ ମାହାପୂରୁ ମା଼ଟ୍‌ନି ତା଼ଣାଟିଏ ରା଼ନି ପାତେକା ଏମିନି କାମା କିହାମାନେସି, ମାଣ୍‌ସି ଏ଼ଦାଆଁ ଅଣ୍‌ପାଲି ଆ଼ଡଅସି। 12 ନା଼ନୁ ପୁଞ୍ଜାମାଇଁ, ମାଣ୍‌ସି ତାକି ରା଼ହାଁ ଅ଼ଡ଼େ ନୀଡାମାନି ପାତେକା ନେହିଁ କାମା କିନାଣି ପିସ୍‌ପେ, ଅ଼ଡ଼େ ଏ଼ୱାରାକି ଏ଼ନାୟି ନେହାୟି ହିଲେଏ। 13 ଅ଼ଡ଼େ ବାରେ ମାଣ୍‌ସି ତିଞ୍ଜା ଉଣ୍ତାହାଁ ତାନି ବାରେ କାମାତା ସୁକୁ ତଲେ ଡ଼ୟିନେସି, ଈଦି ମାହାପୂରୁତି ଦା଼ନା।

14 ନା଼ନୁ ପୁଞ୍ଜାମାଇଁ, ମାହାପୂରୁ ଏ଼ନାଆଁ କିହାମାନେସି, ଏ଼ଦି କା଼ଲେଏ ତୀରି ଆ଼ହାଁ ଡ଼ୟିନେ; ଏ଼ଦାନି ପାଡିକିହାଲି ଆ଼ଏ, କି ଏ଼ଦାଣି ଊଣା କିହାଲି ଆ଼ଏ; ମାହାପୂରୁ ଈଦାଆଁତାକି ଇଲେ କିହାମାନେସି କି ମାଣ୍‌ସିୟାଁ ଏ଼ୱାଣାଇଁ ଆଜାପେରି। 15 ଏ଼ନାୟି ମାନେ, ଏ଼ଦି ମାଚେ; ଇଞ୍ଜାଁ ଏ଼ନାୟି ଆ଼ନେ ଏ଼ଦି ଜିକେଏ ମାଚେ; ଅ଼ଡ଼େ ଏ଼ନାୟି ହାଜାମାନେ, ମାହାପୂରୁ ଏ଼ଦାଆଁ ୱେଣ୍ତେ ପାରିନେସି।

16 ଅ଼ଡ଼େ ନା଼ନୁ ୱେ଼ଡ଼ା ଡ଼଼ଇ ବିଚାରା ଟା଼ୟୁତା ମେସ୍ତେଏଁ, ଏମ୍ବାଆଁ ଲାଗେଏତାୟି ମାନେ, ଇଞ୍ଜାଁ ଦାର୍ମୁତି ଟା଼ୟୁତା ମେସ୍ତେଏଁ, ଏମ୍ବାଆଁ ଜିକେଏ ଲାଗେଏତାୟି ମାନେ। 17 ନା଼ନୁ ମ଼ନ ମ଼ନତା ଅଣ୍‌ପିତେଏଁ, "ମାହାପୂରୁ ଦାର୍ମୁଗାଟାରାଇଁ ଅ଼ଡ଼େ ଲାଗେଏତି ଲ଼କୁଣି ବିଚାରା କିନେସି; ଇଚିହିଁ ବାରେ କାତା ଅ଼ଡ଼େ ବାରେ କାମା ତାକି କା଼ଲା ମାନେ।" 18 ନା଼ନୁ ମ଼ନ ମ଼ନତା ଅଣ୍‌ପିତେଏଁ "ମାହାପୂରୁ ଏ଼ନିକିଁ ମାଣ୍‌ସି ମୀର୍‌କାଣି ତାୟିପାରି କିନେସି ଅ଼ଡ଼େ ଏ଼ୱାରି ତା଼ମ୍ବୁଏ ୱାର୍‌ଇ ଜ଼ନ୍ତ ସମାନା, ଈଦାଆଁ ଏ଼ୱାରି ଏ଼ନିକିଁ ମେହ୍‌ନେରି, ଈଦାଆଁତାକି ଏ଼ୱାରି ତାକି ଈଦି ଆ଼ହାମାନେ।" 19 ଇଚିହିଁ ମାଣ୍‌ସି ମୀର୍‌କାକି ଏ଼ନାଆଁ ଆ଼ନେ, ଜ଼ନ୍ତୟାଁ ତାକି ଏ଼ଦିଏ ଆ଼ନେ; ବାରେ ତାକି ଜିକେଏ ରଣ୍ତିଏ ର଼ଲେକିଁ ଗଟୱି ଆ଼ନେ; ଈୱାସି ଏ଼ନିକିଁ ହା଼ନେସି ଏ଼ୱି ଜିକେଏ ଏଲେକିହିଁଏ ହା଼ନୁ; ଇଞ୍ଜାଁ ବାରେତି ପୂଣ୍ତା ରଣ୍ତିଏ; ଅ଼ଡ଼େ ଜ଼ନ୍ତ କିହାଁ ମାଣ୍‌ସି ଏ଼ନି କାଜାସି ଆ଼ଏ; ଇଚିହିଁ ଏ଼ ବାରେ ଉଜେଏତାଇ। 20 ବାରେ ରଣ୍ତିଏ ତା଼ଣା ହାନେରି; ବାରେ ଦୂଡ଼ିଟି ଗା଼ଡ଼ି ଆ଼ତାରି ଅ଼ଡ଼େ ବାରେଜା଼ଣା ୱେଣ୍ତେ ଦୂଡ଼ିତା ଆଣ୍ତିନେରି। 21 ମାଣ୍‌ସି ଜୀୱୁ ଲାକ ହାନେ ଅ଼ଡ଼େ ଜ଼ନ୍ତତି ଜୀୱୁ ଦାର୍‌ତିତି ଡ଼଼ଇକା ହାନେ ଇଞ୍ଜିଁ ଆମ୍ବାଆସି ପୁନେସି ? 22 ଏ଼ଦାଆଁତାକି ମାଣ୍‌ସି ଜାହାରା କାମାତା ରା଼ହାଁ କିନି କିହାଁ ଅ଼ଡ଼େ ଏ଼ୱାଣି ଏ଼ନି ଆଗାଡ଼ା ନେହେଁ ହିଲେଏ ଇଞ୍ଜିଁ ନା଼ନୁ ମେସ୍ତେଏଁ; ଇଚିହିଁ ଈଦିଏ ଏ଼ୱାଣି ଅଦିକାରା; ଅ଼ଡ଼େ ତାନି ଜେ଼ଚ ଏ଼ନାୟି ଗଟୱି ଆ଼ନେ, ଏ଼ଦାଆଁ ମେସାଲି ତାକି ଆମ୍ବାଆସି ଏ଼ୱାଣାଇଁ ୱେଟ୍‌ହା ତାଚାଲି ଆ଼ଡିନେସି ?