ଜା଼ପ୍‌ 8

ରାଜାତି ହୁକୁମି ମା଼ନୱି ଆ଼ନାୟି

1 ବୁଦି ଗାଟାଣି ଲେହେଁ ଆମ୍ବାଆସି ମାନେସି ? ଅ଼ଡ଼େ ଆମ୍ବାଆସି କାତାତି ଅଣ୍‌ପୁ ପୁନେସି ? ମାଣ୍‌ସିତି ବୁଦି ତାନି ମୂମ୍ବୁତି ପାର୍‌ସାଡ଼ା କିନେ ଅ଼ଡ଼େ ତାନି ମୂମ୍ବୁତି ଆ଼ଟ୍‌ୱା ବାଦ୍‌ଲି ଆ଼ନେ।

2 ମୀରୁ ରାଜା ହୁକୁମି ମା଼ନୱି ଆ଼ଦୁ, ନା଼ନୁ ଈ କାତା ୱେସିମାଞ୍ଜାଇଁ ଅ଼ଡ଼େ ମାହାପୂରୁ ନ଼କିତା ପାର୍‌ମାଣା କିହାଲି ତାକି ଏ଼ଦାଆଁ କିଦୁ। 3 ତାନି ତା଼ଣାଟି ହ଼ଚା ହାଜାଲି ଦାଗା ଆ଼ଆଦୁ; ଏ଼ନି ଲାଗେଏତି କାତା ୱାକିଟି ନିଆଦୁ; ଇଚିହିଁ, ଏ଼ନାୟି ତାନି ମ଼ନ ଏ଼ଦାଆଁ ଏ଼ୱାସି କିନେସି। 4 ଇଚିହିଁ ରାଜାତି ବ଼ଲୁ ବା଼ଡ଼୍‌ୟୁଗାଟାୟି; ଇଞ୍ଜାଁ, ନୀନୁ ଏ଼ନାଆଁ କିହିମାଞ୍ଜି, ଈଦାଆଁ ଆମ୍ବାଆସି ଏ଼ୱାଣାଇଁ ଜ଼ଲାଲି ଆ଼ଡିନେସି ? 5 ଆମ୍ବାଆସି ହୁକୁମି ମା଼ନୱି ଆ଼ନେସି, ଏ଼ୱାସି ଏ଼ନି ଲାଗେଏତି କାତା ପୁନଅସି; ଇଞ୍ଜାଁ ବୁଦି ଗାଟାଣି ମ଼ନ କା଼ଲା ଅ଼ଡ଼େ ବିଚାରା ପୁନେ; 6 ଇଚିହିଁ ବାରେ କାମା ତାକି କା଼ଲା ଅ଼ଡ଼େ ବିଚାରା ମାନେ; ଆ଼ତିଜିକେଏ ମାଣ୍‌ସିତି ଦୁକୁ ଏ଼ୱାଣି ତାକି ହା଼ରେକା କସ୍ତଗାଟାୟି; 7 ଇଚିହିଁ ଏ଼ନାୟି ଗଟୱି ଆ଼ନେ, ଏ଼ଦାଆଁ ଏ଼ୱାସି ପୁନଅସି ଅ଼ଡ଼େ ଏ଼ନିକିଁ ଏ଼ଦି ଗଟୱି ଆ଼ନେ ଏ଼ଦାଆଁ ଆମ୍ବାଆସି ଏ଼ୱାଣାଇଁ ୱେସାଲି ଆ଼ଡିନେସି ? 8 ଜୀୱୁତି ପୂଣ୍ତା ଆ଼ଙ୍ଗା ଇଟାଲି ଏମିନି ମାଣ୍‌ସିତି ଅଦିକାରା ହିଲେଏ; କି ହା଼ନି ଦିନା ମୁହେଁ ଆମିନି ମାଣ୍‌ସିତି ଅଦିକାରା ହିଲେଏ; ଇଞ୍ଜାଁ, ଏ଼ ଜୁଜୁତା ପିସ୍‌ପି ଆ଼ଏ; ଅ଼ଡ଼େ ଲାଗେଏ କାମାତା ଡ଼ୟିନି ଲ଼କୁକି ଲାଗେଏତାୟି ଗେଲ୍‌ପେଏ।

ଲାଗେଏତାସି ଅ଼ଡ଼େ ଦାର୍ମୁଗାଟାସି

9 ଈ ବାରେ ନା଼ନୁ ମେସାମାଇଁ ଅ଼ଡ଼େ ୱେ଼ଡ଼ା ଡ଼଼ଇ ଏମିନି ବାରେ କାମା କିୱିଆ଼ନେ, ଏମ୍ବାଆଁ ନା଼ନୁ ମ଼ନ ହୀହାମାଇଁ; ଏଚେ ଏଚେଲା ର଼ ମାଣ୍‌ସି ଅ଼ର ମାଣ୍‌ସି ମୁହେଁ ତାନି ଲାଗେଏ କିହାଲି ତାକି ଅଦିକାରା ଡ଼ୟିନେ। 10 ଅ଼ଡ଼େ, ନା଼ନୁ ଲାଗେଏତି ଲ଼କୁଇଁ ମାହ୍‌ଣି ମାଣ୍ତାତା ମୁହ୍‌ନାଣି ମେସ୍ତେଏଁ; ସାମା ଲ଼କୁ ଏ଼ ମାହ୍‌ଣିଁଟି ୱେଣ୍ଡିତାଟି ଏ଼ୱାରାଇଁ ନେହେଁ ଇଚେରି ଆମିନିଗାଟାରି ଏ଼ ଗା଼ଡ଼ାତା ଲାଗେଏତି କାମା କିହାମାଚେରି; ଈ ବାରେ ଉଜେଏତାୟି ଇଞ୍ଜିଁ ମେସ୍ତେଏଁ।

11 ଲାଗେଏତି କାମା କିନାରାକି ଡଣ୍ତ ତବେ ମେ଼ଡ଼ାଆ଼ଆତାକି ମାଣ୍‌ସି ଲ଼କୁତି ହିୟାଁ ଲାଗେଏତି କାମା କିହାଲି ମ଼ନ ଆ଼ନେ। 12 ଆ଼ତିଜିକେଏ ପା଼ପୁଗାଟାସି ର଼ ୱାଞ୍ଜା ଦେବା ଲାଗେଏ କାମା କିହାଁ ହା଼ରେକା ଦିନା ନୀଡିନେସି, ଆ଼ତିଜିକେଏ ନା଼ନୁ ପୁଞ୍ଜାମାଇଁ, ମାହାପୂରୁଇଁ ଆଜିନାରି ତାନି ତା଼ଣା ଆଜିମାନେରି ଇଞ୍ଜିଁ ଏ଼ୱାରି ନେହେଁ ଆ଼ନେ; 13 ସାମା ଲାଗେଏ ଲ଼କୁତି ନେହେଁ ଆ଼ଏ, କି ଏ଼ୱାସି ତାନି ସା଼ୟିଁ ଲେହେଁତି ତାନି ବାର୍ସା ପାଡିକିହାଲି ଆ଼ଡଅସି; ଇଚିହିଁ ଏ଼ୱାସି ମାହାପୂରୁ ନ଼କିତା ଆଜିନାସି ଆ଼ଏ। 14 ଦାର୍‌ତିତା ଈ ର଼ ଉଜେଏତି କାତା ଆ଼ହିମାନେ; ଏଚେ ଏଚେଲା ଦାର୍ମୁ ଲ଼କୁକି ଲାଗେଏ ଲ଼କୁତି କାମା ତଲେ ଗଟୱି ଆ଼ନେ; ଇଞ୍ଜାଁ ଏଚେ ଏଚେଲା ଲାଗେଏତି ଲ଼କୁକି ଦାର୍ମୁ ଲ଼କୁତି କାମା ତଲେ ଗଟୱି ଆ଼ନେ, ନା଼ନୁ ଏଲେଇଚେଏଁ, ଈ ବାରେ ଉଜେଏତାୟି।

15 ଏଚେଟିଏ ନା଼ନୁ ରା଼ହାଁତି ଗା଼ୱୁରମି କିତେଏଁ, ଇଚିହିଁ ତିନାୟି ଅ଼ଡ଼େ ଉନାୟି ଅ଼ଡ଼େ ରା଼ହାଁ କିନି କିହାଁ ୱେ଼ଡ଼ା ଡ଼଼ଇ ମାଣ୍‌ସି ତାକି ଅ଼ଡ଼େ ଏ଼ନାୟି ନେହାୟି ହିଲେଏ, ଏ଼ଦାଆଁତାକି ଏ଼ୱାସି ୱେ଼ଡ଼ା ଡ଼଼ଇକା ମାହାପୂରୁ ହୀହାମାନି ବାର୍ସା ବିତ୍ରା ଏ଼ନି ଏ଼ନି କସ୍ତ କିନେସି, ଏ଼ ବାରେତା଼ଣା ଏ଼ଦି ଏ଼ୱାଣି ତଲେ ଡ଼ୟିନେ।

16 ଏଚିବେ଼ଲା ନା଼ନୁ ବୁଦିତି କାତା ପୁଞ୍ଜାଲି ଅ଼ଡ଼େ ଦାର୍‌ତିତା ଆ଼ହାମାନି କାମା ମେସାଲି ମ଼ନ ହୀତେଏଁ, ଇଚିହିଁ ଲା଼ଆଁୟାଁ ମାଦେନା ଆମ୍ବାଆରି କାନୁ ଇଦା ମେସାହିଲେଏ ଇଲେତି ଲ଼କୁ ଜିକେଏ ମାନେରି; 17 ଏଚିବେ଼ଲା ନା଼ନୁ ମାହାପୂରୁତି ବାରେ କାମା ସିନିକିତେଏଁ, ମାଣ୍‌ସି ୱେ଼ଡ଼ା ଡ଼଼ଇ ଆ଼ହାମାନି କାମାତି ବେଟାଆ଼ହାଲି ଆ଼ଡଅସି; ଇଚିହିଁ ଏ଼ଦାଆଁ ପାରାଲି ତାକି ମାଣ୍‌ସି ଏଚେକା କସ୍ତ କିତି ଜିକେଏ ଏ଼ଦାଆଁ ବେଟାଆ଼ହାଲି ଆ଼ଡଅସି, ବୁଦିଗାଟାସି ଏ଼ଦାଆଁ ପୁଞ୍ଜାଲି ଅଣ୍‌ପିତି ଜିକେଏ ଏ଼ଦାଆଁ ବେଟାଆ଼ହାଲି ଆ଼ଡଅସି।