1 ୱେ଼ଡ଼ା ଡ଼଼ଇ ନା଼ନୁ ର଼ ଦୁକୁତି କାତା ମେସାମାଇଁ, ଅ଼ଡ଼େ ଏ଼ଦି ମାଣ୍‌ସି ବିତ୍ରା ହା଼ରେକା ବ଼ଜୁଗାଟାୟି; 2 ମାହାପୂରୁ ଆମ୍ବା ଆମ୍ବାଆରାକି ଇଚେକା ଦ଼ନ, ବାତ୍‌କୁ ଅ଼ଡ଼େ ସାମ୍ବ୍ରମି ହୀନେସି, କି ତାନି ମ଼ନତି ଅଣ୍‌ପୁ ପୂରା କିହାଲି ଏ଼ନାୟି ଊଣା ଡ଼ୟେଏ, ଆ଼ତିଜିକେଏ ଏ଼ଦାଣି ଲେ଼ମ୍ବାଲି ମାହାପୂରୁ ଅଦିକାରା ହୀଅସି, ସାମା ଏଟ୍‌କାତି ଲ଼କୁ ଏ଼ଦାଆଁ ତିନେସି; ଈଦି ହା଼ରେକା ଦୁକୁତି କାତା ଅ଼ଡ଼େ ଉଜେଏତାୟି। 3 ଆମିନି ମାଣ୍‌ସି ପା଼ସାକ଼ଡ଼ି ମୀର୍‌କା ଜାର୍ନି କିହାଁ ହା଼ରେକା ବାର୍ସା ନୀଡାହାଁ ଡ଼ୟିନେସି, ସାମା ଏ଼ୱାଣି ଜୀୱୁ ସୁକୁ ତଲେ ଡ଼ୟେଏ, ଅ଼ଡ଼େ ଏ଼ୱାଣାଇଁ ମୁସ୍‌ପି ଆ଼ଏ, ଏ଼ଦାଆଁତାକି ନା଼ନୁ ଏଲେଇଞ୍ଜିମାଇଁ, ଏ଼ ଲ଼କୁ କିହାଁ ଜାର୍ନା ଆ଼ନି ବେ଼ଲାତା ହା଼ହାମାନି କକାସି ଡା଼ଲୁ ନେହେଁ; 4 ଇଚିହିଁ ଏ଼ କକାସି ଊକ୍‌ଅଡ଼ି ସମାନା ୱା଼ନେସି ଅ଼ଡ଼େ ଆନ୍ଦେରିତା ହାନେସି, ଅ଼ଡ଼େ ଏ଼ୱାଣି ଦ଼ରୁ ଆନ୍ଦେରିତା ମେଣ୍‌ଙ୍ଗାହାନେ; 5 ଅ଼ଡ଼େ ଏ଼ୱାସି ୱେ଼ଡ଼ା ମେସା ହିଲଅସି କି ପୁଞ୍ଜା ହିଲଅସି; ଆ଼ତିଜିକେଏ ଈ ହା଼ହାଁ ଜାର୍ନାଆ଼ତି କକାସି ଏ଼ ମାଣ୍‌ସି କିହାଁ ହା଼ରେକା ଜ଼ମୁ ବେଟାଆ଼ନେସି; 6 ଇଞ୍ଜାଁ ଏ଼ ମାଣ୍‌ସି ଜୀୱୁତା ଏ଼ନି ସୁକୁ ବେଟାଆ଼ଆନା ରୀ ମା଼ଣା ବାର୍ସା ନୀଡିତିହିଁ ଜିକେଏ ବାରେଜା଼ଣା କି ରଣ୍ତିଏ ଟା଼ୟୁତା ହାଲଅରି ?

7 ମାଣ୍‌ସିତି ବାରେ କସ୍ତ ତାନି ବାଣ୍ତିତାକି, ଆ଼ତିଜିକେଏ ଏ଼ୱାଣି ଆ଼ସା ଊଣା ଆ଼ଏ। 8 ବୁଦି ହିଲାଆଗାଟାଣା କିହାଁ ବୁଦି ଗାଟାଣାକି ଏ଼ନି ଲା଼ବା ? ଏମିନି କା଼କୁଲି ମାଣ୍‌ସି ଜୀୱୁଗାଟାରି ନ଼କିତା ବାତ୍‌କାଲି ପୁନେସି ଏ଼ୱାଣାକି ଅ଼ଡ଼େ ଏ଼ନି ଲା଼ବା ? 9 ମ଼ନତି ଜୂପ୍‌କା ତଲେ ତା଼କିନି କିହାଁ କାନୁ ତଲେ ମେହ୍‌ନାୟି ନେହେଁ; ଈଦି ଉଜେଏତାୟି ଅ଼ଡ଼େ ଗା଼ଲି ଜେ଼ଚ ହାନାୟି।

10 ଏ଼ନାୟି ଆ଼ହାମାନେ, ହା଼ରେକା କା଼ଲା ଆ଼ତେୟିଏ ଏ଼ଦାଣି ଦ଼ରୁ ହୀପ୍‌କି ଆ଼ହାମାଚେ, ଈ କାତା ୱେସିମାନେ କି ଏ଼ୱାସି ମାଣ୍‌ସି; ଏ଼ୱାସି ତାନି କିହାଁ ବା଼ଡ଼୍‌ୟୁ ଗାଟାଣି ତଲେ ଗଡ଼୍‌ହା କିହାଲି ଆ଼ଡଅସି। 11 ଇଲେକିଁ ହା଼ରେକା କାତା ମାନେ, ଏମିନାଣି ତାକି ଜୀୱୁ ଜିକେଏ ଉଜେଏତାୟି ଆ଼ହିମାନେ, ଆତିହିଁ ମାଣ୍‌ସିକି ଏ଼ନି ଲା଼ବା ? 12 ଇଚିହିଁ ମାଣ୍‌ସି ସା଼ୟିଁ ସମାନା ତାନି ଉଜେଏ ଜୀୱୁତା ନୀଡିନେସି, ଏ଼ ନୀଡାମାନି ବେ଼ଲାତା ଏ଼ନାୟି ଏ଼ୱାଣାକି ନେହେଁ, ଈଦାଆଁ ଆମ୍ବାଆସି ପୁନେସି ? ଅ଼ଡ଼େ ମାଣ୍‌ସି ହା଼ତିସାରେ ୱେ଼ଡ଼ା ଡ଼଼ଇ ଏ଼ନାୟି ଆ଼ନେ, ଈ କାତା ଆମ୍ବାଆସି ଏ଼ୱାଣାଇଁ ୱେସାଲି ଆ଼ଡିନେସି ?