1 ଦାୱୁଦ ମୀର୍‌ଏସି, ଜିରୁସାଲମତି ରାଜା, ବୁଦିତି କାତା ଜା଼ପ୍‌ନାଣି କାତା। 2 ବୁଦିତି କାତା ଜା଼ପ୍‌ନାସି ଏଲେ ଇଞ୍ଜିମାନେସି, "ଉଜେଏତି ଉଜେଏତାୟି ବାରେ ଉଜେଏତାୟି।" 3 ମାଣ୍‌ସି ୱେ଼ଡ଼ା ଡ଼଼ଇ ଏମି ଏମିନି କାମାତା ୱା଼ହିନେସି, ତାନି ଏ଼ ବାରେ ତା଼ଣା ଏ଼ନି ଲା଼ବା ? 4 ର଼ ପା଼ଟୁ ହାନେ ଅ଼ଡ଼େ ଅ଼ର ପା଼ଟୁ ୱା଼ନେ; ସାମା ଦାର୍‌ତି କା଼ଲେଏ ଡ଼ୟିନେ। 5 ଇଞ୍ଜାଁ ୱେ଼ଡ଼ା ହ଼ନେ ଅ଼ଡ଼େ ୱେ଼ଡ଼ା କୂଡ଼୍‌ନେ, ଇଞ୍ଜାଁ ତାନି ହ଼ଅନି ଟା଼ୟୁତା ହାଜାଲି ଦାଗା ଆ଼ନେ। 6 ଗା଼ଲି ଟିଃନିୱାକି ହାନେ ଅ଼ଡ଼େ ଟେ଼ବ୍ରି ୱାକି ୱେଣ୍ତିନେ; ତାନି ଜିରୁତା କା଼ଲେଏ ତିର୍‌ୱିନେ ଅ଼ଡ଼େ ଗା଼ଲି ତାନି ଟା଼ୟୁତା ୱେଣ୍ତେ ୱେଣ୍ତିନେ। 7 କାଡାୟାଁ ବାରେ ସାମ୍‌ଦୁରିତା ରେ଼ଚାହାନୁ, ଆ଼ତିଜିକେଏ ସାମ୍‌ଦୁରି ନେଞ୍ଜେଏ; କାଡାୟାଁ ବାରେ ତା଼ମ୍ବୁ ହାନି ଟା଼ୟୁତା ୱେଣ୍ତେ ହାନୁ। 8 ବାରେ କାତା ୱା଼ହୁଗାଟାୟି; ମାଣ୍‌ସି ଏ଼ଦାଆଁ ଅଣ୍‌ପାଲି ଆ଼ଡଅସି; କାନୁ ମେହ୍‌ନି ତା଼ଣା ଏଚେଲା ରା଼ହାଁ ଆ଼ଏ, କି କିର୍ୟୁଁ ୱେନି ତା଼ଣା ରା଼ହାଁ ଆ଼ଏ। 9 ଏ଼ନାୟି ଆ଼ହାମାନେ, ଏ଼ଦିଏ ଆ଼ନେ ଅ଼ଡ଼େ ଏ଼ନାୟି କିୱି ଆ଼ହାମାନେ, ଏ଼ଦିଏ କିୱିଆ଼ନେ; ଇଞ୍ଜାଁ ୱେ଼ଡ଼ା ଡ଼଼ଇ ଏ଼ନାୟି ପୁଃନି କାତା ହିଲେଏ। 10 ଏମିନି କାତା ମାଣ୍‌ସିୟାଁ ଏଲେଇନେରି, ମେହ୍‌ଦୁ, ଈଦି ପୁଃନାୟି, ଇଲେକିହିଁ କି ଏ଼ନି କାତା ମାନେ ? ଏ଼ଦି ଈଦାଣି ନ଼କେଏ ମା଼ ତଲି କା଼ଲାତି ବେ଼ଲାତା ମାଚେ। 11 ତଲି କା଼ଲାତି କାତା ଇଚାୟି ଅଣ୍‌ପୁତା ଡ଼ୟେଏ; କି ଡା଼ୟୁ ଏମିନିଗାଟାରି ଜାର୍ନା ଆ଼ନେରି, ଏ଼ୱାରି ଅଣ୍‌ପୁ ଜିକେଏ ଡ଼ୟେଏ।

12 ନା଼ନୁ ବୁଦିତି କାତା ଜା଼ପ୍‌ନାତେଏଁ, ଜିରୁସାଲମତା ଇସ୍ରାୟେଲତା ରାଜା ମାଚେଏଁ। 13 ଇଞ୍ଜାଁ ହା଼ଗୁ ଡ଼଼ଇ କିହାମାନି ବାରେ କାମା ବୁଦି ତଲେ କାତା ଆ଼ହାଲି ଅ଼ଡ଼େ ପାରାଲି ତାକି ଅଣ୍‌ପିତେଏଁ; ଏମ୍ବାଆଁ ମାହାପୂରୁ ମାଣ୍‌ସି ମୀର୍‌କାକି କିଲିବିଲି ଆ଼ହାଲି ହୀହାମାନେସି, ଏ଼ଦି ହା଼ରେକା କସ୍ତଗାଟାୟି। 14 ୱେ଼ଡ଼ା ଡ଼଼ଇ କିତି ବାରେ କାମା ନା଼ନୁ ସିନିକିହାମାଇଁ; ଅ଼ଡ଼େ ମେହ୍‌ଦୁ ବାରେ ଉଜେଏତାୟି, ଗା଼ଲି ଜେ଼ଚ ହାନାୟି। 15 ଏମିନାୟି ବା଼ଙ୍କା ଏ଼ଦି ସଲ୍‌କେ ଆ଼ହାଲି ଆ଼ଡେଏ, ଇଞ୍ଜାଁ, ଏମିନାୟି ଲ଼ଡ଼ାମାନେ ଏ଼ଦି ଏଜିକିୱି ଆ଼ଏ।

16 ନା଼ନୁ ନା଼ ହିୟାଁତା ଅଣ୍‌ପିତେଏଁ, "ମେହ୍‌ଦୁ ନା଼ ନ଼କେଏ ଏଚେକା ଜିରୁସାଲମତା ମାଚେରି, ଏ଼ ବାରେତି କିହାଁ ନା଼ନୁ ହା଼ରେକା ବୁଦି ବେଟାଆ଼ତେଏଁ; ଅ଼ଡ଼େ ନା଼ ହିୟାଁ ହା଼ରେକା ବୁଦି ତେଲ୍‌ହାମାନେ।" 17 ଏଚେଟିଏ ନା଼ନୁ ବୁଦିତି କାତା, ଇଞ୍ଜାଁ ସେତ୍‌ନା ହିଲାଆଗାଟାଣି* ଅ଼ଡ଼େ ବୁଦି ହିଲାଆଗାଟି କାତା ପୁଞ୍ଜାଲି ଅଣ୍‌ପିତେଏଁ; ଈଦି ଜିକେଏ ଗା଼ଲି ଜେ଼ଚ ହାନାୟି ଇଞ୍ଜିଁ ପୁଚେଏଁ। 18 ଇଚିହିଁ ହା଼ରେକା ବୁଦିତା ହା଼ରେକା କସ୍ତ ଡ଼ୟିନେ; ଇଞ୍ଜାଁ ଆମ୍ବାଆସି ବୁଦି ପାଡିକିନେସି, ଏ଼ୱାସି ଦୁକୁ ପାଡିକିନେସି।