1 ହା଼ତି ୱୀହାଁୟାଁ ତାକି ନେହିଁ ଗାନ୍ଦାଗାଟି ନିୟୁଁ ଜିକେଏ ଲାଗେଏତି ଗାନ୍ଦା ଆ଼ନେ; ଏଲେକିହିଁଏ ବୁଦି ହିଲାଆ ଊଣା ବୁଦି ଗା଼ୱୁରମି ନା଼ସା କିନେ।

2 ବୁଦିଗାଟାଣି ହିୟାଁ ଏ଼ୱାଣାଇଁ ତୀର୍‌ପୁ ଜିରୁତା ଅ଼ନେ; ସାମା ବୁଦି ହିଲାଆଗାଆଣି ହିୟାଁ ଏ଼ୱାଣାଇଁ ଲାଗେଏତି ଜିରୁତା ଅ଼ନେ। 3 ଅ଼ଡ଼େ ବୁଦି ହିଲାଆଗାଟାସି ତା଼କିନି ଜିରୁତା ବୁଦି ଊଣା ଆ଼ନେ, ଇଞ୍ଜାଁ ଏ଼ୱାସି ବାରେ ଲ଼କୁଇଁ ୱେହ୍‌ନେସି, କି ଏ଼ୱାସି ତା଼ନୁଏ ବୁଦି ହିଲାଆଗାଟାସି।

4 ମୀ ମୁହେଁ ସା଼ଲୱି କିନାଣି ମ଼ନତା ମୀ କ଼ପାଟି ନିଙ୍ଗିସାରେ, ମୀ ଟା଼ୟୁ ପିହ୍‌ଆଦୁ; ଇଚିହିଁ ସା଼ସା ଆସ୍ତିସାରେ କାଜା କାଜା ପା଼ପୁ ସାପି ଆ଼ନେ।

5 ନା଼ନୁ ୱେ଼ଡ଼ା ଡ଼଼ଇ ର଼ ଲାଗେଏତି କାତା ମେସାମାଇଁ, ଏ଼ଦି ସା଼ଲୱି କିନାଣି ତା଼ଣାଟି ହ଼ତି ଲାଗେଏତାୟି ଲେହେଁ; 6 ମୁର୍କୁଗାଟାୟି ହା଼ରେକା କାଜା ପା଼ଣାତା ଡ଼ୟିନେ, ଇଞ୍ଜାଁ ବାତ୍‌କୁ ଗାଟାସି ଊଣା ଟା଼ୟୁତା କୁଗିନେସି। 7 ନା଼ନୁ ହ଼ଲିୟାଙ୍ଗାଣି ଗ଼ଡ଼ାୟାଁ ଲାକ ଅ଼ଡ଼େ କାଜାପା଼ଣା ଗାଟାସି ହ଼ଲିୟାଙ୍ଗା ଲେହେଁ ପା଼ୱୁଲି ତଲେ ତା଼କିମାନାଣି ମେସାମାଇଁ।

8 ଆମ୍ବାଆସି ଗା଼ଡ଼୍‌ୟୁ କା଼ର୍‌ନେସି, ଏ଼ୱାସି ଏମ୍ବାଆଁ ରିନେସି ଅ଼ଡ଼େ ଆମ୍ବାଆସି ଗିଚୁ ଡିକ୍‌ନେସି, ଏ଼ୱାଣାଇଁ ରା଼ଚୁ କାଚିନେ। 9 ଆମ୍ବାଆସି ୱାଲ୍‌କା ଅ଼ହ୍‌ନେସି, ଏ଼ୱାସି ଏ଼ଦାଆଁ ତଲେ ଗା଼ହାଁ ଆ଼ନେସି; ଇଞ୍ଜାଁ, ଆମ୍ବାଆସି ୱେସ୍‌କା ହୀସ୍‌ପିନେସି, ଏ଼ୱାସି ଏ଼ଦାଣି ତଲେ କସ୍ତ ବେଟାଆ଼ନେସି। 10 ଲ଼ହ ମ଼ର୍‌ହିସାରେ ଏ଼ଦାଣି ଆମ୍ବାଆସି କଲ୍‌ୱି କିଅସି, ଆତିହିଁ ଏ଼ଦାଣି ଡା଼ୟୁ ଗାଡି ବପୁ ତ଼ସାଲି ଆ଼ନେ; ସାମା ଜୀଣା ଆ଼ହାଲି ତାକି ବୁଦି ଲ଼ଡ଼ା ଆ଼ନେ। 11 ମ଼ନ୍ତ୍ର ରା଼ନି ନ଼କେଏ ରା଼ଚୁ କାଚିତିହିଁ ଗୂଣିୟାଁୱାୟି ଏ଼ନି ଲା଼ବା ହିଲେଏ। 12 ବୁଦିଗାଟାଣି ଗୂତିତି ବ଼ଲୁ କାର୍ମାମେହ୍‌ନାୟି ଲେହେଁ; ସାମା ବୁଦି ହିଲାଆଗାଟାଣି ଗୂତିଏ ଏ଼ୱାଣାଇଁ ନା଼ସା କିନେ। 13 ଏ଼ୱାଣି ଗୂତିଟି ମା଼ଟ୍‌ନି ବ଼ଲୁ ବୁଦି ହିଲାଆଗାଟାୟି ଅ଼ଡ଼େ ତାନି ଗୂତିତି ରା଼ନି ବ଼ଲୁ ଦୁକୁ ହୀନି ସେୟାଁଣା ହିଲାଆଗାଟାୟି ଲେହେଁ।

14 ବୁଦି ହିଲାଆଗାଟାସି ହା଼ରେକା କାତା ଜ଼ଲିନେସି; ଆ଼ତିଜିକେଏ ଏ଼ନାଆଁ ଆ଼ନେ, ମାଣ୍‌ସି ପୁଞ୍ଜାହିଲଅସି; ଅ଼ଡ଼େ ଏ଼ଦାଣି ଡା଼ୟୁ ଏ଼ନାଆଁ ଗଟୱି ଆ଼ନେ, ଆମ୍ବାଆସି ଏ଼ୱାଣାଇଁ ୱେସାଲି ଆ଼ଡିନେସି ?

15 ବାରେ ବୁଦି ହିଲାଆ କାମା ଏ଼ୱାଣାଇଁ ୱା଼ହିକିନେ, ଇଚିହିଁ ଏ଼ନିକିଁ ଗା଼ଡ଼ାତା ହାଜାଲି ଆ଼ନେ, ଏ଼ୱାସି ଏ଼ଦାଆଁ ପୁନଅସି।

16 ହେ଼ ଦେ଼ସା ମୀ ରାଜା କକାସି ଆ଼ନେସି ଅ଼ଡ଼େ ମୀ ସା଼ଲୱି କିନାରି ଲା଼ଇଏ ତିନେରି, ଆତିହିଁ ମୀରୁ ଦୁକୁ ବେଟାଆ଼ନାତେରି। 17 ର଼ ଦେ଼ସା, କାଜା କୁଟମିତି ମୀର୍‌ଏସି ଏଚେ଼ତା ମୀ ରାଜା ଆ଼ନେସି ଅ଼ଡ଼େ ମୀ ସା଼ଲୱି କିନାରି ହ଼ଚାଲି ତାକି ଆ଼ଏ, ସାମା ବା଼ଡ଼୍‌ୟୁ ତାକି ସମାନା ବେ଼ଲାତା ତିନେରି, ଆତିହିଁ ମୀରୁ ନେହାତେରି।

18 ନିସ୍ତା ଆ଼ତିସାରେ ଇଲୁ ରିଙ୍ଗିନେ, ଇଲୁତା ଏ଼ୟୁ ୱା଼ଙ୍ଗିନେ, ଏଚେଟିଏ ଇଲୁ ବୀଡ଼୍‌ନେ।

19 ରା଼ହାଁ ତାକି ବ଼ଜି ତିୟାରା କିୱିଆ଼ନେ, ଇଞ୍ଜାଁ ଅଙ୍ଗୁରି ରାସା ଜୀୱୁତି ରା଼ହାଁ କିନେ; ଦ଼ନ ବାରେ କାମାତା ୱା଼ନେ।

20 ରାଜାଇଁ ବା଼କା ହୀଆଦୁ, କି ମ଼ନ ମ଼ନତା ଜିକେଏ ଏଲେଇନାଆଦୁ; ଅ଼ଡ଼େ, ବାତ୍‌କୁ ଗାଟାଣାଇଁ ମୀ ହୁଞ୍ଜିନି ଇଲୁତା ବା଼କା ହୀଆଦୁ; ଇଚିହିଁ ଊମ୍ବିନି ପଟା ଜିକେଏ ନୀ ହା଼ଡା ଅ଼ହାଁ ୱେହ୍‌ନେ।