1 ମୀମ୍ବୁ ମାହାପୂରୁ ଇଲୁତା ହାନି ବେ଼ଲାତା ମା଼ନି ମାଣ୍‌କି ତଲେ ମାଞ୍ଜୁ; ଏ଼ନାଆଁ ତାକି ଇଚିହିଁ ଲାଗେଏତି ଲ଼କୁତି ପୂଜା ହେର୍‌ପିନାଣି କିହାଁ ୱେଞ୍ଜାଲି ତାକି ଡାଗେ ହାନାୟି ନେହେଁ; ଏ଼ନାଆଁତାକି ଇଚିହିଁ ଏ଼ୱାରି ଲାଗେଏତି କାମା କିହିମାନମି ଇଞ୍ଜିହିଁ ପୁନଅରି। 2 ନୀନୁ ନୀ କାତା ଜ଼ଲିନାଟି ଦାଗା ଆ଼ଆନି ଅ଼ଡ଼େ ମାହାପୂରୁ ନ଼କିତା ଏ଼ନି କାତା ଜ଼ଲାଲି ନୀ ହିୟାଁ ଦାଗା ଆ଼ଆପେ; ଇଚିହିଁ ମାହାପୂରୁ ଲାକପୂରୁ ମାନେସି ଅ଼ଡ଼େ ନୀନୁ ଦାର୍‌ତିତା ମାଞ୍ଜି; ଏ଼ଦାଆଁତାକି ନୀନୁ କାତା ଜ଼ଲିନି ନ଼କେଏ ତୀରେ ତଲେ ଅଣ୍‌ପାମୁ। 3 ଇଚିହିଁ ଏ଼ନିକିଁ ଗାଡି କାମାତାକି ହାପାନା ଆ଼ନେ; ଏଲେକିହିଁଏ ହା଼ରେକା କାତାୟାଁ ଜ଼ଲିନାସି ବୁଦି ହିଲାଆଗାଟାସି। 4 ନୀନୁ ମାହାପୂରୁ ତା଼ଣା ଆ଼ଞ୍ଜିତିହିଁ, ଏ଼ଦାଆଁ ୱେଣ୍ତେ ହୀହାଲି ୱେ଼ଡ଼ା କିଆନି; ଇଚିହିଁ ବୁଦି ହିଲାଆଗାଟାରି ତା଼ଣା ମାହାପୂରୁତି ରା଼ହାଁ ହିଲେଏ; ନୀନୁ ଏ଼ନାଆଁ ଆ଼ଞ୍ଜିଦି, ଏ଼ଦାଆଁ ୱେଣ୍ତେ ହୀମୁ। 5 ଆ଼ଞ୍ଜାହାଁ ୱେଣ୍ତେ ହୀଆ କିହାଁ ଆ଼ଞ୍ଜାଆଗାଟାୟି ନିଙ୍ଗେ ତାକି ନେହେଁ। 6 ଏ଼ନି କାତା ଜ଼ଲାହାଁ ଜାହାରାଇଁ ପା଼ପୁ କିଆନି; ଅ଼ଡ଼େ ମାହାପୂରୁ ଦୂତୁ ନ଼କିତା ଏଲେ ଇନାଆନି ଈଦି ପୁନାଆନା ଆ଼ହାମାନେ; ମାହାପୂରୁ ଏ଼ନାଆଁତାକି ନୀ ବ଼ଲୁତା କାର୍‌ବି ଆ଼ହାଁ ନୀ କେୟୁତି କାମା ନା଼ସା କିନେସି ? 7 ଇଚିହିଁ ହା଼ରେକା ହାପାନା ଅ଼ଡ଼େ ହା଼ରେକା କାତାୟାଁ ଉଜେଏତାଇ ଆ଼ନୁ; ସାମା ନୀନୁ ମାହାପୂରୁଇଁ ଆଜାମୁ।

8 ଏଚିବେ଼ଲା ନୀନୁ ଏମିନି ରା଼ଜିତା କା଼କୁଲି ଗାଟାରାଇଁ ଲାଗେଏ, ନୀହାଁୟି ବିଚାରା ଲାଗେଏ କିନାଣି ମେହ୍‌ଦି, ଆତିହିଁ ଏ଼ କାତାତାକି ଆଡାଜାକା ଆ଼ଆନି; ଇଚିହିଁ କାଜାଣି କିହାଁ ରଅସି କାଜାସି ମାନେସି; ଇଞ୍ଜାଁ ଏ଼ୱାରି କିହାଁ କାଜାସି ମାନେସି। 9 ଦାର୍‌ତିତି ପା଼ଡ଼େୟି ବାରେ ତାକି; ତା଼ସା ତଲେ ରାଜା ଲା଼ବା ବେଟାଆ଼ନେସି। 10 ଆମ୍ବାଆସି ୱେଣ୍ତି ଜୀୱୁ ନ଼ନେସି, ଏ଼ୱାସି ୱେଣ୍ତି ତଲେ ସାରି ଆ଼ଅସି, ଅ଼ଡ଼େ ଆମ୍ବାଆସି ବାତ୍‌କୁ ଜୀୱୁ ନ଼ନେସି, ଏ଼ୱାସି ବେଟାଆ଼ନି ତା଼ଣା ସାରି ଆ଼ଅସି, ଈଦିଏ ଉଜେଏତାୟି। 11 ବାତ୍‌କୁ ଗାଡି ଆ଼ତିସାରେ, ଏ଼ଦାଆଁ ତିନାରି ଗାଡି ଆ଼ନେରି; ଇଞ୍ଜାଁ ଜାହାରା କାନୁଟି ମେହ୍‌ନାଣି ପିସ୍‌ପେ ଏ଼ ସା଼ୱୁକାରିକି ଏ଼ନି ଲା଼ବା ? 12 କସ୍ତ କିନି ଲ଼କୁ ଇଚାଣି କି ଗାଡି ତିଚିହିଁ ଜିକେଏ ଏ଼ୱାଣି ଇଦା ନେହିକିଁ ଆ଼ନେ; ସାମା ବାତ୍‌କୁଗାଟାଣି ବାତ୍‌କୁ ଏ଼ୱାଣାକି ଇଦା ହୀଏ।

13 ଦ଼ନ ଅଦିକାରା ତା଼ଣାଟି ଜାହାରା ନସ୍ତ ତାକି ଦ଼ନ ଡ଼ୟିନେ, ଈଦି ର଼ କସ୍ତ ସମାନା ଲାଗେଏତାଣି ନା଼ନୁ ୱେ଼ଡ଼ା ଡ଼଼ଇକା ମେସାମାଇଁ; 14 ଏ଼ ଦ଼ନ ଏ଼ନି ଲେକା ହିଲାଆ କାମା ତଲେ ନସ୍ତ ଆ଼ନେ; ଇଞ୍ଜାଁ ଏ଼ୱାସି କକାଣାଇଁ ଜାର୍ନି କିତିହିଁ, ଏ଼ୱାଣି କେୟୁତା ଇଚାୟି ଡ଼ୟେଏ। 15 ଏ଼ୱାସି ତାନି ତାଲିନି ବାଣ୍ତିଟି ଏ଼ନିକିଁ ୱା଼ତେସି, ଏଲେକିଁ ନା଼ଗ୍‌ଡ଼ା ଆ଼ହାଁ ୱା଼ହାମାନି ଲେହେଁ ୱେଣ୍ତା ହାନେସି, ଅ଼ଡ଼େ ଏ଼ୱାସି ତାନି କସ୍ତତି ବାଦୁଲି ଏ଼ନାଆଁ ଅ଼ହାଲି ଆ଼ଡିନେସି, ଇଲେକିଁ ଇଚାଣି ଜିକେଏ ତାନି ତଲେ ଅ଼ଅସି। 16 ଇଞ୍ଜାଁ ଏ଼ୱାସି ଏ଼ନିକିଁ ୱା଼ତେସି, ଏଲେକିହିଁଏ ହାନେସି, ଈଦି କସ୍ତତି ଲାଗେଏତାୟି; ଇଞ୍ଜାଁ ଏ଼ୱାସି ଗା଼ଲି ତାକି କସ୍ତ କିତିହିଁ, ଏ଼ୱାଣାକି ଏ଼ନି ଲା଼ବା ? 17 ଅ଼ଡ଼େ ଏ଼ୱାସି ନୀଡାମାନି ବେ଼ଲାତା ଆନ୍ଦେରି, ଦୁକୁ ଅ଼ଡ଼େ ଦୁକୁ ତଲେ ନୀଡିନେସି, ଇଞ୍ଜାଁ ଏ଼ୱାସି ହା଼ରେକା କାର୍‌ବି ଆ଼ନେସି, ଅ଼ଡ଼େ ଏ଼ୱାଣାକି ର଼ଗ ଅ଼ଡ଼େ କ଼ପା ୱା଼ନେ।

18 ମେହ୍‌ଦୁ, ତିନାୟି ଉନାୟି ଅ଼ଡ଼େ ମାହାପୂରୁ ହୀହାମାନି ନୀଡିନି ବାର୍ସା ବିତ୍ରା ମାଣ୍‌ସି ୱେ଼ଡ଼ା ଡ଼଼ଇକା ଏ଼ନି ଏ଼ନି କସ୍ତ କିନେସି, ଏ଼ ବାରେ କସ୍ତତା ସୁକୁ ତଲେ ଡ଼ୟିନେସି, ଈଦିଏ ଏ଼ୱାଣାକି ନେହେଁ ଇଞ୍ଜିଁ ନା଼ନୁ ମେସାମାଇଁ; ଇଚିହିଁ ଈଦିଏ ଏ଼ୱାଣି ବା଼ଗା। 19 ଅ଼ଡ଼େ ମାହାପୂରୁ ଆମିନି ମାଣ୍‌ସିକି ବାତ୍‌କୁ ହୀହାଁ ଏ଼ଦାଣି ଲେ଼ମ୍ବାଲି, ତାନି ବା଼ଗା ଅ଼ହାଲି ଅ଼ଡ଼େ ତାନି କସ୍ତତା ରା଼ହାଁ କିହାଲି ଅଦିକାରା ହୀତେସି, ଈଦି ମାହାପୂରୁତି ଦା଼ନା।

ଇଚିହିଁ ଏ଼ୱାସି ତାନି ନୀଡାମାନି ବାର୍ସାତି ହା଼ରେକା ଅଣ୍‌ପଅସି; ଇଚିହିଁ ମାହାପୂରୁ ଏ଼ୱାଣି ହିୟାଁତା ରା଼ହାଁ ହୀହାଁ ଏ଼ୱାଣାଇଁ ଜ଼ଲିନେସି।