1 ହନନିୟ ଦର୍‌ତି ଅରେନ୍‌ ଲୋକୁ ମାରି ୱାନି ଆଡ଼୍‌ସି ସପିରା ତାମେ ଏସ ବୁମି ପର୍‍ତାର୍‍ । 2 ମାତର୍‌ ଆଡ଼୍‌ସି ମାଟା ଆସ୍‌ସି ହନନିୟ ପର୍‍ତି ଡାବୁଙ୍ଗୁଁ ଏସ ନିଜେଦି ଉଣ୍ତିଙ୍ଗ୍‌ ଇଡ୍‌ଜି, ଏଜିତିକା ପ୍ରେରିତ ସିସୁରିଙ୍ଗ୍‌ ସିତାର୍‍ । 3 ପିତର୍‌ ୱାନିଙ୍ଗ୍‌ ଇର୍ହାନ୍‌, "ହନନିୟ, ନି ଜିବନ୍‌ ୱିଜୁ ଏନ୍ଦା ସୟତାନ୍‍ତି ଆଡ୍‍ଗି ଆଜି ବୁମି ପର୍‌ଜି ପୟ୍‍ତିମାନି ଡାବୁଙ୍ଗୁଁ ଏସ ନିଜେଦି ଉଣ୍ତିଙ୍ଗ୍‌ ଇଡ୍‌ଜି ପବିତ୍ର ଆତ୍ମାଦିଙ୍ଗ୍‌ ମିସ୍‌ ଇର୍ହି ? 4 ଦନ୍‌ ପର୍‌ନି ଆଗ୍‌ଡ଼ି ଆକା ନି ଅଦିକାର୍‌ ମାର୍ହାତ୍‌, ପର୍‌ନି ୱେନ୍‌କା ବା ଡାବୁଙ୍ଗୁଁ ନିଦି ମାର୍ହାତ୍‌, ଆର୍‍ତିଙ୍ଗ୍‍ଁ ନିନ୍‌ ଏନ୍ଦା ଇୟାୱାଜା ପାଣି କିଦେଙ୍ଗ୍‌ ମୋନ୍‌ କିତି ? ନିନ୍‌ ଲୋକାଙ୍ଗ୍‌ ମିସ୍‌ ୱେର୍‌ଇତି, ମାତର୍‌ ମାପୁରୁଙ୍ଗ୍‍ଁ ମିସ୍‌ ୱେର୍‌ତି ।" 5 ହନନିୟ ଇୟା ମାଟା ୱେନି ଦାପ୍ରେ ଆଡ୍‍ଗି ଆର୍‍ଜି ସାତାନ୍‍; ମାରି ଏମେକାର୍‌ ଇୟା ମାଟା ୱେର୍‌ଆର୍‌, ୱାର୍‌ ୱିଜେରେ ନାଣ୍ତ ତିଲାତାର୍‌ । 6 ମାରି, ମୁରୁଲିର୍‍ ହନନିୟଦି ସାତି ମାଡ଼ାଦିଙ୍ଗ୍‍ ୱାତିଦୁ ତେରେପ୍‍ସି ଆତ୍ରେ ଅତାର୍‌ ମାରି ମୁସ୍‌ତାର୍‌ ।

7 ମାରି ମୁନ୍‌ଡ୍ରି ଗନ୍‌ଟା ୱେନ୍‌କା ହନନିୟଦି ଆଡ଼୍‌ସି ୱାଜି ଇତାତ୍‍ । ୱାଦ୍‌ ଇୟା ଗଟ୍‍ନା ବିସୟ୍‌ ନେସ୍‍ଏତ୍‍ ମାର୍ହାତ୍‌ । 8 ପିତର ତାନିଙ୍ଗ୍‌ ୱେନ୍‌ବାତାନ୍‌, "ନାଙ୍ଗିଁ ଇନ୍‌ଆଁ, ନିନ୍‌ ମାରି ନି କନ୍‍ଲି ଆମା ବୁମି ପର୍‍ତିଦେର୍‍, ଇକା ଇନିକା ତାନି ପୁରା ଡାବୁଙ୍ଗୁଁ ?"

ୱାଦ୍‌ ଇର୍ହାତ୍‌, "ହୁଁ ।"

9 ପିତର୍‌ ତାନିଙ୍ଗ୍‌ ଇର୍ହାନ୍‌, "ପ୍ରବୁଦି ଆତ୍ମାଦିଙ୍ଗ୍‍ ପରିକା କିଦେଙ୍ଗ୍‌ ଇଜି ନିନ୍‌ ମାରି କନ୍‍ଲି ଏନ୍ଦା ବାସେ କିତିଦେର୍‍ ? ଏମେକାର୍‌ ନି କନ୍‍ଲିଙ୍ଗ୍‍ ମୁସ୍‌ତାର୍‌, ୱାର୍‌ ଇଲେଇ ସେର୍‍ଲା ଲାକ୍‌ତୁ, ୱାର୍‌ ନିଙ୍ଗିଁ ବା ପିଣ୍ତ୍‍ନା ଅନାର୍‍ ।" 10 ୱେନି ଆୟାଦାପ୍ରେ ୱାଦ୍‌ ପିତର୍‌ତି କାଲ୍‍କା ଲାକ୍‌ତୁ ଆର୍‍ଜି ସାତାତ୍‍ । ମୁରୁଲିର୍‍ ଲୋଇ ୱାଜି ତାନି ସାତି ମାନିକା ସୁଡ଼୍‌ଜି ତାନିଙ୍ଗ୍‌ ପିଣ୍ତ୍‍ଜି ଅତାର୍‌ ମାରି ତାନି କନ୍‍ଲିସିଦି ଗୁଟା ଲାକ୍‌ତୁ ତାନିଙ୍ଗ୍‌ ମୁସ୍‌ତାର୍‌ । 11 ମଣ୍ତଲିଦି ପେରିକାର୍‌ ମାରି ଏମେକାର୍‌ ଇୟା ମାଟା ୱେର୍‌ଆର୍‌, ୱିଜେରେ ନାଣ୍ତ ତିଲାତାର୍‌ ।

12 ପ୍ରେରିତ ସିସୁରି ମାଣାନ୍‌ ଲୋକା ଲୋଇ ନାଣ୍ତ କାବାଆନି ପାଣି ଆଜିମାର୍ହାର୍‍, ୱିଜେରେ ବିସ୍‍ବାସିର୍‍ ସଲମନ୍‍ତି ଗୁଡିକାଲ୍‌ତୁ ଉଣ୍ତାଜି ମାର୍ହାର୍‌ । 13 ୱାରି ବିସୟ୍‌ତାନ୍‌ ଲୋକୁ ନେଗି ମାଟା ଇଜିମାର୍ହାର୍‍, ମାତର୍‌ ଦଲ୍‌ ଆତ୍ରେ ମାନି ଲୋକୁ ଏନ୍‌ ୱାରି ୱାଲେ ମିସାଦେଙ୍ଗ୍‍ ସାସ୍‌ କିଏଜିମାର୍ହାର୍‌ । 14 ମାତର୍‌ ପ୍ରବୁମାନୁ ବିସ୍‌ବାସ୍‌ କିଜିମାନି ନାଣ୍ତ ଆଇମେକ୍‍ ନି ମେମାରିର୍‍ ଦଲ୍‍ତୁ ଡ଼ୁଗିତାର୍‍ ମାରି ଆୟା ବିସ୍‍ବାସି ଦଲ୍‌ ଦିନ୍‍ତିଙ୍ଗ୍‍ ଦିନ୍‌ ପିର୍‌ଦେଙ୍ଗ୍‌ ଆସ୍‌ତାର୍‌ । 15 ପ୍ରେରିତ ସିସୁରି ପାଣି ନାଣ୍ତ ନେଗେନ୍‌ ଆତାତ୍‌, ଇୟାୱାଜାକି ପିତର୍‌ ବୁଲାଜି ସନିୱାଲେ ୱାନି ନିଡ଼୍‍ଗା ତାକ୍‌ତେଙ୍ଗ୍‍ ଇଜି ଲୋକୁ ରୋଗିଲୋକାଙ୍ଗ୍‍ ପିଣ୍ତ୍‍ଜିତାସି ସାର୍‍ଦୁ କାଟେଲ୍‍ ନି ଟାଟିଦୁ ତେର୍‍ପ୍‍ସି ମାର୍ହାର୍‌ । 16 ଜିରୁସାଲାମ୍‌ତି ଲାକ୍‌ତୁରି ଗାଡ଼ାକାଣ୍‍କୁ ଉନ୍‌ଡ୍ରି ପେରି ଲୋକୁ ମାନ୍ଦା ରଗ୍‌ ନି ଦୁବା ଆସ୍‌ତି ଲୋକାଙ୍ଗ୍‌ ତାସି ସିସୁରି ଲାକ୍‌ତୁ ତାସିମାର୍ହାର୍‍ ମାରି ୱାର୍‌ ୱିଜେରେ ନେଗେନ୍‌ ଆଜିମାର୍ହାର୍‍ ।

17 ତାନିୱେନ୍‍କା ୱିଜେରିଙ୍ଗ୍‍ ପେରି ଜାଜକ ମାରି ୱାନି ପାଣିକିନିକାର୍‍ ନି ଲାକ୍‌ତୁରି ସାଦୁକି ଦଲତୀ ଲୋକୁ ପ୍ରେରିତ ସିସୁରି ମୁସ୍‌କୁ ନାଣ୍ତ ରିସା ଆଜି ୱାରି ବିରୁଦ୍‍ତାନ୍‍ ପାଣି କିଦେଙ୍ଗ୍‌ ବାସେ କିତାର୍‍ । 18 ୱାର୍‌ ପ୍ରେରିତ ସିସୁରିଙ୍ଗ୍‌ ତର୍‌ସି ଇସ୍ରି ଜଇଲ୍‌ତୁ ଇଟ୍‌ତାର୍‌ । 19 ମାତର୍‌ ଆୟା ନାଡ଼ା ପ୍ରବୁଦି ଅରେନ୍‌ ଦୁତ୍‍ ଜଇଲ୍‍ତି ସେର୍‍ଲା ରେତା ସିତାନ୍‌ ମାରି ପ୍ରେରିତ ସିସୁରିଙ୍ଗ୍‌ ଡ଼ିସିସ୍‍କିଜି ୱାରିଙ୍ଗ୍‌ ଇର୍ହାନ୍‌, 20 "ସାନ୍‍ଡ୍ରୁ, ମନ୍ଦିର୍‌ତୁ ନିଲ୍‍ସି ଲୋକାଙ୍ଗ୍‌ ଇୟା ପୁନି ଜିବନ୍‌ ବିସୟ୍‌ତାନ୍‌ ୱିଜୁ ମାଟା ୱେର୍‍ତୁ ।" 21 ପ୍ରେରିତ ସିସୁର୍‍ ୱାନି ମାଟା ମାନାଜି ସାଲ୍‍ଦି ମନ୍ଦିର୍‌ତୁ ଡ଼ୁଗୁଜି ସିକିୟା ସିଦେଙ୍ଗ୍‍ ଆସ୍‌ତାର୍‌ ।

ୱିଜେରିଙ୍ଗ୍‍ପେରି ଜାଜକ ନି ୱାନି-ୱାନି ପାଣିକିନିକାର୍‍ ପେରିମିଟିଙ୍ଗ୍‍ତି ଇନ୍‌ଡ୍ର ପୁରା ବାସ୍‌ନି ଉଣ୍ତିଙ୍ଗ୍‌ ଇସ୍ରାଏଲ୍‌ତି ୱିଜେରେ ଲୋକୁ ଜିହୁଦି ନେତାରିଙ୍ଗ୍‌ କୁକିସ୍‍ କିଜି ତାତାର୍‌ ମାରି ତାନିୱେନ୍‍କା ପ୍ରେରିତ ସିସୁରିଙ୍ଗ୍‌ ଆୟା ମିଟିଙ୍ଗ୍‍ତୁ ତାତେଙ୍ଗ୍‌ ଇଜି ପାଣିକିନିୱାରିଙ୍ଗ୍‌ ଜଇଲ୍‍ତୁ ପୋକ୍‌ତାର୍‍ । 22 ମାତର୍‌ ପାଣିକିନିକାର୍‌ ଜଇଲ୍‌ତୁ ପ୍ରେରିତ ସିସୁରିଙ୍ଗ୍‌ ପୟ୍‍ଏତାରୋ ଡ଼େସି ୱାଜି ପେରି ମିଟିଙ୍ଗ୍‍ତୁ ୱେର୍‌ତାର୍‌, 23 "ମାପ୍‍ ଜଇଲ୍‍ତୁ ଇତା ସୁଡ଼ୁତାପ୍‌, ଜଇଲି ଆଟ୍‍ୱାଦାନ୍‍ କେର୍‍ପାତା ମାନାତ୍‌ ମାରି କାପ୍‌କିନିକାର୍‌ ସେର୍‍ଲା ଆଗ୍‌ଡ଼ି କାପ୍‍କିଜିନାର୍‍, ମାତର୍‌ ସେର୍‌ଲା ରେତି ୱେନ୍‌କା ଲୋଇ ମାପ୍‌ ଏଙ୍ଗ୍‌ ପୟ୍‍ଏତାପ୍‍ ।" 24 ଇୟା ମାଟା ୱେନ୍‌ଜି ପେରି ଜାଜକ ନି ମନ୍ଦିର୍‌ କାପ୍‍କିନିୱାରି ଦାୟିତ୍‍ତୁ ମାନି ପାଣିକିନିକାନ୍‍ କାବାଆତାନ୍ । ପ୍ରେରିତ ସିସୁରିଙ୍ଗ୍‌ ଉଣ୍ତିଙ୍ଗ୍‌ ଇନିକା ଗଟାତାମାନାତ୍‍ । 25 ନାସ୍ତିୱାଲେ ଅରେନ୍‌ ଲୋକୁ ୱାଜି ଇର୍ହାନ୍‌, "ୱେନ୍‍ଣ୍ତ୍ରୁ ! ଏମେ ଲୋକାଙ୍ଗ୍‌ ମିର୍‌ ଜଇଲ୍‌ତୁ ଇଟ୍‍ତିମାର୍ହିଦେର୍‍, ୱାର୍‌ ମନ୍ଦିର୍‌ତୁ ଲୋକାଙ୍ଗ୍‌ ସିକିୟା ସିଜିନାର୍‍ ।"

26 ମନ୍ଦିର୍‌ତି ପାଣିକିନିକାର୍‌ କାପ୍‍କିନିୱାରି ୱାଲେ ସଲ୍‍ସି ପ୍ରେରିତ ସିସୁରିଙ୍ଗ୍‌ ମାରିଡ଼େସି ତାସି ୱାତାର୍‌ । ୱାର୍‌ ଏଣ୍ତେସ୍‌ କିଜିବା ବପୁ ତିଗ୍‍ଏତାର୍‍, ଇରିଙ୍ଗ୍‌ ୱାରି ତିଏଲ୍‍ ମାର୍ହାତ୍‌ ଜେ ଲୋକୁ ୱାରି ମୁସ୍‌କୁ କାଲ୍‌କୁ ଡାକ୍‌ନାର୍‌ ।

27 ୱାର୍‌ ପ୍ରେରିତ ସିସୁରିଙ୍ଗ୍‌ ଲୋଇ ଅସି ପେରିମିଟିଙ୍ଗ୍‌ ଆଗ୍‌ଡ଼ି ନିଲ୍‍ପ୍‍ତାର୍‍ ମାରି ୱିଜେରିଙ୍ଗ୍‍ପେରି ଜାଜକ ୱାରିଙ୍ଗ୍‌ ମାଟା ୱେନ୍‍ବାତାନ୍‌, 28 ✝୫:୨୮ ମାତିଉ ୨୭:୨୫."ଇୟା ଲୋକ୍‌ତି ଦର୍‌ତାନ୍‌ ଇନି ସିକିୟା ସିଇ ଉଣ୍ତିଙ୍ଗ୍‌ ମାପ୍‌ ଡାଟ୍‍ ଆଦେସ୍‌ ସିତାମାର୍ହାପ୍‍, ମାତର୍‌ ସୁଡ଼୍‍ଦୁ, ମିର୍‌ ଇନିକା କିତିମାନିଦେର୍‍ ! ଜିରୁସାଲାମ୍‌ତି ୱିଜୁତରିନ୍‍ ମିର୍‌ ଇୟା ସିକିୟା ପ୍ରଚାର୍‌ କିତିମାନିଦେର୍‍ ମାରି ୱାନି ନେତେର୍‌ ଉଣ୍ତିଙ୍ଗ୍‌ ମିର୍‌ ମାଙ୍ଗିଁ ଦସ୍‌ କିଦେଙ୍ଗ୍‌ ସେସ୍ଟା କିଜିନିଦେର୍‌ !"

29 ପିତର୍‌ ନି ଆଇ ସିସୁର୍‍ ଇର୍ହାର୍‌, "ମାପ୍‌ ମାପୁରୁଙ୍ଗୁଁ ମାନାନିକା ନେଗେତ୍‌, ଲୋକାଙ୍ଗ୍‌ ସିଲେ । 30 ମିର୍‌ ଜିସୁଙ୍ଗୁଁ କ୍ରୁସଦୁ କୁଟିଙ୍ଗ୍‍ ଡାକ୍‍ସିସାପିସ୍‍ତି ୱେନ୍‌କା, ମା ଡକ୍ରାଦାଦାରି ମାପୁରୁ, ଜିସୁଙ୍ଗୁଁ ସାତିମାଣାନ୍‌ ମାରିଡ଼େସି ନିକ୍‍ତାମାନାନ୍‍ । 31 ଇସ୍ରାଏଲ୍‌ତି ଲୋକାଙ୍ଗ୍‌ ଏତ୍‌କିଜି ମନ୍‌ତିଙ୍ଗ୍‌ ଡ଼େପିସ୍‌ ପାପ୍‌ କେମା ପୟ୍‍ନି ସୁଜୋଗ ସିନି ଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ନେତା ନି ରକିୟାକର୍ତା ୱାଜା ନିକ୍‍ତାମାନାନ୍‍ ମାରି ୱାନି ଉଣେରି ତରିନ୍‌ ଇଟ୍‌ତାମାନାନ୍‌ । 32 ମାପ୍‌ ଇୟାୱିଜୁ ବିସୟ୍‌ତି ସାକି । ମାରି ଏମେ ପବିତ୍ର ଆତ୍ମାଦିଙ୍ଗ୍‍ ମାପୁରୁ ୱାନି ମାନାନିୱାରିଙ୍ଗ୍‍ ଦାନ୍‌ ସିତାମାନାନ୍‌, ୱାନ୍‌ ବା ତେନିସାକି ।"

33 ପେରିମିଟିଙ୍ଗ୍‍ତି ଲୋକୁ ଇୟା ମାଟା ୱେନ୍‌ଜି ନିସା ରିସା ଆତାର୍‌ ଜେ, ୱାର୍‌ ସିସୁରିଙ୍ଗ୍‌ ଡାକ୍‌ତେଙ୍ଗ୍‍ଁ ବଦା କିତାର୍‍ । 34 ମାତର୍‌ ୱାରି ଲୋଇ ଗମଲିଏଲ ଦର୍‌ତି ଅରେନ୍‌ ପେରି ପାରୁସି ଦାର୍ମୁଗୁରୁ ପେରିମିଟିଙ୍ଗ୍‍ତୁ ନିଲ୍‍ସି ପ୍ରେରିତ ସିସୁରିଙ୍ଗ୍‌ ଆତ୍ରେ ଅତେଙ୍ଗ୍‌ ଇଜି ଆଦେସ୍‌ ସିତାନ୍‌, 35 ପେରିମିଟିଙ୍ଗ୍‍ତି ଲୋକାଙ୍ଗ୍‌ ଇର୍ହାନ୍‌, "ଇସ୍ରାଏଲ୍‌ତି ଲୋକୁ, ଇୟା ଲୋକାଙ୍ଗ୍‌ ଉଣ୍ତିଙ୍ଗ୍‌ ଆମାକା କିଦେଙ୍ଗ୍‌ ସଲ୍‍ସିନିଦେର୍‍, ଅଡ଼ପ୍‌ ଜାଗାର୍‍ତାଦାନ୍‍ କିନିଦେର୍‍ । 36 ମି ମନ୍‌ତୁ ତେବାତାତ୍‍, ଏସ ସମୟ ଆଗ୍‌ଡ଼ି ତିହୁଦା ନିଜେଦିଙ୍ଗ୍‍ ଅରେନ୍‌ ପେରିଲୋକ୍‍ ଇଜି ଇର୍ହାନ୍‌, ମାରି ପାକାପାକି ଚାରିସ ଲୋକୁ ୱାନି ୱାଲେ ମିସାତାମାର୍ହାର; ମାତର୍‌ ୱାନ୍‌ ସାତାନ୍‍, ୱାନି ୱାଲେ ବୁଲାନିକାର୍‍ ଇନିଙ୍ଗାଁ ଆନିଙ୍ଗାଁ ଆତାର୍‌ ମାରି ୱାନି ଦଲ୍‌ ମାର୍‍ଗିତା ସର୍ହାତ୍‍ । 37 ତାନିୱେନ୍‍କା ଲୋକୁ ଲେକିସ୍‍ନି ୱେଡ଼ାଦୁ ଗାଲିଲିଦୁ ଜିହୁଦା ଦର୍‌ତି ମାରି ଅରେନ୍‌ ୱାତାନ୍‌, ୱାନ୍‌ ବା ନାଣ୍ତ ଲୋକାଙ୍ଗ୍‌ ୱାନି ଦଲ୍‍ତୁ ମିସାକିତାନ୍‌ । ମାତର୍‌ ୱାନ୍‌ ବା ସାତାନ୍‍ ମାରି ୱାନି ୱାଲେ ବୁଲାନିକାର୍‍ ଇନିଙ୍ଗାଁ ଆନିଙ୍ଗାଁ ଆତାର୍‌ । 38 ଆବେଟ୍‌ ଇୟା ବିସୟ୍‌ତାନ୍‌ ଇୟା ଲୋକା ବିରଦ୍‌ତାନ୍‌ ଇନି ପାଣି କିଇ ଉଣ୍ତିଙ୍ଗ୍‌ ନାନ୍ ମାଟା ସିଜିନା । ୱାରି ବିସୟ୍‌ତାନ୍‌ ମନ୍‍ ସିମାଟ୍‍ । ୱାରି ଉପାୟ୍ ନି ପାଣିଦି ସନିକା ଜଦି ଲୋକା ମାଣ୍‌କୁ ଆନାମାନାତ୍‍, ଆରିଙ୍ଗ୍‌ ତାନି ବିସୟ୍‌ ମାର୍‍ଗ୍‍ନାତ୍‍ । 39 ମାତର୍‌ ଜଦି ଆକା ମାପୁରୁ ମାଣ୍‌କୁ ଆନାମାନାତ୍‍, ଆରିଙ୍ଗ୍‌ ୱାରିଙ୍ଗ୍‌ ଆରାକିନିକା ମି ଉସାସ୍‌ ସିଲେ । ଆନାତ୍‌ ତରାନାତ୍‍ ଜେ ମିର୍‌ ମାପୁରୁ ବିରଦ୍‌ତାନ୍‌ ଜୁଦ୍‍ କିତିମାନିଦେର୍‍ ।"

ପେରିମିଟିଙ୍ଗ୍‌ ଲୋକୁ ଗମଲିଏଲ୍‍ତି ମାଟା ମାନାତାର୍‍ । 40 ୱାର୍‌ ପ୍ରେରିତ ସିସୁରିଙ୍ଗ୍‌ ଲୋଇ କୁକ୍‌ସି, ୱାରିଙ୍ଗ୍‌ କର୍‍ଡା ଡାକିସ୍‍କିତାର୍‍ ମାରି ଜିସୁଦି ଦର୍‌ତାନ୍‌ ଇନି ମାଟା ଇନ୍‌ଇ ଉଣ୍ତିଙ୍ଗ୍‌ ଆଦେସ୍‌ ସିଜି ଡ଼ିସ୍‍ତା ସିତାର୍‍ । 41 ପ୍ରେରିତ ସିସୁର୍‍ ୱେଡ଼ିକାଦାନ୍‌ ପେରିମିଟିଙ୍ଗ୍‍ତାନ୍‍ ସତାସର୍‌ର୍ହାର୍‌, ଇରିଙ୍ଗ୍‌ ମାପୁରୁଦି ଆଗ୍‌ଡ଼ି ୱାର୍‌ ଜିସୁ ଉଣ୍ତିଙ୍ଗ୍‌ ଅପମାନ୍‍ ପୟ୍‌ଦେଙ୍ଗ୍‌ ଇଜି ଜଗ୍‌ ଅଡ଼ବିତା ମାର୍ହାର୍‍ । 42 ମାରି ୱାର୍‌ ଦିନାମି ମନ୍ଦିର୍‌ତୁ ମାରି ଲୋକା ଇଲ୍‍କାଙ୍ଗ୍‍ଁ ମସିହ ଜିସୁଦି ବିସୟ୍‌ତାନ୍‌ ନେଗିକାବୁର୍‌ ପ୍ରଚାର୍‌ କିତାର୍‍ ମାରି ସିକିୟା ସିଦେଙ୍ଗ୍‍ ଆସ୍‌ତାର୍‌ ।