1 Kubva kuna Phawuli, mpositoli waKhirisitu Yesu ngekuda kweNdzimu, naThimothi gamu ledu.

Kugubungano leNdzimu likuKhorinte, nekubayengemali bose bamuntunhu wose we Akhayiya.

2 Ngoni nekunyalala kunobva kuNdzimu tate bedu naHe Yesu Khirisitu ngakube kumuli.

3 Ngaalumbidziwe Ndzimu, Tate baHe wedu Yesu Khirisitu, Tate bemawhilangoni ibo bali Ndzimu wekuludzila kose, 4 banotinyaladza mumagwadzo edu ose, kuyetila kuti titubule nyaladza ibabo bamumagwadzo kene api zwayo, nenyaladza iswi tjekwedu kwatinonyaladziwa ndiko neNdzimu. 5 Ngobe saku tidziyidzika kan'ompela naKhirisitu mukudziyidzika kukwe kunjinji, muna Khirisitu tina kunyaladziwa kunjinji kakale bo. 6 Hapa iswi tidziyidziwa, ndekwenyaladziwa netjidziwa kwenyu; hapa tinyaladziwa, ndekwenyaladziwa kwenyu, kwamunowana hapa mudzikitidza nemoyonlefu muli mukudziyidzika kwatinodziyidziwa bo. 7 Kumugalabgwe kwedu akutozunguzika; ngobe toziba kuti saku muli mukudziyidzika kan'ompela naswi, mowhonyaladziwa kan'ompela naswi.

8 Atitohaka kuti musizibe, makamu, nekwedziyidzika kwatakabenako mu Asiya; kwaka kuli kunjisa, kuli pehhugwi kwemasimba edu, kuswikila tatoboka igo butjilo tjekwago. 9 Lebeswa, takatozwiwha tawamutjila ntongo welufu; koga ikoku kwaka kuwhoyeta kuti tisibhatilile mukutubula kwedu koga tibhatilile kuNdzimu unomusa bafi; 10 wakatibvubula mumboli yakabangalala yelufu, kakale unowhotitjidza; tegalabgwe muwunli kuti unowhotitjidza kakale, 11 sekwamunotibhatsha nemitembezelo. Ndizo banjinji banowhotibokela makombolelo atakapiwa kuli handugwa kwemitembezelo yebanji.

12 Zwiloba fuba kwedu ndiwhoku. Busupi gwehana dzedu kuti takazwibhata nekuyengemala nehalabvuka kunobva kuNdzimu muhango, kwazo kwazo mbeli kwenyu, kusi ngebutjenjebvu gwemuhango koga ngengoni dzeNdzimu. 13 Ngobe tomukwalila tjamungabala mukawhisisa tjoga; ndogalabgwe mowhowhisisa nekuhhele, 14 semamuwhisisa nyana kuti mungazwikudza nekwedu sayikoku naswi bo tingazwikudza nekwenyu, muhhuba laHe Yesu.

15 Ngentha yekuti ndaka ndina lebeswa nayikoku, ndaka ndihaka buya kumuli kutanga, kuyetila kuti mube nemakombolelo akapamhiwa kabili; 16 ndaka ndihaka mukumba nditjimugwendo gweyenda kuMakhedoniya, nepinda kumuli kakale ndebva kuMakhedoniya kudze mundipeleke kuJudiya. 17 Kuti nkumbulo wangu waka usigedzikene pandakandihaka thama ikoku? Kene kuti ndobaakanya ndongoloso dzangu senhu wamuno muhango, ndakalulamila kuti "Ee, ee" na "Aa, aa" lubaka igo zwago? 18 Koga seNdzimu egalikabgwe, dama ledu kumuli alizoba "Ee" na "Aa." 19 Ngobe Nkololo weNdzimu, Yesu Khirisitu, iye watakasumikila kumuli, imi naSilivenasi naThimothi, waka asi "Ee" na "Aa," koga muwunli kogala kuli "Ee." 20 Ngobe zose zwigadzabgwe zweNdzimu zowana "Ee" wazo muwunli. Ndizo tileba titi Ngekusingapele Kose Akujalo muzina lile, tikudza Ndzimu. 21 Koga ndiNdzimu unotita iswi namwi kuti tibe muna Khirisitu takasima, kakale wakatihhodza; 22 wakatisa lutjayo gugwe kakale wakatipa Meya iye mumimoyo yedu, setjigadzabgwe tjezwinhu zwinowhohha.

23 Koga ndodana Ndzimu kuti abe nsupi wangu-sahha kwangu kuKhorinte kwaka kuli zila yemutjengeta. 24 Kusi kuti tolawula galamoyo kwenyu; tohinga namwi tihingila hanha kwenyu, ngobe mumile makasima mukugalamoyo kwenyu.