1 Makamu, tohaka kuti muzibe nekwengoni dzeNdzimu dzakalakidziwa mumakubungano ekuMakhedoniya, 2 ngobe mukulikwa kwedziyidzika kukulu, hanha kwabo kunjinji kwakata kuti bakobane bakasununguka nenguba bakabe bali bahayi basina tjabo. 3 Ndopa busupi kuti bakapa kunoyendidzana newana kwabo, nekupehhugwi kwewana kwabo, sekuda kwabo, 4 beti kumbilisisa nemoyo wabo wose kuti babe neluboko bo mukubhatsha bayengemali. 5 Ikoku taka tisakakulingilila kubva kubali, koga kutanga bakazwipila kuna He kose nekutili ngekuda kweNdzimu. 6 Ndizo ke tatjikumbila Thayithasi kuti saku agala atjitangisa, wakafanila pedzisa n'hingo mbuya iwhoyu, wengoni, pakati kwenyu. 7 Sangwenu muthama zwakanaka kwazo muzwinhu zose-mubugalimoyo, mukulebeleka, muluzibo, mukuzwipila kwakapelela, nemuludo gwamakadiyika kubva kutili-bonani kuti mothama zwakanaka bo mun'hingo mbuya iwhoyu.

8 Anditoleba ikoku senlayo, koga ndohaka bona kuti kene ludo gwenyu bo ndegwelebeswa negufananidza nezwipila kwebamwe. 9 Ngobe moziba ngoni dzaHe wedu Yesu Khirisitu, kuti nekutobe waka akafuma, koga nentha yenyu wakaba n'hayi, kuyetila kuti ngebuhayi gugwe mungafuma.

10 Mundebo iyeyi ndomupa mano. Kuhine kuti ngwenuwali mufidze tjamakatangisa thama makenyi. Ndimwi makaba bekutanga kuthama, kusi thama koga, koga kose neyemula kuthama, 11 kuyetila kuti yemula kwenyu kungalizanyisiwa nepedza n'hingo, kuyendidzana newana kwenyu. 12 Ngobe hapa zwipila kuliyapo, kowamutjilika kuyendidzana nenhu tjaanatjo, kusingayendidzane netjaasina.

13 Anditobva kuti bamwe balelusegwe imwi mulemesegwe, koga kuti kube nelizana. 14 Imwi kwamunako ngwenuwali kunjinji kubawahhe muna zwabanohaya, kudze kwabanako kunjinji limwe hhuba kumuwahhe bo muna zwamunohaya, kuyetila kuti kube nekulizana. 15 Sekwakwaka kwagwa, "Iwhoyo wakakubunganya kunjinji haana kunjisa, newakakubunganya kuhomanana haatotayila."

16 Koga Ndzimu ngaabokewe, iye unolonga ludo igo zwago gumundili gwemubhatsha, mumoyo waThayithasi. 17 Ngobe haazongowamutjila wunkulumbidza kwedu koga, koga nekuzwipila kukwe unobuya kumuli tjekukwe. 18 Totuma kan'ompela naye limwe gamu ledu linozibgwa kwazo mumakubungano ose ngesumikila ndebo mbuya kwalo; 19 kusi ikokuya koga, koga wahagwa ngemakubungano kuti ayende naswi mun'hingo wengoni iwhoyu watinoyendilambeli nawo, kudze tilayidze gudzo laHe nelayidza zwipila kwedu bhatsha.

20 Tohaka kuti kusibe nenhu unotibona nlandu nekwezila yatinobhata nayo itjetji tjipo tjikulu, 21 ngobe tozwipila thama tjinhu tjinolumbidzika kusi mbeli kwaHe koga, koga nambeli kwebanhu.

22 Kan'ompela nabo totuma umwe nghalimoyo watakalika kanjinji tikawana akazwipila mumihingo minjinji, koga ke ngwenu watjizwipila kupinda kutanga ngentha yemugalabgwe kukwe kukulu. 23 Thayithasi unkwinya wangu wandinohanganyila naye kakale tohinga tose mun'hingo wenyu; hawa makamu edu batumwa bemakubungano ebagalimoyo, banoyeta Khirisitu akakudziwa. 24 Ndizo ke ipani busupi, kumakubungano, gweludo gwenyu nezwida kwedu namwi kubalume ibaba.