1 Ndoyemula kuti mundiyetile moyonlefu mubulengwe gwangu gutikinini. Mundiyetile moyonlefu! 2 Ndowha ndimubinda kwazo, binda kweNdzimu, ngobe ndakamupa kuna Khirisitu ndimuyendisa senlongo wakapelela kunlume uwe un'ompela. 3 Koga ndohlila kuti saku nyoka yakatjengela Eva ngebupitipiti gwayo, mikumbulo yenyu inowhopambuka kubva mukuzwipila kuna Khirisitu kwakatjena. 4 Ngobe hapa umwe nhu ebuya esumikila nekwewumwe Yesu usi watakasumikila nekukwe, kene hapa muwamutjila meya yakasiyana neyamakawamutjila, kene hapa mubvuma imwe ndebo mbuya yakasiyana neyamakabvuma, mobva mazwipila kuyili.

5 Ndokumbula kuti andita ndili ntukunu kene nayipi zila kubapositoli ibabo banoyi bakulukulu. 6 Nekutobe ndisinyambi mukulebeleka, koga ndinaluzibo; ikoku takuthama kukaba patjena kumuli, nezila dzose, muzwinhu zose.

7 Ndingaba ndakatjinya kuti ndizwise pasi kuyetila kuti imwi mukudziwe, ngobe ndakasumikila ndebo mbuya yeNdzimu mpho kumuli? 8 Ndakatjebela amwe makubungano ngewamutjila wahha kwabo kuti nditubule hingila imwi. 9 Kakale patakatilitoseni ndina tjandinohaka, akuna wandakatilika bulemo, ngobe zwandakandihaka ndakazwipiwa nebagalimoyo bakabva kuMakhedoniya. Ndizo andizobantolo kumuli kene nayipi zila, nemulubaka gunohha anditowhoba ntolo kumuli. 10 Selebeswa laKhirisitu lili mundili wali, ikoku zwiloba fuba kwangu akuna angakumisa mumitunhu ye Akhayiya. 11 Ngentha yeni? Kungentha yekuti anditomuda? Ndzimu unoziba kuti ndomuda!

12 Tjandinothama ndowhoyendilambeli nditjithama, kuyetila lengudza ibabo banoti, mun'hingo wabo wezwikudza, banohinga nezila yatinohinga nayo. 13 Ngobe ibabo balume ba bapositoli bemanyepwa, bahingi banotjebela, banozwithama bapositoli baKhirisitu. 14 Akutotjenamisa, ngobe nayiye Satane unozwisumbika akazwithama ntumwa weNdzimu wetjedza. 15 Ndizo akutokaabadza hapa balanda babe bezwisumbika bo bezwithama balanda bendulamo. Bhelelo labo lowhoba tjakalizanila zwiyeto zwabo.

16 Ndopamha, kusibe ne unondibona bulengwe; koga hapa mundibona sayikoku, mundiwamutjile setjilengwe, kuyetila kuti nami bo ndizwikudze nyana bo. 17 Tjandinoleba anditotjileba nesimba laHe, koga ndotjileba setjilengwe, mukuzwikudza ikoku; 18 saku banhu banjinji bezwiloba fuba nekwezwinhu zwehango, nami bo ndowhozwiloba fuba. 19 Ngobe moyetila zwilengwe moyonlefu makahanha, nekutobe imwi tjekwenyu makatjenjela! 20 Mosimidzila hapa nhu emuthama balanda, kene emugwisa, kene emutshambidzila, kene emulingila pasi, kene emupwawhula. 21 Ndina honi leba kuti takatisina masimba, takakon'wa thama zwinhu izwezo!

Koga kene ini umwe nhu tjaanozwikudza nditjo, ndolebeleka setjilengwe, nami bo ndingazwikudza nditjo. 22 Ibo BaHhebheru? Nami bo ndiNhhebheru. Ibo maIsirayeli? Nami bo ndi Isirayeli. Batjizekugwana tja Abhurahhamu? Namibo ndi itjo. 23 Babahingi baKhirisitu? Ndolebeleka sempengo-koga ndin'hingi uhine-ndakahinga mihingo minjinji kwazo, ndakaba nsungwa kanjinji kwazo, ndikalobgwa kunjisasa, agwisa fa kanjisa. 24 Kwatjibe kahanu ndisukutigwa nemaJuta hamu dzili makumi matatu anahhanalume. 25 Ndakabumbugwa nemakombo kwatjiba katatu; ndakakhikitidziwa nemabgwe kan'ompela. Ndakapalaligwa nekepe katatu; ndaka angama mugungwa siku nesikati kan'ompela. 26 Ndandigala ndinanjendo, ndiba mumboli yenjizi, mboli yegwisiwa nembobola, mboli yegwisiwa nebanhu bakanyi kwangu, mboli yegwisiwa neBataya, mboli munzi-nkulu, mboli mutjilambanyika, mboli mugungwa, mboli yegwisiwa nebagalimoyo bemanyepwa; 27 ndahinga zwinolema, kanjinji ndisingayizele busiku ndakayila zodliwa kakale ndina nyota, mulubaka gunjinji ndisina zodliwa, ndipota ndakati piti. 28 Kakale, ndisingabale zwimwe zwinhu, kuna ntolo wemahhuba ose upehhugwi kwangu, wedziyidzika kwangu nekwemakubungano ose. 29 Ndiyani usakasima, nami bo andita ndisakasima? Ndiyani wayetiwa kuti awile mujinyo, imi andina buyendasi?

30 Hapa ndingazwiloba fuba, ndowhozwiloba fuba nekwezwinhu zwinolayidza sasima kwangu. 31 Ndzimu Tate baHe Yesu, ibo bakakombolegwa nekusingapele, banoziba kuti anditonyepa. 32 KuDamasikasi, mbhati wentunhu upasi kwaMambo Aretasi wakabiga balindi munzi-nkulu weDamasikasi kuyetila kuti andisunge, 33 koga ndakadelusigwa kuhhe ngehuli imuguma ndili mutundu, akasandibhata.