1 Imi, Phawuli, ndomukumbila tjekwangu, ngekuzwitebamisa nemazwibhato aKhirisitu, imi wakatebama hapa ndakalingana namwi, koga ndili nkukutu hapa ndili kule namwi! 2 Ndomukumbilisisa kuti hapa ndili pakati kwenyu kusihakike kuti ndilayidze bukukutu nekuzwigalabgwe sekwandakalingilila lakidza bamwe banhu banokumbulila kuti totjila butjilo gwehango ino. 3 Ngobe nekutoba titjila muhango, koga atitogwa ngwa sekunoyetiwa nebanhu benyama, 4 ngobe zwigo zwengwa yedu ate zwemuhango koga ndezweNdzimu zwina masimba ekolomola pakasima. 5 Tokolomola kakabadzana nemikumbulo yezwikudza yose inogwisana nezibgwa kweNdzimu, wose nkumbulo towunta ntapwa kuti ube nemazwibhato kuna Khirisitu, 6 hapa mazwibhato enyu apelela, towhoba takalulamila langa kose saba nemazwibhato.

7 Lingani tjimbeli kwemeho enyu. Hapa kuna unozwigalabgwe kuti ndewaKhirisitu, ngaazwikumbudze kuti saku iye eli waKhirisitu, naswibo tibaKhirisitu. 8 Andina honi, nenguba ndizwiloba fuba kwazo nyana nekwemasimba edu, atakapiwa naHe kuti timubake asi ekuti timupaladze. 9 Anditohaka kuti ndinge ndinomuhlisidzila newhalo. 10 Ngobe banoti, "Whalo dzidze dzolema kakale dzakasima, koga iye tjekukwe hapa alipano unlelulelu, netjaanoleba atjitogala tjawhakala." 11 Ibabo banhu bakajalo ngabazibe kuti tjatinoleba ngelukwalo tisipo, nditjo tjatinothama hapa tilipo.

12 Atitoyedza zwilizanyisa kene zwifananisa nebamwe bayibabo banozwikudza. Koga hapa bezwilizanyisa nebamwe babo, kakale bezwifananisa nebamwe babo, kobva kuti abatowhisisa. 13 Koga atitowhozwikudza kupinda tjilizanyo, koga towhozwikudza kunoyendidzana netjilizanyo tjatakapiwa neNdzimu, kudze tiswikilile nekumuli. 14 Ngobe atitopindilila, sekunoyi atizoswika kumuli; takaba bekutanga buya kumuli nendebo mbuya dzaKhirisitu. 15 Atitozwikudza kunopinda tjiyelo tjedu, tizwikudza nemihingo yebamwe balume; koga togalabgwe kuti hapa galamoyo kwenyu kukula, n'hingo wedu pakati kwenyu unowhokula kwazo, kuyendidzana neyelegwa kwedu neNdzimu 16 kudze tisumikile ndebo mbuya kuhango dzikule, mbeli kweyenyu, tisingazwilobe fuba ngemihingo yatjiyetiwa muminda yewumwe nhu.

17 ✝ "Unozwikudza, ngaazwikudze ali muna He." 18 Ngobe nhu unowamutjigwa ata unozwimilidza, koga nhu unowamutjigwa ndewamilidziwa naHe.