1 Saku wali tina zwigadzabgwe izwezwi, badikani, atizwitjenapadzeni muna kose kunosa mbili nemeya hambgwa, tizwiyengemadze mukuhla Ndzimu.

2 Mutihhulile mimoyo yenyu; akuna watatjinyila, akuna watatjinya nkumbulo, akuna watatjebela. 3 Anditoleba ikoku kuyetila muwana nlandu, ngobe ndakatongokuleba kuti mumumimoyo yedu, tofa toseni kakale totjila toseni. 4 Ndomugalabgwe kwazo; ndozwida kwazo nekwenyu; ndihhele nyaladzika. Mukudziyidzika kwedu kose, ndihhele hanha.

5 Kene patakaswika kuMakhedoniya, mibili yedu ayizotongowana kunyaluluka koga takadziyidzika nezila dzose-kuhhe kwedu tigwa mukati kwedu tihla. 6 Koga Ndzimu, iye unonyaladza bakapaluka moyo, wakatinyaladza ngebuya kwaThayithasi, 7 kusi ngebuya kukwe koga, koga kose ngenyaladzika kwaakawamutjila kubva kumuli, sekwaakatibudza ndihuba kwenyu, ndilila kwenyu, neda ndibona kwenyu, kwakata ahanha kwazo.

8 Nekutobe ndakamuta mukaba nebuyendasi nelukwalo gwangu, anditozwisola, nenguba ndakazwisola, ngobe ndobona kuti lukwalo igoguya gwakamuwhisa zogwadza, koga kwakaba kwelubaka nyana. 9 Sangwenu, ndohanha, kusi ngentha yekuti makawha zogwadza, koga ngobe wha zogwadza kwakamuta mukahanduka; makawha zogwadza kunobva kuNdzimu, kudze musilahikigwe netjimwe ngentha yedu. 10 Ngobe wha zogwadza kunobva kuNdzimu kota nhu akahanduka, handuka kota nhu akatjidziwa, iko kunohhisa sazwisola, koga wha zogwadza kwemuhango kohhisa lufu. 11 Lingani kuti ikoku wha zogwadza kunobva kuNdzimu kwathama mukazwipila kungapani. Zwipila layidza kuti amuna nlandu, gwadziwa moyo kungapa, musa zebe kungapa, huba kungapa, zwipila kungapa, bgwilizila kungapa! Mutjimwe netjimwe tjayeyi ndebo mazwilayidza kuti amuna nlandu.

12 Nekutobe ndakamukwalila, kwakaba kusi kuti kungentha yewatjinya, kene watjinyigwa, koga kudze zwipila kwenyu kutili kuzumbunugwe kumuli mbeli kweNdzimu. 13 Ndizo ke takanyaladzika.

Kakale pehhugwi kwenyaladzika kwedu takahanha kwazo ngentha yehanha kwaThayithasi, ngobe moseni makata nkumbulo uwe ukanyaluluka. 14 Ngobe hapa ndakalayidza zwida kwangu nekwenyu kuwunli, andizotongobhakhwa nehoni; koga ngobe kose kwatakaleba nekwenyu kwaka kuli lebeswa, ndizo zwiloba fuba kwedu mbeli kwaThayithasi nekwenyu kwalayidza kuti kumalebeswa. 15 Neludo gugwe kumuli gokula, hapa ekumbula mazwibhato enyu mose, nezila yamakawuwamutjila nayo muhla, mutetema. 16 Ndohanha, ngobe ndina kugalabgwe kwakapelela mumuli.