1 Ngwenu ndekwebutatu ndibuya kumuli. Imwe neyimwe ndebo yakafanila kuti ibe nebusupi gunobva kubasupi babili kene batatu. 2 Ndakabatjemela ibabo bakatjinya mumahhuba akapinda kose nebamwe bose, kakale ndobatjemela ngwenuwali ndisipo pabali, sekwandakabatjemela ndilipo pandakakumba gwebubili, kuti hapa ndingabuya kakale anditowhobaletja, 3 saku muhaka busupi kuti Khirisitu unolebeleka mundili. Akuta kuli kuti haana masimba elingisana namwi, koga unamasimba pakati kwenyu. 4 Ngobe wakakowhomegwa mukusasima, koga unotjila ngemasimba eNdzimu. Ngobe atizosima muwunli, koga mukuhingidzana namwi towhotjila naye ngemasimba eNdzimu.

5 Muzwilingisise, kudze mubone kuti kene makabhatilila mukugalamoyo kwenyu. Muzwiholesese. Amutobona kuti Yesu Khirisitu umumuli? Kuhhe kwekuti mukon'wa gutsha holeseso! 6 Ndogalabgwe mowhobona kuti atizokon'wa. 7 Koga totembezela kuNdzimu kuti musiyete tjisaka tambunuka, kusi kuti banhu babone kuti iswi tagutsha holeseso, koga kuyetila kuti imwi muyete tjakatambunuka, nekutobe tingangatakon'wa. 8 Ngobe akuna tjatingathama tileyana nelebeswa, koga tohingila lebeswa. 9 Tohanha hapa iswi tisakasima, koga imwi makasima. Tjatinotembezelela whuti mukule kwakapelela. 10 Ndokwala ikoku nditjikule namwi, kuyetila kuti pandinobuya ndisibe nkukutu pakuhingisa kwangu simba He labakandipa lebaka lisi lepaladza.

11 Tjebupelo, makamu, hanhani. Tambunudzani zila dzenyu, whililani tjikumbilo tjangu*, umwe akuludzile umwe, galisanani nekunyalala, Ndzimu weludo nekunyalala unowhoba namwi.

12 Lezwanani neputa* kwakayengemala.

Bose bayengemali banomubuyisa. 13 Ngoni dzaHe Yesu Khirisitu neludo gweNdzimu nehanganyila kweMeya Yakayengemala akube namwi mose. 14 Akujalo.