1 Ntolo Ndzimu wakalebeleka nabobatategulu bedu, lubaka gunjinji nangezila dzakasiyana ehingisa balebesambeli, 2 koga mumahhuba ano ebupelo watjilebeleka neswi ehingisa Nkololo uwe, iye waakagadza kuti abenghalinhaka wezwinhu zose, kakale wakabumba hango ehingisa iye. 3 Unolakidza gudzo leNdzimu, kakale utjiso tjitje, wakabhata zwinhu zose nedama lile linamasimba. Hule kwesuka matjinyo, wakagala kuludli gwa iye Wemasimba ose upehhugwi.

4 Wakayetewa akaba nkulu pehhugwi kwebatumwa bekudzimu, ngobe zina laakawana igulugulu kwazo kupinda lebatumwa beNdzimu. 5 Ngobe ndiwupi ntumwa wekudzimu, wakatongoyi neNdzimu

"Iwe uNkololo wangu;

nasi ndabe Tate babo,"

Kakale,

"Ndowhoba Tate babe

iye unowhoba Nkololo wangu."

6 Kakale ipapo ehhisa mbano iye muhango unoti,

"Batumwa bose beNdzimu ngabawunamate."

7 Nekwebatumwa unoti,

"Unothama batumwa babe bakabe mhepo,

nebalanda babe unobathama bakabe bibi lemoto."

8 Koga nekweNkololo unoti,

"Tjigalo tjenyu tjeBumambo imwi Ndzimu tjiyapo nekusingapele,

swimbo yekululama ndiyoswimbo yebumambo gwenyu.

9 Makada kululama, mukabenga bubi.

Ndizo ke Ndzimu, iye Ndzimu wenyu wakamuhhodza nemafuta ekuhanha

kupinda bakwinya benyu."

10 Kakale unoti,

"Imwi He pakutanga ndimwi makabumba hango,

nekudzimu un'hingo wemaboko enyu.

11 Kowhopalala, koga imwi mowhosala mulipo nekusingapele,

kose kowhohakala setjiyambalo.

12 Mowhokupeta sejila,

kowhobigwa ntome setjiyambalo tjisingatjambagwe,

koga imwi mogala makajalo

makole enyu atowhopela."

13 Ndiwupi ntumwa waka tongoyi neNdzimu,

"Iwe gala kuluboko gwangu gweludli,

kudzina ndayeta zwita zwizo

tjigalo tjemakumbo awo"?

14 Ngono batumwa bose abatameya dzinohingila Ndzimu, edzituma kuti dzibhatshe ibabo banowhowamutjila tjidziwa?