1 Bugalimoyo whuba nelebeswa kuti zwinhu zwatakalingilila kuti zwiyetike zowhoyetika, whugalabgwe muzwinhu zwisingabon'we nemeho. 2 Ngentha yeba nekugalamoyo banhu bantolo bakawamutjila lebgwa zwakanaka kwakayengemala.

3 Ngegalamoyo tokuwhisisa kuti hango yakabumbiwa ngedama leNdzimu, kuyetila kuti zwinhu zwinobon'wa nemeho zwakabumbiwa zwibva muzwinhu zwisingabon'we.

4 Ngebugalimoyo Abheli wakapila kuNdzimu tjibhayilo tjinowamutjilika kupinda tjaKhayini. Ngekugalamoyo ikoku waka lebgwa zwakanaka kuti wakalulama, Ndzimu epa busupi ngewamutjila zwipo zwizwe; iye wakafa, koga ngegalamoyo kukwe utjalebeleka nanasi.

5 Ngekugalamoyo Inoki wakatogwa akayenda pehhugwi kuyetila kuti asilabile lufu. "Azotongowanika, ngobe wakatogwa neNdzimu." Asanhu akatogwa, kwakaba nebusupi gunoti waka ehanhisa Ndzimu. 6 Pasina bugalimoyo akutotubulika hanhisa Ndzimu. Ngobe kene yani zwe unohaka sedzela kuNdzimu unofanila galamoyo kuti Ndzimu uyapo, kakale kuti unopa mbhayilo ibabo banowun'haka.

7 Ngekugalamoyo Nowa wakati atjenjedzewa neNdzimu nekwezwinhu zwinowhohha mulubaka gunohha esanhu ekazwibona, wakawhilila akabaakanya kepe eyetila tjidza n'ha uwe wose; nethama ikoku wakawana hango nlandu, akaba nghalinhaka yendulamo inohha ngekugalamoyo.

8 Ngekugalamoyo Abhurahhamu wakawhilila paakabudziwa kuti ayende kuhango yaaka ewhowamutjila senhaka, wakayenda koga asingazibe kuti unoyenda poni. 9 Ngekugalamoyo wakanogala muhango yaaka akagadziwabgwe sentaya, wakagala mumajatja naIsaka naJakobe bagalinhaka kan'ompela naye betjigadzabgwe itjo zwatjo. 10 Ngobe waka akalindila nzi-nkulu unambviwa, wakabambiwa ukabakiwa neNdzimu.

11 Ngekugalamoyo Sara tjekukwe wakawamutjila masimba ebhata mimba, nekene waka atjikwegula, kuyetiwa nekuti waka eti iwhoya wawumpa tjigadzabgwe unogalikamoyo. 12 Ndizo ke kubva kunlume un'ompela, waka enga nhu wakafazwe, kwakazwagwa zwizekugwana zwinjinji senyenyedzi dzikumakole, kakale zwili zwinjinji sensetje wegungwa usingabalike.

13 Bose ibaba bakafila mubugalimoyo, baka basanhu bakawamutjila zwakagadziwabgwe, koga bakabazwibona bakazwihanhila zwitjikulekule, kakale bakabvuma kuti ibo bataya kakale bahhi muhango. 14 Ngobe banhu banoleba zwinhu zwakajali, banokusa patjena kuti ibo banohaka yabo hango. 15 Hapa kuli kuti baka begala bekumbula hango iyeya yabakabva kuyili, banoba bakawana nkoba webgwilila kuyili. 16 Koga sekwakuli iko banohaka hango imbuya, kuleba kuti, hango yekudzimu. Ndizo ke Ndzimu haana honi kuti adan'we kuyi iye ndiye Ndzimu wabo, ngobe wababaakanyila nzi-nkulu.

17 Ngekugalamoyo Abhurahhamu paakaholesesewa, wakapila Isaka setjibhayilo. Iye waka awamutjila zwigadzabgwe, waka atjizwilulamisila kuti apile nkololo uwe un'ompela. 18 Nekene Ndzimu waka ati kuwunli, "Zwizekugwana zwawunowhoba nazo zowhobva munaIsaka." 19 Wakagalamoyo kuti Ndzimu waka etubula musa kene bafi, ndizo nedzimwe zila, wakawamutjila Isaka kakale amusiwa kubafi.

20 Ngekugalamoyo Isaka wakakombolela Jakobe naEsawu pehhugwi kwezwinhu zwinohha.

21 Ngekugalamoyo Jakobe abapedlo nefa wakakombolela bakololo baJosefa bose, enamata akanayila pehhugwi kweludozo gugwe.

22 Ngekugalamoyo Josefa wakati abapedlo nefa, wakaleba ngekwefuluka kwebaIsirayeli bebva kuIgipita akalaya kuti abiganyiwe tjini.

23 Ngekugalamoyo pakazwagwa Mozisi bazwadzi babe bakawusumbika kwemimwedzi mitatu, ngobe bakababona kuti waka eli mwana wakanaka kwazo; bakabesingahle tjuluka nlayo wamambo.

24 Ngekugalamoyo Mozisi wakati akula akalamba dan'wa eyi unkololo wenkololokadzi waFaro. 25 Wakahala bhakhwa zwakayipa panhu pan'ompela nebanhu beNdzimu, pana kuti azwihanhise nejinyo kwelubakanyana. 26 Wakakutola nezila inoti, bhakhwa zwakayipa udziyidziwa nentha yaKhirisitu, kuna tjilemela tjikulu kupinda fumwa yeIgipita, ngobe waka akalinga kumbhayilo unowhohha.

27 Whugalamoyo kwakayeta Mozisi akabva kuIgipita esigahle buhongola gwamambo, ngobe wakasimidzila sekunoyi unobona iwhoya usinga bon'we. 28 Ngekugalamoyo wakalondolodza Phasika akanyasa malopa, eyetila kuti Mpaladzi wembano asitongogala akunha mbano dzemaIsirayeli.

29 Ngekugalamoyo banhu bakatjuluka Gungwa Haba sekunoyi banoyenda pehhugwi kwemavu akawoma; koga maGipita pabakayedza thama bo sayikoko, bakasengwa negungwa.

30 Ngekugalamoyo makuma eJerikho akawa, hule kwepotelekwa kwemahhuba alikutondeka. 31 Ngekugalamoyo Rahhabhu fukula ngentha yekuti wakawamutjila zwakanaka whodzi aazobulawa panhu pan'ompela nebanhu baka besingawhilile.

32 Ndingaleba kumwe kupi? Ngobe lubaka gungahayika kuti ndilebe nekwaGidiyoni, naBharakhi, naSamusoni, naJefutha, naDavida, naSamuyeli nebalebesambeli. 33 Ibo bakati ngekugalamoyo, bakakunda bumambo, bakathama kuti kululama kubeyapo, bakawamutjila zwigadzabgwe, bakahhalila milomo yehumba, 34 bakadzima moto unopfuta, bakadzeta bhangatjeke, bakasimisiwa nengube baka bena bukuwa, bakasima mungwa, bakayeta kuti bagwi banjinji bebataya batihhe. 35 Banhu betjikadzi bakawamutjila makamu abo aka afa ngemusiwa kubafi.

Bamwe bakambumugwa belamba sunungugwa beyetila kuti bawane butjilo guhine hule kwemusiwa kubafi. 36 Bamwe bakakuwelegwa bakalobgwa kose nesungwa nemaketane, nehhaliligwa mumajele. 37 Bakaphobogwa nemabgwe, bakatjekewa bakapalugwa pakati, bakabulawa nebhangatjeke, bakadzungayila bakambala makukuta emhwizi neembudzi, besina kene tjabo, begwadzisiwa, bebhakhwa zwakayipa, 38 hango yaka isakabalizana, baka bedzungayila mugwenga, nemumatombo, bebgwata mumakuwhu, nemumimwina yapasi.

39 Bose ibaba nekene bakalebgwa zwakanaka ngentha yebugalimoyo gwabo koga abazowamutjila tjakagadziwabgwe. 40 Ngobe Ndzimu waka atjitibaakanyila kale tjimwe tjinhu tjihine kuti basitongothamiwa bakapelela basina iswi.