1 Ndizo ke hama dzangu dzakayengemala, imwi munagobe mukudan'wa kwekudzimu, mu alakane mpositoli nemphirisiti nkulu webugalimoyo gwedu, iye Yesu. 2 Waka akagalikamoyo kuna iwhoya wakawunghadza, saMozisi bo waka akagalikamoyo mun'umba yeNdzimu. 3 Yesu unobagwa kuti unagudzo kupinda Mozisi sembaki wen'umba ekudziwa kupinda n'umba yaakabaka. 4 Ngobe imwe neyimwe n'umba inobakiwa nenhu, koga mbaki wako kose ndiNdzimu. 5 Mozisi waka akagalikamoyo mun'umba yeNdzimu senlanda, epa busupi gwezwinhu zwaka zwiwholebgwa mulubaka gunohha. 6 Koga Khirisitu wakagalikamoyo kuti abe iye wakalinga mun'umba yeNdzimu senkololo. Naswi bo tin'umba iye, hapa tingabhatisisa mukuzwigalabgwe nezwida kunobva mukugalabgwe.

7 Ndizo ke seleba kweMeya Yakayengemala iti,

"Nasi hapa muwha whi lile,

8 musisimise mimoyo yenyu sekwakayetika mupanduka,

muhhuba lelikiwa mutjilambanyika,

9 bobatategulu benyu pabakandilika,

nekene bakabona mihingo yangu kwemakole ali makumi mana.

10 Ndizo ke tjizekugwana itjetjiya ndakatjigwadziligwa ndikabe nditi,

‘Banogala belahika mumimoyo yabo,

kakale abazotongoziba zila dzangu.’

11 Sekwandakatuna ndina buhongola nditi,

‘Abangatongofa bangina mukunyaluluka kwangu.’"

12 Mutjenjele makamu angu, kuti pakati kwenyu kusiwanike nhu unamoyo wakayipa usina bugalimoyo, unomutungamilila kule neNdzimu unotjila. 13 Koga mukuludzililane hhuba limwe nelimwe hapa kutjayi "Nasi," kuyetila kuti kusibe newun'ompela wenyu unobankukutu ngentha yetjengela kwejinyo. 14 Ngobe tina gobe munaKhirisitu, hapa takabhatilila mubugalibgwe gwedu gwekutanga kuswikila kubupelo.

15 Sekwakunolebgwa kuyi,

"Nasi hapa muwha whi lile,

musiwomese mimoyo yenyu

sekwakayetika nehhuba lamakapanduka."

16 Ndiboyani bakawha koga bakapanduka? Akuta ibo bose bakabva muIgipita betungamigwa naMozisi? 17 Kakale ndiboyani Ndzimu baakagwadziligwa moyo kwemakole ali makumi mana? Akuta ibabaye baka betjinya, bakatjinyikila mutjilambanyika? 18 Ndzimu wakatuna kuti ndiboyani basingowhongina mukunyaluluka kukwe, hapa kusi ibabo bakabesingawhilile? 19 Ndizo ke tokubona kuti bakakon'wa ngina nentha yehaya bugalimoyo.