1 Ndizo ke takafanila bhatilila zwakasima pazwinhu zwatakawha, kuyetila kuti tisithewuke pazwili. 2 Ngobe hapa kuli kuti dama lakapiwa bobatategulu bedu ngebatumwa bekudzimu, lakalakalulama, bose basakalitobela kene bakaletjedza liwhilila bakawamutjila langiwa kwakafanila. 3 Ngono iswi towholeya langiwa tjini, hapa tisingawhilile tjidziwa kukulukulu zwingapa? Kwakalebgwa kutanga naHe, nayibabo bakawha elebeleka bakabvuma kutili kuti ilebeswa. 4 Ndzimu bo wakapa busupi ngezwilakidzilo, nemakaabadzo, nematjenamiso akasiyana siyana nangezwipo zweMeya Yakayengemala zwakakobewa kuyendidzana nekuda kukwe.

5 Ndzimu haazopa batumwa masimba kuti babe batongi behango inohha iyeyo yatinoleba nekwayo. 6 Selebgwa kwakunoyetiwa mudziwhalo kuyi,

"Nhu ini, kumuli imwi Ndzimu, kunothama kuti mukumbule nekukwe,

kene nkololo wenhu wamunotjengeta?

7 Makawusa pasi kwebatumwa bekudzimu kwelubakanyana,

mukawumbadza tjiyala tjekudziwa nelemekedzewa*.

8 Makasa zwinhu zose kusi kwemakumbo awe."

Mukusa zwinhu zose pasi kukwe akuna Ndzimu tjaakasiya tjisipasi kwemasimba awe. Koga ke, kwangwenu atanhu tikabona zwinhu zose zwili pasi kukwe. 9 Koga tobona Yesu kwelubakanyana wakathamiwa akabe pasi kwebatumwa bekudzimu, ngwenu wakatjimbadziwa tjiyala tjekudziwa nelemekedzewa, ngobe wakadziyidziwa nelufu kuyetila kuti ngengoni dzeNdzimu afile banhu bose. 10 Kwakakwakalulama kuti iye Ndzimu, iye kwakabva zwinhu zose, kakale zwibumbigwa iye kuti mukuhhisa bakololo banjinji mugudzo lile, waka akafanila thama kuti ntangisi wetjidziwa kwabo adziyile iko kwakathama akaba wakapelela.

11 Unoyengemadza, nebanoyengemadziwa banobva mutshinde lin'ompela, ndizo ke Yesu aana honi kuti abadane eti makamu awe. 12 Unoti,

"Ndowholeba zina lenyu kumakamu angu,

Ndowhomulumbidza pakati kwegubungano."

13 Unopamha eti "Ndowhogalabgwe kuNdzimu," Unoti kakale, "Ndipano nebana bandakapiwa neNdzimu."

14 Ndizo ke saku bana bali belopa nenyama, Yesu wakaba nembumbiko iyeyo bo. Kuyetila kuti nelufu gugwe, apaladze iwhoyo unamasimba elufu iye Satane, 15 kakale asunungule bose ibabo baka bali balanda bupenyu gwabo gose nentha yehla kwabo lufu. 16 Kupatjena ke kuti iye waka esingabhatshe batumwa bekudzimu, koga waka ebhatsha zwizekugwana zwaAbhurahhamu. 17 Ikoku koleba kuti, waka efanila kuti abe semakamu awe nezila dzose, kuyetila kuti abe mphirisiti upehhugwi unangoni kakale egalikamoyo mukuhingila Ndzimu, kuyetila kuti abetjibhayilo tjesuka matjinyo ebanhu. 18 Nentha yekuti iye tjekukwe wakadziyila akalikiwa, unotubula bhatsha ibabo banolikiwa bo.