1 Tjikulu muna tjatinoleba ndiyetji, tina mphirisiti upehhugwi wakajalo iye ugele kuluboko gweludli gwetjigalo tjeMasimba ose kudzimu. 2 Unohinga ko mun'umba yakayengemala, ilo jatja lemalebeswa, lisakabakiwa nenhu, koga lakabakiwa naHe.

3 Mphirisiti upehhugwi wose wakagadziwa kuyetila kuti ape zwipo nezwibhayilo, ndizo ke mphirisiti nkulu iwhoyu unofanila ba netjimwe tjinhu tjaanopila. 4 Ngono kadzene aka ali muno muhango, waka esingawhobe mphirisiti ngobe bayapo baphirisiti banopa zwipo ngekwenlayo. 5 N'hingo wabanothama pasi pano tjifananidzo nentuzi wezwikudzimu zwakayengemala; ngobe Mozisi, paaka abapedlo nebaka jatja wakalayiwa neNdzimu kuyi, "Iba nelebeswa kuti kose nokuthama utebela tjifananidzo tjawakalakidziwa ulipehhugwi kwedombo." 6 Koga ngwenuwali Khirisitu wakapiwa n'hingo wobuphirisiti uhine kwazo kupinda wabo, saku tjibvumilano tjaanolebelekela tjihine pana tjikulukugwi, ngobe tjibvumilano itjetji tjitshwa tjakabakiwa pehhugwi kwezwigadzabgwe zwihine.

7 Ngobe kadzene tjibvumilano tjekutanga tjakatjisina nlandu, koba kusakayetiwa tjimwe tjebubili. 8 Ngobe wakawana banhu babe nlandu paanoti,

"Mahhuba anowhohha, kujalo He,

pandinowhothama tjibvumilano tjitshwa nen'umba yaIsirayeli kakale nen'umba yaJuda.

9 Tjibvumilano itjetjo tjowhoba tjisakafanana netjandakathama nabobatategulu babo,

muhhuba landakababhata neluboko ndibatungamila ndibadusa muhango yeIgipita.

Ngobe abazoyendilambeli balimutjibvumilano tjangu,

ndizo ke andizoba nehanya nabo, banojalo He.

10 Yetji nditjo tjibvumilano tjandinowhothama nen'umba yaIsirayeli,

mumahhuba anohha, banojalo He.

ndowhosa milayo yangu mumikumbulo yabo,

kakale ndowhoyikwala mumimoyo yabo.

Ndowhoba Ndzimu wabo,

ibo banowhoba banhu bangu.

11 Akuna unowhodiya umwe,

kene hama iye eyibudza eti,

‘Ziba He,’

ngobe bose banowhondiziba,

kubva kuna upasi kunoti kuna upehhugwi.

12 Ndowhobayetila mazwibhatigwa matjinyo abo,

anditjowhokumbula milandu yabo."

13 Mukuleba nekwetjibvumilano tjitshwa, wakathama tjibvumilano tjekutanga tjikasaba nen'hingo. Ndizo ke tjisitjina n'hingo tjatjikwegula tjowhopela nekulibilidza.