1 Ngobe mphirisiti upehhugwi wose unohagwa pakati kwebanhu, unogadziwa kuti amilile banhu muna zwakalingisana neNdzimu epa zwipo nezwibhayilo zwematjinyo. 2 Unotubula bhata zwibuyanana ibabo basina luzibo kakale banolahika muzila, ngobe iye bo wakakombewa nebukuwa. 3 Ngentha yayikoku, wakafanila pila zwibhayilo zwematjinyo awe kose nezwibhayilo zwematjinyo ebanhu. 4 Akuna unozwipa bugalo igogu guna gudzo kuti abe mphirisiti upehhugwi, koga unodan'wa neNdzimu, sekwakadan'wa Aroni.

5 NaKhirisitu bo azozwimilidza kuti abe mphirisiti upehhugwi, koga wakagadziwa nawhoya wakati kuwunli,

"Iwe ndiwe Nkololo wangu,

nasi ndaba Tate babo."

6 Sekwaanoleba payimwe ndebo eti,

"Waba mphirisiti nekusingapele,

sekweludzi gwebuphirisiti gwaMelikhizedeki."

7 Mumahhuba awe etjila ali nhu Yesu waka etembezela nekumbilila ekuthama ngekuwa nange liga mihodzi kuna iye waka etubula wuntjidza mulufu, wakawhika ngentha yehla kukwe Ndzimu. 8 Nekene wakabe elinkololo weNdzimu wakazwidiya whilila kubvila mukudziyidzika kukwe, 9 wakati atjipelela nebuhhalo, akaba tshime letjidziwa kusingapele kuna bose banowuwhilila. 10 Ndzimu wakawunghadza kuti abe mphirisiti upehhugwi sekweludzi gwebuphirisiti gwaMelikhizedeki.

11 Kuna kunjinji kwatingaleba nekwendebo iyeyi, iyo inolema tjenesewa kwayo, saku munonoka bhata zwinhu. 12 Ngobe nekene, kuwhoti lubaka igogu, mamatjifanila kuti mube matjiba badiyi, koga mutjahaka nhu unomudiya zwidiyo zwekutanga zwilelu zwedama leNdzimu. Mohaka nkaka kusi zodliwa zwakasima; 13 wose unotjila nenkaka haana luzibo gwedama lekululama ngobe utjiluhaba. 14 Zodliwa zwakasima ndezwebanhu bawhola, ndezwa ibabo, ngewolobela butjilo, bakatjidiya mikumbulo yabo palalanya tjibuya netjibi.