1 Ndokotjibhuzwa nditi, "Ndzimu wakalaha banhu babe?" Aa akuzojalo! Imi tjekwangu ndi Isirayeli, ndiweludzi gwaAbhurahhamu, ndiwen'umba yaBhenjamini. 2 Ndzimu haazobalaha banhu babe, ibo baakagala aziba kubvila kutanga. Amutoziba kuti lukwalo gotini nekwetjikumbilo tjaElija kuNdzimu, kuti Ndzimu abone Isirayeli nlandu? Goti. 3 "He, batjibulaya balebesambeli benyu, batjikolomola zwibeso zwepisila zwibhayilo; ndimi ndoga ndasala, ngono banovima butjilo gwangu bo." 4 Ndzimu wakawun'handula etini? Wakati, "Ndazwibiganyidzila banhu balizwiwulu zwili kutondeka basanhu bakatongopfigamila Bhali*." 5 Ndizo ke, nangwenuwali bayapo batjakabhatilila kuNdzimu ngentha yehagwa ngengoni. 6 Hapa kuli kuti kungengoni, akutji ngemihingo (ngobe ngoni dzobe dzisitji ngoni). Koga hapa kuli kuti kungemihingo, akutji ngengoni; ngobe ngoni dzobe dzisitji ngoni.

7 Kobva kutini ngono? Kobva kuti, banhu beIsirayeli bakakon'wa wana tjabaka behaka, koga bahalugwa bakatjiwana. Bamwe bose bakayetiwa bakabe bakukutu. 8 Sekwakwaka kwagwa kuti, "Ndzimu wakabapa meya yetshumwayela, meho ekuti basibone nezebe dzekuti basiwhe kudza kuwhoswika hhuba lanasi." 9 Kose naDavida unoti,

"Zodliwa zwabo ngazwibe bulimbo nedati kubali,

zwibe zwinobaliga kakale zwibe nlango wabo.

10 Meho abo ngaabe nebupofu kuyetila kuti basibone,

kakale nhunji dzabo ngadzikondame* tjoselele."

11 Ndizo ndobhuzwa, bakakunhiwa kuyetila kuti bawe? Aa akuzojalo! Koga ngentha yetjinya kwabo, tjidziwa kwakahha kuBataya kuyetila kuti maIsirayeli abe nefupa. 12 Hapa tjinya kwabo kuli fumwa yehango, nekon'wa kwabo kuli fumwa kuBataya, ngono bgwiliziwa kwabo bose kowhohhisa fumwa ingapani!

13 Ndolebeleka namwi imwi Bataya, sangwenu ndili mpositoli kuBataya, ndokudza n'hingo wangu kwazo, 14 kuyetila kuti ndilonge banhu beludzi gwangu fupa, ndizo kuti bamwe babo batjidziwe. 15 Ngobe hapa lahiwa kwabo kuli lulamisiwa kwehango, wamutjigwa kwabo kowhobani hapa kusi tjila kwebafi!

16 Hapa bhemu letjinkwa linodusiwa setjipo tjekutanga lakayengemala, kubva kuti tjinkwa tjose tjakayengemala; hapa ndzi wenti wakayengemala, nenhabi bo dzakayengemala. 17 Hapa dzimwe nhabi dzakathubugwa, iwe, lutabi gwenti wentoba wemuhango, watjimedzekewa muwunli, watjibe negobe bo muntubgwi unobva mundzi wenti wentoba iwhoyo, 18 usizwikudze sewunopinda dzimwe nhabi. Hapa uthama ujalo, kumbula whoku; akuta iwe wakasenga ndzi koga ndzi ndiwo wakasenga iwe.

19 Nokotjileba uti, "Nhabi dzakathubugwa kuyetila kuti ndimedzekewe." 20 Ilebeswa, bakathubugwa nentha yesagalamoyo, iwe sima ngegalamoyo. Usizwikudze; koga, iba nekuhla. 21 Ngobe hapa Ndzimu esakaletjedzela nhabi dzakazwimelela munti, nawebo atowhokuletjedzela. 22 Tjibona ke ngoni nebuhongola, kweNdzimu. Unabuhongola kuna ibabo bakatjinya; koga Ndzimu unangoni kukuli hapa uyendilambeli uli mungoni dzidze, kuhhe kwayikoku nowhothubugwa bo. 23 Kose nayibabo, hapa bengasiyana nesagalamoyo banowhomedzekewa, ngobe Ndzimu unotubula bamedzeka kakale. 24 Hapa kuli kuti wakavun'wa pantoba wemuhango, uli ntoba wehango ngembumbiko, ukawhomedzekewa muntoba wakadzwagwa, kunopesana nembumbiko, kowhobe kulelu kungapani kuti idzedzi nhabi dzentoba dzimedzekewe muna mayi kene?

25 Ngobe anditoyemula kuti musizibe, makamu angu, ndohaka kuti muwhisise yetji tjamamusingazibe, kuyetila kuti musizwibone sebakatjenjela, bukukutu igogu gwatjiswikila amwe maIsirayeli, kudza kunoswika nhambo yekuti Bataya bakapelela batjidziwe. 26 Ndizo Isirayeli wose unowhotjidziwa; sekwakwaka kwagwa kuti,

"MuZiyoni kowhobva Nsununguli;

unowhodusa bubi gose muna Jakobe.

27 Itjetji nditjo tjibvumilano tjangu nabo,

hapa ndedusa matjinyo abo."

28 Ngekwendebo mbuya, bazwita zweNdzimu, kuyetila imwi; koga ngekwehalulo, badikani, ngentha yabobatategulu babo. 29 Ngobe zwipo zweNdzimu azwitohanduka nedana kweNdzimu akutohanduka. 30 Sekwamakatongobe musingawhilile Ndzimu, koga ngwenu matjiwamutjila mawhilangoni ngentha yesawhilila kwabo, 31 kakale abatjawhilila Ndzimu, kuyetila kuti ibo bo bawhigwe ngoni kuli ngentha yemawhilangoni amakawamutjila. 32 Ndzimu wakata banhu bose basungwa bekusawhilila, kuyetila kuti abe nemawhilangoni kuna ibo bose.

33 Ekee bukulu gwebutjenjebvu neluzibo gweNdzimu! Ekee sumbikala kwetonga kukwe, nesalondeka kwezila dzidze! 34 Selukwalo guti,

"Ndiyani ungaziba nkumbulo waHe?

Kene ndiyani ungaba nkumbuludzi uwe?

35 Kene ndiyani wakatongopa Ndzimu tjipo,

etila kuti Ndzimu ekowumbgwiliza?"

36 Ngobe kose kobva kuwunli, kungentha iye, kakale kukuwunli. Ngaakudziwe tjoselele. Ngekusingapele kose Akujalo.