1 Ndigupi bubuya guyapo mukuba Njhuta, kene ndiwupi mbhayilo uyapo mukuthumbigwa? 2 Nezila dzose! Kwekutanga whuti, wakagalabgwe maJuta ngekubapa n'hingo wemilayo yeNdzimu. 3 Hapa bamwe basingagalebgwe ke? Kusagalamoyo kwabo kungathama galikabgwe kweNdzimu kukasibe tjimwe? 4 Akuzojalo! Ndzimu ngaabe lebeswa, nenhu wose abe nyepi. Sekwakwaka kwagwa.

"Kudze ubon'we kuti unalebeswa hapa ulebeleka;

kakale ukunde hapa utongwa."

5 Koga hapa bubi gwedu gulakidza lulama kweNdzimu, towhotini ngono? Ndzimu haazolulama hapa ehhisa buhongola gugwe pehhugwi kwedu? (Ndolebeleka senhu.) 6 Akuzojalo! Hapa kuli kuti kwaka kwakajalo, Ndzimu ungatonga hango tjini?

7 Umwe ungati, "Hapa kuli kuti nyepa kwangu kothama lebeswa leNdzimu likawanda kukaba gudzo kuwunli, ngentha yeni ngono nditjawan'wa nlandu sentjinyi?" 8 Ngentha yeni tisingathame bubi kuyetila kuti tjibuya tjihhe? Sekwatinolebgwa zwakayipa nebamwe kuyi tojalo. Wanikwa nlandu kwabo kwakabalizana.

9 Totini ngono? Iswi maJuta tihine kupinda ibo? Aa, akuzojalo! Tatjitjenesa kale kuti maJuta neBataya bakafanana bose batjinyi. 10 Sekwakwaka kwagwa kuti.

"Akuna wakalulama, aa, kene iye un'ompela wose;

11 kene unowhisisa,

kene unohaka Ndzimu.

12 Bose bakapambuka bakayenda ntome,

bose banothama zwakaleleka;

akuna unothama tjakanaka, kene iye un'ompela."

13 "Whulo dzabo dzizwikumbu zwakahama;

Milomo yabo ihhele tuka nematama akayipa."

"Buhungu gwenyoka gumumilomo yabo."

14 "Milomo yabo ihhele tuka nehaya."

15 "Makumbo abo, anolibilidzila tebula malopa,

16 Paladza nebuyendasi kumubutjilo gwabo.

17 Zila yekunyalala abatoyiziba."

18 "Akuna unohla Ndzimu pabali."

19 Ngwenu teeziba kuti kene ini tjinolebgwa ngenlayo, tjolebegwa ibabo bapasi kwenlayo, kuyetila kuti wose nlomo utjemegwe nehango yose izwipe nlandu kuNdzimu. 20 Ndizo mukubona kweNdzimu, akuna nhu unowholulamisiwa ngetobela nlayo; koga, ngentha yenlayo toziba kuti jinyo ini.

21 Koga ngwenu ndulamo yeNdzimu yatjizumbunugwa, kuhhe kwenlayo, nekene nlayo upa busupi kose nebalebesambeli.

22 Ikoku lulama kunobva kuNdzimu kobva mukugalamoyo kuna Yesu Khirisitu kunayibo bose banogalabgwe. Akuzosiyana, 23 ngentha yekuti wose nhu wakatjinya, unotayila swikilila gudzo leNdzimu, 24 kakale unolulamisiwa mpho, ngengoni ndensununguko yakahha ndiKhirisitu Yesu. 25 Iye wakahhisiwa neNdzimu setjibhayilo tjebgwililulana, ngebugalimoyo mulopa lile. Wakakuthama ikoku elayidza lulama kukwe, nentha yekuti azolanga matjinyo akatiwa ntolo, 26 Ndzimu wakakuthama elayidza kuti mulubaka gwangwenuwali iye tjekukwe wakalulama nekuti unowunlulamisa iwhoyo unakugalabgwe munaYesu.

27 Kuponi, ngono, zwiloba fuba kwedu? Akutobagwa. Nentha yeni? Nentha yetobela nlayo? Aa, koga nentha yebugalimoyo. 28 Ngobe tobvuma kuti nhu unolulamisiwa ngegalamoyo, kusineni nethama mihingo inohakiwa nenlayo. 29 Ndzimu, uNdzimu wemaJuta koga? Haata Ndzimu weBataya bo? Ee, ndeweBataya bo, 30 saku kuna Ndzimu un'ompela, unowhobalulamisa ngebugalimoyo gwabo ibabo bakathumbigwa, nebasakathumbigwa, ngebugalimoyo gwabo bo. 31 Toyelaha nlayo ngono ngentha yegalamoyo? Aa akuzojalo! Towunsimisa.