1 Amutoziba, hama dzangu-ngobe ndolebeleka kubanhu banoziba nlayo-kuti nlayo unasimba pehhugwi kwenhu hapa nhu atjimpenyu? 2 Konga sawhoku, mfumakadzi wakasungwa ngenlayo kunlume uwe hapa nlume etjimpenyu; koga hapa nlume uwe efa wasununguka munlayo wendobolo. 3 Ndizo, hapa elobogwa newumwe nhu, nlume uwe atjatjila, unoyi imhombwekadzi. Koga hapa nlume efa wasununguka munlayo iwhoyo atoba ali mhombwekadzi hapa elobogwa newumwe nlume. 4 Sayikoku ke, hama dzangu, namwibo makafa kunlayo ngembili waKhirisitu, kuyetila kuti mube babe, iye wakamusiwa kubafi, kudze tibe nezwizwalo kuNdzimu. 5 Nelubaka titjatjila munyama, njemulo dzedu dzetjinya, dzimusiwa ngenlayo, dzakadzihinga mumibili yedu, kuyetila kuti mbhudilo kube lufu. 6 Koga ngwenu, tasunungugwa munlayo, nekuti takafa kuna kwaka kwakatitapa, kuyetila kuti tihinge tisi kusi kwenlayo wakakwagwa nkulukugwi koga tili mubutjilo gutshwa gweMeya.

7 Towhotini ngono? Nlayo ijinyo? Aa, akuzojalo! Lebeswa ndoba ndisakaziba kuti ini tjinya hapa kusina nlayo, ndoba ndisakaziba kuti tjiba ini hapa nlayo waka usati "Usitjibe." 8 Koga tjinya, kwakawana nkoba munlayo, kukamusa zila dzose dzetjiba mundili. Ngobe kuhhe kwenlayo, jinyo lakafa. 9 Ndakanditjila kuhhe kwenlayo gumwe lubaka; koga pakahha nlayo, jinyo lakamuka likaba bhenyu, imi ndikafa. 10 Ndakawana kuli kuti nlayo waka wakafanila hhisa bupenyu, kundili wakahhisa lufu. 11 Ngentha yekuti tjinya, pakwakawana nkoba munlayo, kwakanditjebela ngenlayo, kukandihhisila lufu.

12 Ndizo, nlayo wakayengemala, nendawulo yakayengemala, yakalulama kakale imbuya. 13 Tjibuya, ngono, tjingabe tjakahhisa lufu kundili? Aa, akuzojalo! Koga kudza tjinya kuzibgwe sejinyo, kwakahhisa lufu mundili ngekwaka kuli kubuya, kuyetila kuti ngendawulo jinyo lingapindilila.

14 Toziba kuti nlayo umeya; koga imi ndiwenyama, ndakatengesewa kuba nlanda wejinyo. 15 Anditowhisisa tjandinothama. Tjandinoyemula thama anditotjithama, koga tjandinohema nditjo tjandinothama. 16 Hapa ndithama tjandisingahake thama, ndobvuma kuti nlayo umbuya. 17 Ngono hapa kwakajalo, akutji imi ndinokuthama, kwabejinyo linogala mundili. 18 Ndoziba kuti akuna tjakanaka tjinogala mundili, mutjimo tjenyama. Ndoyemula thama tjakanaka, koga anditotubula. 19 Ngentha yekuti tjakanaka tjandinoyemula thama, anditotjithama, koga tjakayipa tjandisingahake thama nditjo tjandinothama. 20 Andithama tjandisingahake thama, akutji imi ndinotjithama, koga ijinyo linogala mundili linokuthama.

21 Ndowana nlayo iwhoyu uhinga mundili. Nekutobe ndihaka thama tjakanaka, bubi guntome kwangu. 22 Mukati kwangu ndohanhila nlayo weNdzimu; 23 koga ndobona umwe nlayo munhango dzembili wangu, ugwisana nenlayo wenkumbulo wangu, kakale undithama ntapwa wenlayo wejinyo unohinga munhango dzembili wangu. 24 Ndakamanikana seni! Ndiyani unowhondiwangulila muna iwhoyu mbili welufu kene? 25 Ngaabokewe Ndzimu muna Yesu Khirisitu He wedu!

Ndizo ke, imi tjekwangu munkumbulo wangu ndohingila nlayo weNdzimu, koga ngenyama yangu ndohingila nlayo wejinyo.