1 Iswi bakasima takafanila sengela banyolonyolo mitolo yabo, kakale tisitongozwihanhisa. 2 Umwe newumwe wedu wakafanila hanhisa mbakidzani uwe munatjakanaka, kuyetila kuti awumbake. 3 Ngobe naKhirisitu haazotongozwihanhisa; koga, sekwakwaka kwagwa, "Masapa ayibabo banomutuka akawila kundili." 4 Tjose tjakakwagwa mumahhuba akapinda tjakakwaligwa diya iswi, kuyetila kuti ngeba nemoyonlefu nange kukuludzila kwewhalo tingaba nekugalabgwe. 5 Ndzimu, iye unomupa moyonlefu nekumukuludzila, ngaamuthame mube nenkumbulo unofanana pakati kwenyu, iwo zwawo Khirisitu Yesu waaka enawo, 6 kuyetila kuti moseni ngewhi lin'ompela mungakudza Ndzimu Tate baHe wedu Yesu Khirisitu.

7 Ayiwamutjilaneni zwakanaka, sayikoku Khirisitu akatiwamutjila, kuyetila gudzo leNdzimu. 8 Ndizo ndoti Khirisitu wakatiwa n'hingi kuna bakathumbigwa kuyetila lakidzila kuti Ndzimu unalebeswa, ehhadzisa gadziwabgwe kwakayetiwa kuna bobatategulu, 9 kose nekuti Bataya bakudze Ndzimu ngentha yemawhilangoni awe; sekwakwaka kwagwa kuti,

"Ndowhomulumbidza pakati kweBataya,

kakale ndowhomba ndilumbidza zina lenyu."

10 Kakale unoti,

"Hanhani, imwi Bataya, nebanhu beNdzimu."

11 Kakale unoti,

"Lumbidzani He Bataya mose;

banhu bose ngabawunlumbidze."

12 Kakale Isaya unoti,

"Kowhobayapo ndzi waJese,

unowhomilidziwa kuti atonge Bataya;

muwunli Bataya banowhogalabgwe."

13 Ndizo ke, Ndzimu unopa kugalabgwe ngaamuhhadze nekuhanha nange kunyalala mukugalamoyo, kuyetila kuti mube nekugalabgwe ngentha yemasimba eMeya Yakayengemala.

14 Hama dzangu, ndogutshikana kuti imwi, muhhele bubuya, muhhele luzibo gose, motubula diyana. 15 Koga ndamukwalila ndakasimisa nekwezwimwe zwinhu, ndimukumbudza, ngentha yengoni dzandakapiwa neNdzimu, 16 kuyetila kuti ndibe n'hingi waKhirisitu Yesu kuBataya, ndihinga semphirisiti ndisumikila ndebo mbuya yeNdzimu, kuyetila kuti Bataya babe mpilo unowamutjilika, wakayengemadziwa ngeMeya Yakayengemala. 17 Muna Khirisitu Yesu, ndina kuhanha nehingila kwangu Ndzimu. 18 Anditowhogala ndaleba nekwezwimwe zwinhu kuhhe kwezwakayetiwa ndiKhirisitu ehingisa imi, kuti Bataya bazibe whilila Ndzimu, ngedama nange zwiyeto, 19 ngemasimba ezwilakidzilo neematjenamiso, nangemasimba eMeya yeNdzimu. Ndizo, kubvila kuJerusalema kupoteleka kunoti kuIliyirikamu ndasumikila ndebo mbuya yaKhirisitu ngekuhhele. 20 Ndizo ndakathama kuti kube tjinangwa tjangu kuti ndisumikile ndebo mbuya, Khirisitu kwaasakatongolebgwa nekukwe, kuyetila kuti ndisibake pehhugwi kwekwakabambiwa newumwe nhu; 21 koga sekwakwaka kwagwa kuti,

"Banowhobona ibabo basakatongobudziwa nekukwe,

banowhowhisisa nayibabo basakatongowha nekukwe."

22 Ndizo wali ndandisingatubule kwelubaka gulefu hha kumuli. 23 Koga ke ngwenu saku kusitjina ntha mumitunhu iyeyi yandisasumikila muyili, ndoyemula, sekwandagala ndithama makole manjinji, kuti ndihhe kumuli, 24 hapa ndiyenda kuSipeyini (ndogalabgwe ndowhomubona ndili mugwendo gwangu, kakale mowhondibhatsha, hule kwekuti ndamukumba kwelubakanyana.) 25 Kwangwenuwali nditjayenda kuJerusalema ndiyendisa bhatsho kubayengemali. 26 Ngobe beMakhedoniya nebeku Akhayiya bakakuhanhila pa banohaya pakati kwebayengemali bemuJerusalema. 27 Bakakuthama ikoku bakahalabvuka, iko mulebeswa bagala bana nlandu wekuti bababhatshe; ngobe hapa kuli kuti Bataya bakaba negobe mumakombolelo emeya emaJuta, Bataya bakafanila kuti bahingise zwinhu zwabanazo, bhatsha maJuta. 28 Ndizo hapa ndapedza n'hingo iwhoyu, ndatjibawamutjidza zwipo zwabakapiwa, ndowhopinda kumuli ndiyenda kuSipeyini; 29 kakale ndoziba kuti, hapa ndihha kumuli, ndowhohha ndili mubuhhalo gwemakombolelo akapelela aKhirisitu.

30 Ndizo ndomukumbilisisa, hama, muzina laHe wedu Yesu Khirisitu kose nange ludo gweMeya, mubhatane nami mungwa yangu, munditembezelela kuNdzimu, 31 kuti ndibe nekudzibiligwa kuna ibabo basi bagalimoyo muJudiya, kakale bhatsha kwangu kuwamutjilike kubayengemali muJerusalema; 32 kuyetila kuti ngekuda kweNdzimu, ndihhe kumuli ndakahanha, kakale banamwi kundinyaluluse. 33 Ndzimu wekunyalala abe namwi mose. Akujalo.