1 Ndizo ndomukumbila, makamu angu, ngemawhilangoni eNdzimu, kuti mupile mibili yenyu ibe tjibhayilo tjinotjila, tjakayengemala kakale tjinowamutjilika kuNdzimu, kunoba kuli iko namata kwelebeswa kwakatambunuka. 2 Musibe nezwiyeto zwayiyeyi ino hango, koga ngebumbiwa butshwa kwemikumbulo yenyu muhanduke mube nembumbiko ndzwa. Kuyetila kuti mutubule holesesa nelakidza tjinoba tjili kuda kweNdzimu, kubuya kakale kunowamutjilika kakale kwakapelela.

3 Ngengoni dzandakapiwa ndoti kuwumwe newumwe upakati kwenyu, usizwise pehhugwi kupinda kwawuli iko; koga ukumbule, zwakalizanilana nebugalimoyo Ndzimu gwaakupa. 4 Ngobe sayikoku mbili un'ompela una ndungululo njinji, akuta kuli kuti dzose ndungululo dzina n'hingo iwo zwawo, 5 iswi bo, tili banjinji, timbili un'ompela muna Khirisitu, koga tili ndungululo dzakasiyana. 6 Tina zwipo zwatakapiwa ngengoni, zwakasiyana. Hapa kuli bulebesambeli, ayiguhingiseni kuyendidzana nebugalimoyo gwedu; 7 hapa kuli hinga, ngatihingeni; hapa kuli diya, ngatidiyeni; 8 hapa kuli kuludzila, ngaakuludzile; unopa, ngaape akahalabvuka; ntungamili, ngaatungamile ngezwipila; unowhila ngoni, ngaakuthame nekuhanha.

9 Ludo ngagupelele ngelebeswa, bengani tjakayipa; mubhatilile kuna tjakalulama. 10 Mudane ngeludo gwehama, kudzani bamwe kupinda zwikudza imwi. 11 Musibe simbe koga hingani nekuzwipila, mupisike mumeya, muhingile He. 12 Hanhani mukugalabgwe, ibani nemoyonlefu mukudziyidziwa, mutembezele tjoselele. 13 Wahhani bayengemali; muzwipile tjengeta bezi.

14 Kumbilani Ndzimu akombolele ibabo banomuvima; kumbilani kombolela kusi tuka. 15 Hanhani nebanohanha, mulile nebanolila. 16 Galisanani nekuwhanana nebamwe; musizwikudze, koga whananani nebanozwininipisa; musizwibone butjenjebvu.

17 Musibgwilizile tjakayipa netjakayipa, koga lemekedzani tjinoboneka tjili tjibuya kuna ibo bose. 18 Yetani kose kumumatatabuko enyu kuti mugalisane nekunyalala nebanhu bose. 19 Badikani, musibgwilizile imwi, koga mukusiyile kubuhongola gweNdzimu; ngobe kwaka kwagwa kuti "Bgwilizila ndekwangu, ndowhobgwilizila," kujalo He. 20 Koga, "Hapa tjita tjenyu tjina hhala, mutjipe zodliwa; hapa tjina nyota, mutjin'wise; ngobe ngeyeta mujalo mowhotjibutitikila masimbe emoto mun'holo." 21 Musikundiwe netjakayipa, koga kundani tjakayipa ngetjakanaka.