1 Ndizo, iwe nhu, awuna tjawungadzeta natjo, kene uli yani, hapa utonga bamwe; tjimwe netjimwe tjawunotongela bamwe, unozwitilika nlandu, ngobe iwe unotonga nothama bo zwinhu zwakajalo. 2 Ngwenu teziba kuti tonga kweNdzimu etonga ibabo banothama zwinhu zwakajalo kumulebeswa. 3 Ndizo hapa iwe, nhu koga, ubatonga koga uthama zwinhu zwakajalo bo, unokumbula kuti tonga kweNdzimu unowhokudzeta? 4 Kene unolingila pasi bukulu gwelulama kukwe, nemoyonlefu, nebigamoyo kukwe, amutoziba kuti lulama kweNdzimu ndekwekuti kumutungamilile kuti muhanduke? 5 Koga nentha yewoma miholo kwenyu nemimoyo yenyu isingade handuka, mozwibutitikila buhongola muhhuba lebuhongola gweNdzimu, paanowholakidzila tonga kukwe kubuya. 6 Ndzimu "Unowhowamutjidza nhu nenhu kuyendidzana nehinga kukwe." 7 Unowhopa butjilo gusingapele, ibabo bana moyonlefu banohaka gudzo nelukudzo nekusafa, ngethama zwinhu zwakanaka. 8 Koga kuna ibabo banozwikudza kakale belamba lebeswa betobela zila mbi, kowhoba nebuhongola nemon'wa. 9 Kowhobe nebulemo nemanikana kunhu wose unothama zwakayipa, kutanga kuNjhuta, nekuNghiriki; 10 koga gudzo, lemekedzo nekunyalala kunhu wose unothama tjakanaka, kutanga kuNjhuta, kose nekuNghiriki. 11 Ngobe Ndzimu haatolakidza luhalawulo.

12 Bose banotjinya balikuhhe kwenlayo banowhopalala balikuhhe kwenlayo, bose banotjinya balipasi kwenlayo banowhotongwa ngenlayo. 13 Ngobe atayibo banowha nlayo bakalulama mbeli kweNdzimu, koga ndi ibabo banotobela nlayo banowholulamisiwa. 14 Ndizo, hapa Bataya, basina nlayo, bethama zwinhu zwimunlayo ngembumbiko, banlayo ngekwabo, nekene besina nlayo, 15 banolakidza kuti kunohakika ngenlayo kwakakwagwa mumimoyo yabo, hana dzabo dzili busupi bo, nemikumbulo yabo ibabvumila, kene ibadzibisa. 16 Ikoku kowhoyetikala hhuba Ndzimu laanowhotonga zwakasumbikika zwimumimoyo yebanhu ndaYesu Khirisitu, sekwakunolebgwa ngeNdebo Mbuya yandinosumikila.

17 Iwe, hapa uzwiti uNjhuta; wakasendama panlayo kakale uzwiloba fuba ngekwekudlidzana kuko neNdzimu; 18 hapa uziba ludo gugwe kakale ubvuma tjakanaka, ngobe utobela nlayo; 19 hapa unalebeswa kuti ndiwe unotungamila mapofu, utjedza kuna bamuhhalima, 20 unotambunudza zwilengwe, ndhiyi wezwitole, uhhele luzibo nelebeswa kunobva munlayo; 21 iwe ke, unodiya bamwe, awutozwidiya? Iwe unosumikila kuti usikwibe,* iwe awutokwiba? 22 Iwe unoti banhu basite bupombgwe, iwe unothama bupombgwe? Iwe unohema midzimu yakabehhewa, unotjebela mathempeli? 23 Iwe nozwiloba fuba nekwenlayo, koga nosakudza Ndzimu ngevuna nlayo? 24 Sekwakwaka kwagwa, "Ndzimu unotukwa neBataya ngentha iyo."

25 Thumbigwa kuna tjilemela hapa utobela nlayo, koga hapa uvuna nlayo, thumbigwa kuko kohanduka kukaba sathumbigwa. 26 Hapa basaka thumbigwa bethama zwinohakiwa ngenlayo, abatowholingwa sebakathumbigwa? 27 Usaka thumbigwa mumbili koga etobela nlayo unowhomuwana nlandu imwi, nekene muna lutjayo gwakakwagwa kakale makathumbigwa koga muvuna nlayo. 28 Njhuta wakwako ate Njhuta tjakuhhe, kakale thumbigwa kwelebeswa akuta kwakuhhe kwembili koga. 29 Nhu uNjhuta hapa kubvila mukati; kakale thumbigwa whuthumbigwa kwemoyo, kuli kweMeya, kusi ngenlayo wakakwagwa. Lumbidziwa kwewakajalo akutobva kubanhu, koga kobva kuNdzimu.