1 Aruukɔ au ɗɔbi u moo pɛ̃niba shɔ shinɛkɨntiyi aɗɔn waanɛ, u kasirɛ u yaa vigbete a yɛ pɔ̃urɛ u pɛli ruuviniyɛtɔ, u mɛɛsisɨntɔ avi kɔ̃linɛ gbete shɔ pɛliuyɛ, u yuu yuunɛ naarane au dekɨn. 2 U pɔ̃u sisɨn jo a Yesɔ bikɔ shɔgbete aukɔ ɔ̃rɛ u shɔ ɗekɨn tɛnɛ aka sisɨn ãnɛyɛni yuunɛ gaanɛ yɛnɛ yisinɛ, aru sisɨn puru nta gbete kɛ gaunɛ yɛ, ji pɛli viyusẽ wɔɓa ama vɔ a yulaa naa ɓanɛ, ama dɔdɔrim u ɔ̃nɛ a ka Ɗalapa nakɨn pɛ̃niɓa aɗɔ au kpati roonɛyɛ.

3 Ɔ kpaa sisɨntɔ a shɔmini ayuu vigbete kpauyɛni, aru shɔ ruuvini i ɓɛ̃u ruubii a nɔɔni yɛǃ Ɔkɔɔ yaanɛ ɔ sisɨn ãnɛ u vɔrɛ au biini ɓa. 4 Awɔ raaboonɛ a ruuvini ji pɔ̃wɔ ɓa yɛnɛ ɔ kpa ntari ɓa a nyɔ vɔrɛ ɓa. 5 Ɗalapa ɓɛɛ jaayi ɔ suki ruu bimanɛ gbete Ɗalapa nwarɔɔ tɛ ya? A shanɛ,

<<Majaa a weshotɔ naa Uɓeyelapa kɛ tɔ̃raanɛ yɛ,

mɔkɔ vɔsibinɛ naakɛ lassanɛ.

6 Aru Uɓeyelapa gɔ̃ kopiya yushotɔ gbete au ɔriutɔ yɛ,

gɔ̃ shɔgbete a tɛunaatɛ naa ɓɛɛjaa yɛ gɔ̃u yushotɔ.>>

7 Ɔ masisɨntɔ awɔ raaboonɛni ɔ tuu naa vimatinɛ. A nyabankɔ Ɗalapa tuwɔ kɛkn naa ɓɛɛjaayi, pi awɔ atette gbete ɓeye gɔ̃u yusho ɓa yɛ piya? 8 Naa ɓeye ji gɔ̃u yusho ɓa nagbete gɔ̃ shɔ gãsi wɔɔyi ɓɛɛ ɓa si a ɓa ɓɛɛjaa ɓa, ama a pɛ jaa ɓɔɔ. 9 A u ruu ɓeyɛ jashɔzɛ, i gɔ̃u yushotɔ a ukɔɔ ma u ntayi nyatɔ. A shomni kpai i yusho gɔ̃nɛ ji tɛɛ u ɓeye gbete u a lapa ɓa aru ɔ̃nɛni suruni ɓaǃ 10 U ɓeye bi jashɔzɛ i yusho gɔ̃nɛ ɓa dangdang nyaba gbete i zɛnaa tɔ̃vɨn ai nɔɔ yɛ, ama Ɗalapa gɔ̃ yusho a nyaba gbete u shɔ tɔ̃vɨnyɛ aru nɛ u kpa tɔ̃vɨn mijo a vigbete yɛ shɔyɛni. 11 Aɗagbete shɔkɛ gɔ̃u yusho nɛ kɔutɔ sisɨn waanɛ, ɓa yɛti puru ntanɛ ɓa, ama au knti n ti tɔ̃vɨn pɛlinɛ a ɔ̃biinyatɔnɛ a shɔgbeteyi masisɨn a vimatinɛuni wɔsɔ̃n a yusho gɔ̃nɛni.

12 Aruukɔ ɔ gɨn ɔ naa gbete ai yɔyɛ nɛ a ɔ masi ɔ yugboti gbeteyi laki ɓa i bitɔ. 13 Ɔ yɛ ɗekɨn a nyaba gbororo awɔ ruu dooyi, nogbete shɔ doo vɔrɔ kpaa yukɔnɛ ɓa ama u gatitɔ.

14 Ɔ pɛli nɔgbete ɔ pɛliyɛ ɔ ɔ̃nɛbiinyatɔ̃nɛ a ɔ̃nɛ suru wɔsɔ wɔsɔni a kopiya, aru shɔgbete wɔɔyɛ kpa Uɓeyelapa zɛnɛ ɓa naa u ɓa awuni ɓayɛ. 15 Ɔ kɔyuutɔ aru Ɗalapa vitɔ̃vɨng pɛlinɛ yɛ tɛwɔrɛ, shɔwɔɔkɔ ɔ̃nɛ awɔ atette naa koolaa gbete kɔri waanɛ au n ti shɔ yuukɔnɛ au vizɔ̃nɛniyɛ. 16 Ɔ kɔyuutɔ shɔwɔɔkɔ ɔ̃nɛ awɔ atette shɔ kpantang pɛlinɛ a Ɗalapa ruubii ɓɛ̃ɛ̃nɛ naa Isuwa, shɔgbete aa aru vishaa waa gbete meliu bassinɛ jaamarirɛ. 17 A kɨntiuni nagbete ɔ ntayɛ, aɗagbete kasinɛn tɛɛ ɓeye susãri tasinɛyɛ shɔ risiu knti, ama u nyaba wɔɔ gbete kɔsi vigbete pɛliyɛ ɓa, aru kã ɓeye susãri tasinɛu a muruni fɛ̃ɛm.

18 A ji aa ɓa nagete shɔ Israilayi a yɛ ɓa, ɗɔgbete a nta kɔpɔ Siyona gbete yaa pɛ̃nɛɓa shaa aɗɔnyɛ ni ɓa ko ɗɔkɨnri kpete-kpete ko mii zizi pɛ̃nɛɓa, 19 ko yuuvi geenɛ, a yeenya naa shɔkɛ nta yeenyaunɛ, shɔ gaki rɛ nɛ shɔji kasi wɔɔ ntanɛ tokɨn ɓa, 20 aru iyɛ zɛnɔɔ gɨnnɛ vigbete a shɔ shayɛ nɛm gɨnnɛ ɓa gbete shanɛ, <<Ko kɛɔ̃nɛ nɛ pɛ vivaakɔ ntabiirɛ a kɔpɔni, shɔ loriu a tari u vɔrɛ.>> 21 Vigbete ai zɛukɔ ɔ̃ viseti fɛ̃ɛm, kɛdɔn Musa nwanyarɛ a shanɛ, <<N bi ɗɔzaanɛ aru seti ntanɛǃ >>

22 Ama aru ɔ apɛ kɔpɔ Siyona a Ɗalapa komoo pɛ̃nɛɓa wɔsɔ-wɔsɔ, ukɔɔ ɔ̃rɛ kolapa Urushalima au Ɗajashonɛlapa waanɛyi. 23 Ɔ atɛ aɗɔ yɛti puru ntanɛ ɗɔgbete Ɗalapa jamariyi tonya aɗɔnyɛ shɔgbeteyi a shɔ beeyi niitɛtɔ a kolapayɛ. Ɔ atɛ a Ɗalapa ɗɔbii shɔgbeteu au yɛ yeeruu a kopiya yuuyɛ, wɔsɔ̃n ɔtɛ ɗɔgbete shɔ ai pɛli vitɔ̃vɨng a dɔdɔrim shɔ risiyitɛ i ɔ̃ tɛpɛ-tɛpɛ i suruyi ɗɔbi. 24 Ɔ atɛ a Yesɔ ɗɔbii shɔgbete au ɔ̃ shɔ shinɛ atette shɔzɛ Ɗalapayɛ aka ruumanɛ so, a kpaa gbete shɔ sãtiyɛ au ɗɔ nyanwanɛ tɔ̃vɨn tɛɛ Habila ɓɛɛtɔyɛ.

25 Ɔ kɔyuutɔ ɔkɔɔ ɓɛ̃ɛ̃ shɔgbete au nyam ruubiinɛ. ɔ zɛtɔ nɛ shɔgbete ai shɔu au nwari nya aru Ɗa kpati roonɛ a koo i ji kpaa naraanɛ ɓa, ko ɔkɔɔma ɔ ji ranaa ɓa. U yɛ ranaa kɛpi kovya naa ɔkɛ ɓɛ̃ɛ̃ shɔgbete au nwanya a ukɔɔni a kolapani viya? 26 A ɗauni Ɗalapa yeenya guli bi kotipitɔ ama dɔdɔrim maruutɛ nɛ, << N yɛn guli bi kotipi sɔ̃ntɔ ɓagbete, ɓa bi kotipikɔ sheeli ɓa ama abi kolapayini.>> 27 Ruumkɔ,<< ɓagbete totti,>>tasitɛ nɛ shɔ kosi vigbete shɔ guliyɛ i ɗɔɔ̃nɛtɔ, ukɔɔ nɛ vigbete shɔ shɛshi a koo shɔ nisiyitɔ, aru vigbete a shɔ guli bi ɓa shɔ yai ɓɛɛji aɗɔn.

28 U dɔ̃ri Ɗalapa tɔ u kpa ɓɛɛjo Ɗa kpati roonɛ gbete shɔyɛ zɛunɔɔ bi gulinɛ ɓayɛ, aru nankɔ u bassi Ɗalapa niitɔ tɔ̃vɨn au seti ntanɛni; 29 Pɛ nizɛ u Ɗalapa upɛ yaa gbete lɛsi ɗɔtɔyɛ.