1 Kɛɗɔn moo lazɔrɔ waanɛ i toli nya, i ɗɔzɔɔ nalinɛ a dɔɔ, Yesɔ gaa u jaɗɔyi ruu geli a shanɛ: <<Ɔ kɔyuutɔ aru ɔkɔɔ ɔ̃nɛ vuru Farasiyayi ukɔ ɔ̃rɛ shɔ ɗakinɛ, i vikɔ̃linɛ raa shɔ ɗɔbii weze mɛɛli naa vuru. 2 Vigbete shɔkɛ kuki u nyanɛ shɔyɛ ɓɛlitɔ piti kpai, toti vigbete shɔkɛ ɓusinɛ dɔdɔrim shɔyɛ shɛshi ɓili sɔ̃ntɔ. 3 Vigbete akɛ shanɛ dɔkɨnri shɔyɛ ntatɔ ɗɔsẽsẽni piti kpai. vigbete ɔkɛ shanɛ a ɓusɨn jaa ɔ kuki nya jaatɔ, shɔyɛ shi sɔ̃n yujàá lapa a sharɛ.>>

4 N gelɔɔtɛ, masayi, ɔkɔɔ nta seti shɔ gbete i nyɔ jazɛ binɛ ama i kɛ nyɔnɛ i zɛnɔɔ viwɔɔ pɛlinɛ toti ɓa. 5 N yɛn tasɔɔ shɔgbete ɔ yɛ nta setitɔ: Ɔ nta seti Ɗalapa, shɔgbete akɨnti bi nyɔnɛ u kaka aɗɔn u lɔkaa a wɛrɛ yaa a suruni. Ã sisɨn nɛ ang nyani, ukɔ ɔ̃rɛ shɔ gbete ɔ ntau seti yɛ! 6 Shɔ mɛli jajjanɔ ɓa maani kobo ziti ɓaya? Piti kpai a shomni Ɗalapa ji suki ɓa yini niɓa. 7 Ko ɔ shɛnti yuu ma Ɗalapa gai tɛtɔ piti kpai. Ɔ kɔɔ nta setinɛ aru ɔ tɛɛ mashigãmɓolo tɛttɔ kiririni.

8 N gelɔɔtɛ shɔ gbete kɛ pɔ̃naanɛ a shɔ ɗekɨn nɛ ipɛ n maa, shɔzɛja yɛ pɔ̃naa ji a Ɗa jashonɛyi lapa a Ɗalapa ɗekɨn nɛ i pɛng ɓɛɛ. 9 Ama shɔ gbete kɛ bɛ̃ɛ̃ n ruubiinɛ a shɔ ɗekɨn n yɛn bɛ̃ɛ̃yi i ruubii jo a Ɗa jashonɛyi lapa ɗekɨn. 10 Shɔ gbete kɛ nwaanyanɛ kɔ̃linɛ a shɔzɛja yuu Ɗalapa yɛ yasiu ruuvinitɔ, ama shɔgbete kɛ nwaanya kɔ̃linɛ nɛ aru Ɗa suru Ɗalapa yɛ yasiu ruuvini ɓa.

11 Naa shɔkɛ n-tɔɔ nɛ a shɔ ɗekɨn aɗɔgbete Yahudawayi i toli nya aɗɔn, ko kpatiyi a shɔ yupɛ̃ni ɗekɨn ɔkɔɔ nta setinɛ nɔgbete ɔ yɛ raa ɔ yuunɛ, ko vigbete ɔ yɛ shayɛni, 12 aru Ɗa Suru yɛ matɔɔ vigbete ɔ yɛ shayɛ ɓɛjitɔ ko piɗaviya.

13 Jawɔɔ atette mɔɔyi geli Yesɔ nɛ,<<Shɔmala, geli mazɔ̃ pɛ u vɔsiu vivɔ gbete uɓeye vɔrɛ yasiu yɛ pɛ.>>

14 Yesɔ kasiunya nɛ, masa, pi ang naa pi nɛn ɔ̃ shɔ ruu yenɛ, ko nɛn vɔsi ɔ vivɔ gbete meyeu vɔrɛ yasɔɔ zitim piya? 15 Yɛ ɗekɨn a shanɛni nɛ, <<Ɔ kɔyuutɔ ɔkɔɔ ɔ̃nɛ shɔ mang pɛlinɛ, shɔzɛ suru tɔ̃vɨn ɔ̃nɛ a koo ɓa ukɔ ɔ̃rɛ vinaa gbete u awuni ɓa, ko u vinaa u ɔ̃ waanɛ pikoviya.>>

16 Kɛɗɔn Yesɔ geliyi kɛ ruɓusinɛm: Shɔwɔɔ siɗɔn shɔ vinaa u vishaanɛ ntɔtɔ a jaa waanɛ. 17 A geliu yuunɛ, n ji zɛ vigbete n yɛn pɛliyɛ ɓa, aru n mbuntɛ vishaamiyi tɛ̃nɛ ɓa.

18 Kɛɗɔn a shanɛ, <<N zɛ vi pɛlinɛtɛ, n yɛn zɨngli mbuntɛyi gbete a wɛrɛm kpai, n maa wɔɔ sɔɔ pẽniɓa-pẽniɓa, n tɛ̃ɛ̃ n visha gbete n kpaa a jaa ang vinaa ni kpai a ɓuzɨn. 19 Kɛɗɔn n yɛn gelin yuu kɛnɛ, Ɗa shaarintɛ n vi aɗɔn gbete n yɛ shaa saa waanɛ, n yɛn ɔ̃ saa waanɛ n kpaa yukɔnɛ ɓa n shaarɛ n ɓoorɛ n pɛli vigbete n kasi pɛlinɛyɛ.>>

20 Ama Ɗalapa geliunɛ, apɛ shokɔ! a zɨmbangkɔ a yɛ vɔrɛ, dɔdɔrim vigbete a tolaa yuu ɓam yɛ ɔ̃kɛ shɔwɔɔ ɓɛɛ, toti a ɓɛɛ ɓa.

21 Kɛɗɔn Yesɔ geli u jaɗɔyi nɛ, <<Shɔmpɛ vigbete yɛ kpaa shɔyi toli vinaa aru i yuu, ama a Ɗalapa ɗekɨn i vinaa ɓa ɗɔmɓa.>>

22 Kɛɗɔn Yesɔ geli u jaɗɔyi nɛ: <<Aru nankɔ n gelɔɔtɛ ɔ yɔri yuu ɓa aru vishaanɛ gbete ɔ shaarɛ ɔ ɔ̃ a suru ni ko aru fãrã gbete ɔ kasi tosinɛ abi yɛ ɓa.>> 23 Suru tɛɛ vishaanɛ tɛttɔ, bi maa tɛɛ fãrãyi tɛttɔ. 24 Kɨnnɔɔ pɛ a janɔyi: I ji ɓaa visha ɓa i ji yee visha ɓa, i jàá ɓa ko mbuntɛ gbete i pɔ̃ visha a ɗɔnni ɓa; Ɗalapa shaaritɔ! Ama tɛɛ janɔyi ɓa ya? 25 Pi awɔ tetteni pi kɛ yɔriyuunɛ yɛ zɛnɔɔtɔ u gesi dɔɔɗa a ɗekɨn a dɔɔɗa gbete yɛ ɔ̃ a suruni a koo piya? 26 Ɔ ji zɛnɔɔ vishonɛ ɓa a vi pɛ̃tɛ̃rɛ̃ ni ɓa, ɔ yɔri yuu kɛnɛ aru gãsini viya?

27 Kɨnnɔɔ pɛ a kowa laayi nɔgbete i bayɛ: i shovi ɓa ko i fãrã i tɔ̃ri ɓa, ama n gelɔɔtɛ kpati Sulemanu au vinaa ni kpai u fãrã wɔ ji yɛ kowa laa ɓa a kɔrinɛ niɓa. 28 Pɛ Ɗalapa kɔ barɛki wisi birɛ gbete shɔ kpaa nem ɗɔm ɓuru shɔ too a yaa. A ntasɛrɛ pɛ ɔkɔɔ ya? Ɔ shɔgbete ɔ ɔ̃ a koo u tɛɛ wisi tɛttɔ a saani, aru ivi ɔ sisɨn ãnɛ kɛ pẽtẽrẽ viya!

29 Ɔkɔɔ pɔ̃ sisɨn nɛ aru vigbete ɔ yɛ shaayɛ a vigbete ɔ yɛ ɓooyɛni. 30 (Aru shɔgbete i gɨn Ɗalapa ɓa a koo(pegan), i sɨn sisɨn jo a vishaanɛ a ɓoonɛ lee-lee) meyeu kolapa zɛ tɛttɔ nɛ ɔ kasitɔ. 31 Ɔ kã ɓɛjo Ɗa kpati roonɛ, Ɗalapa yɛ ãwɔ vimiyitɔ piti kpai.

32 N jàá vivaa pẽtẽrẽm ɔkɔɔ nta setinɛ, meyeu nta sisɨn purutɔ naa ɔkɛ kpaa tonɛnɛ a ɗɔgbeteu roo kpati aɗɔn. 33 Mɛli vi gbete awuni kpai a ã saa u kɛ shɔ raayi. Ɔ kãri ɔ yuu vi pɔ̃nɛ gbete yɛ lɛsi ɓa, ɔ pɔ̃ vinaa a kolapa, a ɗɔgbete shɔyɛ sẽu nɔɔ ɓa, aru ɓɔɔ yɛ zɛnɔɔ tunɛ ɓa, páà zɛnɔɔ lɛsinɛ ɓa. 34 Aru ɗɔgbete a vinaa aɗɔn a sisɨn ji a ɗɔwakɔ.

35 <<Ɔ ma ɔ ɔ̃ nokãkãri aru vigbete yɛ a sɔɔ yɛ kpai, ko pi lee piya, ɔ yaa ɔ pitila ɗɔɔ shaanɛ. 36 Naa Jawɛrɛ gbete u ɗɔɔ ɓɛɛ shɔwɛrɛ ganɛ nɛu sɔɔ wɛrɛ a ɗɔɔ yumusinɛ so tɛnɛ. Naa kanɛ kɛ waa nyejaanɛ, tɛ̃ɛ̃ti i yɛ ɓɛliu nyabatɔ. 37 Yɛ ɔ̃pɛ vibii nyantonɛ a jawɛrɛyi i ɗɔbiini naa i shɔwɛrɛ kɛ kpainɛ i ma rii sãn tɛ, n gelɔɔtɛ i shɔwɛrɛ yɛ zɔ̃ fãrã gbete hãyɛ, u geliyinɛ ɔ ɔ̃nɛ tipi, u ã ko pi gbete piya vishaanɛ. 38 Shɔwɛrɛu yɛ nta bi nyantɔnɛtɔ kɛ kpaa jawɛrɛyi nɛ i ma rii sãntɛ ko a tete zɨmɓa ko a gadi! 39 Ɔ zɛ tɛttɔ shɔwɛrɛ si tɔnɛn zɛ ɗagbete ɓɔɔ yɛ tou wɛrɛ yɛtɔ, si yɛ yaa ɓa nɛi torɛ i ɓɔɔ virɛ au wɛrɛni ɓa. 40 Ɔkɔɔ maa ɔ̃rɔɔtɛ kaka jɨng akɔrɔ ɔ ɔ̃ abi manɛni, aru jashɔzɛ anɛ yɛ ɔ̃ a ɗagbete ɔji pɔ̃ ɓa sisɨn niɓa.>>

41 Bituru hɨnɛ, <<Uɓeyelapa, a sha ruuɓusinɛm ji au yuu ya, ko aru shɔzɛ piti kpai?>>

42 Uɓeyelapa kasinyanɛ,<<Pi jawɛrɛ shɔpiya gbete u sẽrẽ aɗɔn gɨn u shɔwɛrɛ nyatɔ piya? Ukɔ ɔ̃rɛ shɔgbete u shɔwɛrɛ yɛ pɔ̃u au wɛrɛ u zɛtɔ, u ã ɓɛzɔɔ jawɛrɛyi vishaanɛ a ɗagbete tɔ̃vɨn. 43 Naa jawɛrɛ kɛ pɛli vishonɛm nɛ, ɓɛɛ shɔwɛrɛ kɛ sɔɔ wɛrɛnɛ kɛ kpaunɛ a ɗɔɔ pɛlinɛ yɛ nta yɛti puru waanɛǃ 44 N gelɔɔ vimtɛ, shɔwɛrɛu yɛ ã jawɛrɛu u vinaa kɛ piti kpai nɛu zɛsintɔ. 45 Ama naa jawɛrɛu kɛ shanɛ a sisɨn nɛn shɔwɛrɛ yɛtɛ kpɛlɛ nɛ yɛ a ɓa tɛ̃ɛ̃tini ɓa, u gaa ɓɛzɔɔ jawɛrɛyi wāānɛ, vɔshɔ a soro ni kpai, u gaa vishaanɛ shaanɛ a ɓoonɛni, gbete n-tiu sinɛ. 46 Kɛɗɔn lewɔɔ shɔwɛrɛ yɛ a wɛrɛtɔ a lee gbete jawɛrɛu ji pɔ̃ ɓa au sisɨn niɓa, sɔ̃n a ɗagbete ji zɛɓa. Kɛɗɔn u shɔwɛrɛ yɛ koliu kɛra-kɛra, u pɔ̃urɛ aɗɔgbete shɔ tasi shɔ ruuviniyi raa. 47 Jawɛrɛ au zɛ vigbete u shɔwɛrɛ kasinɛ u pɛliyɛ, ama ji mabii ɓa, ji pɛli vigbete u shɔwɛrɛ kasiyɛ ɓa, shɔ yɛ wau waanɛ. 48 Ama jawɛrɛ gbete ji zɛ vigbete ɓɛɛ shɔwɛrɛ kasinɛu pɛlinyɛ ɓa, a pɛli vi gbete yɛtɛ nɔgbete shɔ wauyɛ, shɔ yɛ wau ɓa bang ɓa. Shɔ gbete shɔ kɛ ãu vinɛ a naa ɓang, shɔ kã sɔ̃njo ɓang au naani, shɔ gbete shɔ kɛ ãu vinɛ a naa ɓang mɛɛsẽ, shɔ kã sɔ̃njo au naa ɓang mɛɛsẽ.

49 <<N adɔɔ yaa ɗɔɔnɛ a koo, nɔgbete n kasiyɛ shɔ si dɔɔtɛtɔǃ>> 50 N batizima aɗɔn gbete shɔ yɛ pɛling yɛ, n yɔri yuutɛ waanɛ setɛ n raaɓoonɛ yisi nyatɛ, 51 si ɔ pɔ̃ sisɨn nɛ ang ruu anɛnkɔ, yɛ pɔ̃ shɔzɛrɛ i ɔ̃ ɔ̃nɛbiinyatɔnɛ a koo ya? ɓa, ɓa ɔ̃nɛ binyatɔ̃nɛ ɓa, ama yuu vɔsinɛ. 52 Yunɛ dɔdɔrim yɛnɛ ɗekɨn wɛrɛ gbete shɔzɛ aɗɔn maani i yɛ vɔsikɛtɔ, shɔ taati i yɛ ɔ̃kɛ shɔnɔpɔ̃ a shɔ zitiyini, shɔ ziti ma i yɛ ɔ̃kɛ shɔnopɔ̃ a shɔ taatiyini. 53 Jaa ɓeye yɛ ɔ̃ nɔpɔ̃ a ɓɛɛ javɔshɔyini, javɔshɔyi i yɛ ɔ̃ nɔpɔ̃ a ɓeyeni, jaa ɓini yɛ ɔ̃ nɔpɔ̃ a ɓɛɛ jasoroyini, jasoroyi i yɛ ɔ̃ nɔpɔ̃ a ɓini ni, jaa ɓini yɛ ɔ̃ nɔpɔ̃ a ɓɛkpɛni soroni, jaa ɓeso yɛ ɔ̃ sɔ̃nji nɔpɔ̃ a ɓɛkpɛni soroni.

54 Kɛɗɔn Yesɔ geli shɔ sɔ̃nɛ, Ɔ kɛ zɛnɛ kunyasi kɛ rinɛ ɓiti-ɓiti ɔ shanɛ mii ɓutɛ a paa, ɔ shanɛ mii kolapa yɛ atɔ, see mii arɛ. 55 Ɔ kɛ ntanɛ sɔrɔ kɛ dusunɛ a ka nagang ɔ shanɛ, ɗɔɔ yɛ nwaatɔ ɔ̃rɛ nankɔ. 56 Shɔ-shɔɗakinɛyiǃ Ɔ zɛnɔɔ nɔɔ kɨnnɛtɛ, ɔ sharɛ nɔgbete ɗɔ ɔ̃ a bi, tipi a kolapani; Ama aru ivi ɔ zɛnɔɔ vi shanɛ ɓa a vi gbete Ɗalapa pɛliyɛ a jakɨntimini ɓa?

57 Aru ivi ɔ yee ruu ɓa awɔ yuu aru vi tɔ̃vɨn gbete ɔ yɛ pɛli ɓa? 58 Naa shɔwɔɔ kɛ n taanɛ shɔ ruu yeenɛyi i ɗekɨn, pɛli nɔgbete a yɛ pɛliyɛ ɔ ã zɔɔ naa siwɔ doo nyaɓa. A ji pɛliɓa yɛ n taa shɔ ruu yeenɛ ɗekɨn, shɔ ruu yeenɛwu yɛ ã yɛ ãã jadiyi manɛ a naa, jadiyi manɛ i lokaa a jaahm. 59 A yɛ ɔ̃ a jaahm a ɗɔwakɔ, n gelaatɛ, setaa sho vi gbete shɔ yeraatɛ piti kpai.