1 Aɗagbete Yesɔ au jadɔyi i atɛ maa-ni a Urushalima ni, naa ito Bɛtafaji tɛ a kɔpɔ zeetung. A ɗɔukɔ Yesɔ shɔ u jaɗɔyi ziti adekɨn, 2 Yesɔ geliu jaɗɔyi nɛ, <<Ɔ yɛnɛ jakomɔɔ gbete au dekɨn kɔ, ɔ kɛ tone ɔ yɛ zɛ Gãtola wɔ shɔ mau a laa, au jaa ni a ɗɔuni. Ɔ kalirɛ ɔ nti arɛ. 3 Shɔ wɔ kɛ hɨu ɔ ruu wɔne, ɔ geliu nɛ Uɓeyelapa kasitɔ, kɛ yisine yɛ sori tɔ.>>

4 Vimkɔ ɔ̃ nankɔ u tasi ruu gbete Ɗa jashone nwaya au yuu yɛː

5 <<Ɔ geli n sisɨn shɔ tipi Siyonayi nɛ,

<zɛpɛ, kpati kanɛ awɔ ɗɔbii,

Shɔ gbete tu yuu ɓayɛ u ɗɔ anɛ ayuu Gãtola,

u yuu jaa gãtɔla u ɗɔɔ yɛnɛ.> >>

6 Yesɔ jaɗɔyi i pɛli nagbete Yesɔ ãsiyi-nyayɛ. 7 I n ti Gãtola rɛ au jaani, i pɔ̃li fãrã au yuu bi, Yesɔ gẽrɛ au yuuni. 8 Moo waanɛ i ɓati fãrã a nyaɓa wɔyi pɔ̃li gapa a nyaba gbete Yesɔ tɛyɛ. 9 Moo gbete i a ɗekɨn a shɔgbete i gɨu akɨnti yɛ i ɗe nya lapanɛ,

<< Hosana a Dauda bɛjaa niiǃ >>

<< Ɗalapa u tasi shɔgbete a au Uɓeyelapa nii vɔɔ susãri biniǃ>>

<< Hosana a Ɗalapa bi. >>

10 Naa Yesɔ to Urushalima tɛ, komɔɔ piti kpai rãkũri, kopiya hɨnɛ, shom ɓɛ piya?

11 Mooyi kasi nya nɛ,<<shom pɛ Yesɔ, Ɗalapa jaa shone shɛ a Nazara a tipi Galili.>>

12 Yesɔ to yɛti jaa Ɗa a nyiki shɔ vii mɛlinɛ a wonɛni piti kpai. A rãati tɛburu gbete shɔ kɔsi saa a ɗɔnniyɛ a laɔ̃nɛ shɔ gbeteyi mɛli koroyi ni. 13 Yesɔ geli nɛ, <<Shɔ bee tɛttɔ a laabeenɛ nɛ Ɗalapa shanɛ, < N jaa Ɗa shɔ yɛ ɓanɛ wɛrɛ Ɗa gakinɛ,> ama ɔ risitɛ Ɓɔɔyi puru ɓune. >>

14 Shɔ noo gbãti a shɔ ɗɔɔgbutu i au ɗɔbii a jaa Ɗa, a gatirɛ. 15 Ama naa yupɛ̃ni shɔlansi a shɔ vitasine aru nyaãsine i zɛ vibiizaanɛ gbete Yesɔ pɛliyɛ a jaɓɛ̃rɛ̃ti yini i kaari nya a wɛrɛ Ɗa, <<Hosana a Dauda ɓɛjaa nii,>> Shɔmala Yahudayi i sisɨn lɛsi rɛ.

16 I hɨu nɛ.<<A nta vigbete jaɓɛ̃rɛ̃ti miyi i shatɛ ya?>>

Yesɔ kasinya nɛ, << Nn, ɔ ji ɓaliɓa a labeene ni ɓaya,

<<A jajayi nya a jabɛ̃rɛ̃tiyi nyani ɔ ji nta

nɔgbete shɔ bɛli Ɗalapa yɛ tɛpɛ -tɛpɛ ɓaya?>>

17 A yurɛ a yayirɛ a yɛkɛ komoo shɔ ɓaane Betani, a rookɛ ɗɔukɔ.

18 A gadi zɨɨnkɔ, a ɗagbete sã nyaba sɔne Urushalima, si nta wɔ̃ɔ̃ tɛ. 19 A zɛ laa sɨnti rɛ nyaba, a yɛrɛ aɗɔn ji kpaa viwɔ ɓa sejo gapa kɔ shɛli. Kɛɗɔn a geliu laa sɨntiu nɛ,<< mene a rɛɛ jaa tɔkɨn ɓa dangdangǃ >> au kɨnti ni tɛ̃ɛ̃ti laau gɔrikirɛ.

20 Naa Yesɔ jadɔyi i zɛ vintɛ, ɔ̃riikɛ vibii zaanɛ.

<<pɛlikɛ pikoviya laa sintiu gɔrikirɛ tɛ̃ɛ̃ti viya?>> I hɨurɛ.

21 Yesɔ kasi nyarɛ nɛ, <<Nizɛ n gelɔɔtɛ, ɔkɛ ã sisɨn nɛ ɔkɔ sɔɔ kɨntine, ɔyɛ zɛno ko iviya pɛline tɔ nɔgbete n pɛli a laa sɨnti mini yɛ, wɔsɔ̃ng ɔyɛ zɛno kɔpɔ gelinɛ tɔ nɛ, <Yɛnɛ, a shɛshi mii wapo,> Yɛ pɛlitɔ. 22 Ɔkɛ ã sisɨn nɛ, ɔyɛ kpaa vigbete ɔ gaki yɛ tɔ.>>

23 Yesɔ to jaa Ɗa, a ɗagbete u ɗɔ shɔ vi matine yɛ, yupɛ̃ni nyawane jaa Ɗa a shɔ noo zɔ̃neyi i au ɗɔbii nɛ. <<A kpaa kaka vim pɛlinem pi ɗɔpiya? >>I hɨ Yesɔ nɛ. <<pi ã kakan piya? >>

24 Yesɔ kasi nya nɛ,<< n yɛ hɨ ɔ ruu gbete shɛli. ɔkɛ kasin nyane, n yɛ gelɔɔ kaka gbete n pɛli vim awuni tɔ. 25 Yɔhana batizima u kaka shɛpiya? Shɛ a Ɗalapa ya, ko a shɔzɛ ɗɔ bi ya?>>

I nwanya ai noo i shaanɛ, << ukɛ shaane nɛ, <shɛ a Ɗalapa, > iyɛ hɨu ne,<kɛɗɔn ɔji ã tɔ̃vɨn ɓa au bi niɓa aru viya?> 26 Ama ukɛ shanɛ nɛ, <shɛ a shɔzɛ bi> u nta seti shɔzɛ, aru gbete shɔ ãyuu tɛttɔ nɛ Yɔhana pɛ Ɗalapa jaa shone. >>

27 Kɛɗɔn i kasi Yesɔ nyanɛ, <<u ji zɛɓa. >>

kɛɗɔn Yesɔ geliyinɛ, <<Nkɔ ma n yɛn gelɔɔ kaka gbete n pɛli vim awuni ɓa.>>

28 A zɛpikovi a sisɨn ni viya? Shɔwɔ ɗɔn u jaa ziti. yɛu jaa pɛ̃niba ɗɔbii a geliu nɛ, <<N jaa, yɛnɛ a pɛli vishone nɛm ang jaa.>>

29 Ɓɛjaa kasi nyanɛ,<< < N yɛɓa,> Ama a kɨntiu ni kɔsi sisɨn a yɛrɛ.

30 << Kɛɗɔn ɓeyeu yɛrɛ a geli ɓɛɛ jaa wɔɔ sɔ̃njo nankɔ. A kasinya nɛ, <n yɛ yɛtɔ, maye, > ama ji yɛɓa.

31 << Ai tete zitim pi pɛli vigbete ɓeye kasiyɛ piya?>>

I kasinyanɛ<<Jaa pɛ̃niba.>>

Yesɔ geliyi nɛ, <<Vigbete n gelɔɔmi nizɛ, shɔ sabɛnɛ tɛne a kpãntãnyi yɛ nta tɔ̃vɨn tɔ a Ɗalapa kpati roone ni. 32 Yɔhana awɔ ɗɔ bi nɛn tasɔɔ nyaba shɔ tɔ̃vɨn ɔ̃ne, ɔ ji ã sisɨn ɓau bi niɓa, ama shɔ saa bɛnɛ tɛne a kpãngtãng yini i ã sisɨn tɔ au bi ni. Akɨnti gbete ɔ zɛ vim tɛ, ɔ sisɨn ji kɔsi ɓa ɔ ji ã sisɨn sɔ̃n ɓa au biini ɓa.>>

33 Yesɔ geliyi nɛ, Ɔ wesho nɛ aru ruɓusinɛ wɔɔː shɔ wɔ si ɗɔn shɔli laa inabi au jaa. A doo ɗɔu piti a lɔng, a gbã too mii ɗɔgbete shɔ ka mii inabi aɗɔn, a maa jaa jagaa aɗɔn. Kɛɗɔn a ã jaau kɛ shɔ wɔyi neyi zɛsin tɔ a sã nyaba a yɛ zati rɛ. 34 Naa ɗagbete shɔ yee visha a jaa atɛ maani, a ɓaa ɓɛɛ jaa wɛrɛ nya a shoyirɛ neyi tɛsin nolaa a shɔgbete yasiyi jaa neyi zɛsin tɔyi naa.

35 Shɔ jaa zɛyi i sãu jaa wɛrɛyi rɛ; ai waa gbete, shɔgbete pɛsiu yɛ i nyou vɔrɔrɛ, a kɨntiu shɔgbeteu pɛsi na taati i lou a tari. 36 Kɛɗɔn a sho u jaayi wɔsɔ̃n ai ɗɔbii, tɛ ɓaa taati tɔ, shɔwiyi i pɛliyi jo ɗɔkɔ piti. 37 A kɨntiuni shɔ jaau, shokɛ ɓejaa ai ɗɔbii. A shanɛ,<< I yɛ nta majaa nyatɔ.>>

38 Ama naa shɔ gbeteyi zɛ jaau i zɛ ɓɛjaa tɛ, i geli zɔne, Shompɛ shɔ jaam ɓejaa. ɔ ane, u nyou vɔrɔ nɔgbete u yɛ shau wɛrɛ vɔɔ. 39 I sãu rɛ i shɛshiu a yɛti jaau a nyou vɔrɔ rɛ.

40 Yesɔ hɨyi kɛne<<Aruumkɔ, naa shɔ jaau kane au yuu, yɛ pɛli shɔgbete yasiyi jaau a naa kɛpikoviya?>>

41 I kasiu nyanɛ,<<yɛ nyo shɔ kɔ̃linɛ miyi vɔrɔ tɔ,>> <<Yɛ tuu jaau a ãkɛ shɔ wɔyi i sãriu rɛ, shɔ gbeteyi iyɛ ãu visha tɔ aɗa gbete shɔ hã noo laa anabi yɛ.>>

42 Yesɔ geliyi nɛ, <<Ɔ ji ɓaliɓa a laabeene Ɗalapa nya ruubii ni ɓayaː

<< <Tari gbete shɔ vimaaneyi i bẽẽ yɛ

ukɔ ɔ̃rɛ tari gbete au tɛɛ gãsiyi a tɔ̃vɨn piti kpai;

Uɓeyelapa ukɔ shorɛ nankɔ,

vim ɔ̃kɛtɛ vibii-zaane au noo ni?>

43 << Aru nankɔ Yesɔ shanɛ n gelɔɔ tɛ shɔ yɛ raa kpati roone tɔ a Ɗalapa wɛrɛ awɔ naani a ãkɛ shɔgbete iyɛ zɛnoo sãne tɔ yɛ. 44 Shɔ gbete kɛ wẽsine a tarim yɛ kaki kera-kera, ama shɔ gbete tariu kɛ shishine au yuu yɛ nau ɗettɛ -ɗettɛ.>>

45 Naa shɔ yupɛ̃ni nyanwane a jaa Ɗa a shɔ Farisaya i nta ruɓusine gbete Yesɔ geliyi tɛ, i kpaa a sisɨn nɛ nwanya jo ai yuu kɔ. 46 I kãa nyaba gbete iyɛ sãu yɛ, ama i nta kɛ seti moo ruugbete shɔwiyi tuu Yesɔ nɛ Ɗalapa jaa shone.