1 Gâ pâ əpʉ kə ko ngendja mbrə azü nə̂ Ndjapä nə, e-e ndje, e mbrə̈ kʉ mata ə̂në mə zâ ama də əpʉ nə kə Alaglizə lə əgɔ Galasi kɔ. 2 Tə̂ əlo dəmashi, əzü bale bale lə takpa tə̂ e kö ngendja ə̂në tshə lï ndə kə ko nə kɔ kpî gashe, ə lï də aərə ə̂në tshə sə də nə kɔ, kanika azü nə ka ka ə pa mə na gâ ye kane ka alane ko ngendja nə ne. 3 Alɔ ə̂në mə sə kə yi kumu əmə, mə sə kə wla azü nə, ə̂në e kê əndje gâ ye kɔ, də afraka ndə kə pa əndje ko ngendja nə ə̂në e kô kɔ ə na də nə mâ Jeruzalamə. 4 Kədə ə lï ndə kə pa mə na na ye də ə̂tə̂ əmə, ä də aəndje kə na ana nə.

5 Mə na ə wu e je alɔ ə̂në mə sə kə ro djoko lə əgɔ Masedwanə, mbrə ə̂në mə sə kə ro djoko lə əgɔ Masedwanə nə je. 6 Mə lo əte mâ ndə e je teashe, alabə̈ nə də̂ ne, tshekɨ əzɨ sə kə ro əmə mâ ndə e je, kanika e-e də ə̂tə̂ e, e ko aərə ə̂në mə sə də əgo nə kɔ mbrə ə̂dû ana nə̂ əmə nə. 7 Ənə̂ səye, mə yində nə yi ə pa mə wu e ə ro ə ro ne. Mə wusə̂ nə ə pa mə daka pə teashe mâ ndə e je, kədə Âgbɔ̂ Əyïngerə kə yində nə.

8 Bale, mə sə kə daka pə mâ Efazə ʉrrr ndjɔ gâ tə̂ əlo Patekɔtə, 9 mbrə ə̂në ə̈bə̈ âgbɔ̂ äwä krɔ̂ kə əmə gâ ye mbrə ə̈bə̈ kosəra, kədə alayïəpʉ nə ngba kəmə ndje ə ngba.

10 Alɔ ə̂në Timɔte kə yi kumu ye, e mbrə̈ ndə kə pa tshə sə sə mâ ndə e je də awa ne, mbrə ə̂në tshə sə kə mbrə kosəra nə̂ Âgbɔ̂ Əyïngerə nə mata əmə. 11 Rəkɔ, əzü bale wu wu ətshə tə amba əzü ne. E kö aərə ə̂në tshə ma əgo nə je kɔ kə ətshə, ndə kə pa tshə gu lə blatshe ndjɔ mâ tə̂ əmə tə ye, mbrə ə̂në ä də alaye sə kə ka mbrə ətshə.

12 Ə də əpʉ gâ pâ aye də Apolɔsə, mə pâ əpʉ kə ətshə tə bandanə ndə kə pa əndje də alaye na tshə wu e, bale ə də̂ ərə ə̂në tshelə ye yində kə mbrə nə ə̂në a lə ye kɔ də̂ kə sə̂ ne; tshə na je alɔ ə̂në tshə sɔtə̂ äwä nə.

13 Ala e gbɔ̈, e kä gâ pâ əpʉ lɔsu e! E mbrə̈ tə̂ e tə akoshe ə gbɔ̈ ə gbɔ̈! 14 E mbrə̈ aərə nə̂ e nɔ̂ tə̂ äwä kə yi tə̂ e!

15 Alaye əmə, mə sə kə yu tshuku ə̈bə̈ ərə kwatə̂mə kə e. E wusə̂ nə ə pa azü tshelə bəngʉ nə̂ Sətefanasə sə tə aangbʉlî azü ə̂në əndje zâ lɔsu əndje kə Âgbɔ̂ Əyïngerə lə ashɔ əgɔ Akayi kɔ â əndje kô tə̂ əndje nɔ̂ ndə kə mbrə ə̂rɔ̂ nə kə azü nə̂ Ndjapä. 16 E-e ndje, e djï əpʉ ama marä tə̂ azü rə, ndje də azü nɔ̂ ə̂në əndje də aəndje ə mbrə kosəra nə â sə kə wu əyo kɔ.

17 Tshelə əmə sə də ə̂rû mbrə Sətefanasə nə də Fɔrətunatusə gâ ndə Akayikɔsə ə̂në əndje nâ ndə kə wu əmə kɔ. Əndje sə gâ ə̂sə̂ e ə̂në e sə sə je ne kɔ, 18 mbrə ə̂në əndje zɨ̂tɨ lɔsu əmə də ənə̂ e gâ ye. Rəkɔ, e wüsə̂ kə tra marä tə̂ azü rə.

19 Alaglizə lə ashɔ əgɔ Azi bla e. Akilasə də Prisilə də Laglizə ə̂në ə sə lə anda nə̂ əndje kɔ bla e tə bandanə də əɨrɨ Âgbɔ̂ Əyïngerə. 20 Alaye nɔ̂ bla e.

E blä tə̂ e lə takpa tə̂ e tə̂ äwä kə ɔ ama e tə alaye azü.

21 Əmə Palɔ, mə ta aəpʉ səke də kəna əmə ndə kə bla e.

22 Kədə ə̈bə̈ əzü kə yində Âgbɔ̂ Əyïngerə nə yi ne, əndje drä ətshə gâ ye!

Maranata! Âgbɔ̂ Əyïngerə, nä gâ əmə!

23 Ə̂rɔ̂tə̂ Âgbɔ̂ Əyïngerə Jezu sə̈ də e!

24 Mə yində e nɔ̂ lə Jezu Kristə nə.