1 Alaye əmə, alɔ ə̂në mə nâ mâ ndə e ndə kə pa mə yisə̂ əpʉ ərə nə̂ Ndjapä kə e, ə̂në tshə zâ wû gâ ye kɔ, mə pâ əgbro aəpʉ pâ wala mə pâ aəpʉ pâ tə̂ äwä kə wusə̂ âdâ ərə ne. 2 Mbrə ə̂në mə zâ ama ə pa mə wusə̂ ə̈bə̈ ərə wu bale kpî ne, alɔ ə̂në mə sə lə takpa tə̂ e kɔ, kʉtə̂ Jezu Kristə, Jezu Kristə nə ə̂në əndje kû ətshə gâ ala masheyɔ gâ ye kɔ. 3 Əmə də ə̂tə̂ əmə, mə sə̂, tə̂-e, ngotə̂ e tə əzü ə̂në mə mɔ ə mɔ, mə sə̂ də awa lə əmə, ə sə kə gu ə gugu ngbatshe. 4 Əpʉ ama əmə də ərə ə̂në mə yîsə̂ nə kɔ sə sə bale mata kə pa əpʉ nə̂ azü tə̂ äwä kə wusə̂ ərə nə̂ əndje ə̂në ə za lɔsu azü kɔ ne. Bale, ə ka gâ pâ awlra nə̂ Âgbɔ̂ Yîrə̂ ə̂në tshə yîsə̂ nə gashu tə̂ äwä əpʉ ə̂në mə pâ kɔ, 5 kanika lɔsu e ka ka gâ pâ kə wusə̂ âdâ ərə nə̂ azü ne, bale ə ka gâ pâ awlra nə̂ Ndjapä.

6 Kandää, əpʉ kə wusə̂ âdâ ərə kə sə̂ â ä sə kə yisə̂ nə kə azü nə̂ Kristə ə̂në əndje nê gâ ye lə əpʉ lɔsu kɔ. Bale, ə sə sə tə kə wusə̂ âdâ ərə nə̂ azü tshepashɔ səye, wala tə ənə̂ əgbro azü ə̂në əndje sə gâ pâ ashɔ səye kɔ ne, əndje ə̂në angwa əndje ə yi je kɔ. 7 Ä sə kə yisə̂ əpʉ kə wusə̂ âdâ ərə nə̂ Ndjapä, ə̂në tshə zâ wû, ə̂në azü wu âdâ kumu əndje wu də nə ne kɔ. Angbʉlînə ndə kə pa Ndjapä mbrə tshepashɔ, Ndjapä nə gâmba kə wusə̂ âdâ ərə səkɔ gâ ye ndə kə pa tshə ko əzə̂ gâ ə̂sə̂ ə̂yî. 8 Ə̈bə̈ əgerə əzü bale lə takpa tə̂ əgbro azü tshepashɔ səye wûsə̂ əpʉ kə wusə̂ âdâ ərə səkɔ wû ne, mbrə ə̂në kədə əndje kə wû kəmə ə̂sə̂ nə, əndje sə̂ sə̂ kə ku kəmə Âgbɔ̂ Əyïngerə ə̂yî gâ ala masheyɔ nə ne. 9 Bale, ə sə mata ə̂në Fraka nə̂ Ndjapä pâ əpʉ ə pa:

«Ərə ə̂në ala əzü wû wû ne,

ərə ə̂në ətu əzü djî djî əpʉ nə ne,

də ərə ə̂në lɔsu əzü tê tê gâ pâ nə ne kɔ,

Ndjapä gâmba mbrə azü

ə̂në əndje yində ye kɔ.»*2.9 Wu Eza 64.3.

10 Bale, əzə̂ də̂ Ndjapä yîsə̂ ərə səkɔ gashu kə əzə̂ tə̂ äwä Âgbɔ̂ Yîrə̂ kɔ. Mbrə ə̂në Âgbɔ̂ Yîrə̂ nə wusə̂ aərə nɔ̂, sɔ tə̂ aəpʉ ə̂në ə sə mâ tə̂ lɔsu Ndjapä nə kɔ. 11 Rəkɔ, əde kə wusə̂ aəpʉ ə̂në ə sə tə̂ lɔsu əzü kɔ? Kʉtə̂ yîrə̂ əzü nə də ə̂tə̂ ye ə̂në ə sə lə ye kɔ kə wusə̂ nə. Äwä bale rə ndje, əzü bale wusə̂ ərə wu gâ pâ əpʉ ərə nə̂ Ndjapä ne, kʉtə̂ Âgbɔ̂ Yîrə̂ nə̂ Ndjapä nə kə wusə̂ nə. 12 Ənə̂ əzə̂, ə də̂ yîrə̂ tshepashɔ səye də̂ a sɔ̂tə̂ nə kɔ ne, bale a sɔ̂tə̂ Yîrə̂ ə̂në ə tô mâ ndə Ndjapä â nâ kɔ, ndə kə pa a wusə̂ ərə ə̂në Ndjapä za kə əzə̂ tə̂ äwä ə̂rɔ̂tə̂ ye kɔ. 13 Bale, ä sə kə pa əpʉ ərə səkɔ, ä pa pa tə̂ äwä kə wusə̂ âdâ ərə nə̂ azü ne. Bale, ä pa əpʉ nə tə̂ äwä ərə ə̂në Yîrə̂ Ndjapä nə ə yisə̂ nə kə ä kɔ. Âdâ ərə ə̂në ä sə kə yisə̂ âdâ əpʉ aərə nə̂ Yîrə̂ nə kə azü tə̂ äwä aəpʉ ə̂në Yîrə̂ nə ə ko gâ lə ama ä kɔ.

14 Bale, əzü ə̂në tshə sə sə də Yîrə̂ Ndjapä nə ne kɔ, tshə sə sə kə yində əpʉ aərə nə̂ Yîrə̂ Ndjapä nə ne. Mbrə ə̂në ə sə tə aərə yïrə̈ lə ala ye â tshə lï lï ndə kə pa tshə wusə̂ nə ne. Əzü lï ndə kə pa tshə wusə̂ âdâ əpʉ nə kʉ tə̂ äwä Yîrə̂ nə. 15 Bale, əzü ə̂në tshə sə də Yîrə̂ Ndjapä nə, tshə wusə̂ âdâ aərə nɔ̂ â əzü bale lï lï ndə kə pa tshə wusə̂ âdâ ye ne. 16 Mbrə ə̂në Fraka nə̂ Ndjapä pâ əpʉ ə pa:

«Əde kə yêrɔ əpʉ ə̂në ə sə tə̂ lɔsu Əyïlingû kɔ?

Əde kə lï ndə kə pa tshə yisə̂ ərə ə yi kə ətshə?»*2.16 Wu Eza 40.13.

Kandää, ənə̂ əzə̂, a sə də əpʉ ə̂në ə sə tə̂ lɔsu Kristə nə kɔ tə̂ lɔsu əzə̂.