1 Afariza də Asadusa nâ gâ ngotə̂ Jezu. Əndje yîndə kə le ətshə ə le ə yû ətshə ndə kə pa tshə ma ə̈bə̈ ərə ə̈lü alane wu ndə kə yisə̂ nə ə pa Ndjapä kə wlâ əne kɔ. 2 Jezu kîrə əpʉ kə əndje ə pa: «Də lɔkədɨ, e pa: "Tshekra, tshelafɔ sə kə sə tə ə̂rɔ̂nə, mbrə ə̂në tshelafɔ nə do ə dro." 3 Də əzɨ, e pa: "Yavrɨ sə kə ni nə kpəsəye, mbrə ə̂në tshelafɔ nə dro â yində kə bu nə ə bu." E wusə̂ kə yisə̂ âdâ aərə tshelafɔ, bale, e lï lï ndə kə wusə̂ âdâ aərə tshe kpəsəye ne! 4 Azü tshe kpəsəye ə̂në əndje sə tə aəmbrʉ azü ə dji əpʉ ama Ndjapä dji ne kɔ yu tshuku ə̈bə̈ ərə ə̈lü. Bale, əndje sə sə kə wu nə bale ne, kʉtə̂ ərə ə̈lü ə̂në ə wûtu gâ tə̂ awopandəma Ndjapä Jonasə kɔ ə lî gâ ye.» Mandânə, tshə kâtə̂ əndje tʉ ə rô ərə nə̂ ye.

5 Alɔ ə̂në atrawaya nə gbô ə̂ngû nə djoko tshî gâ ye kɔ, ə̂sə̂ amapa ndə kə pa əndje ko djêrə əndje gâ ye. 6 Jezu pâ kə əndje ə pa: «Ala e në tə̂ əyï mapa nə̂ Afariza də Asadusa.» 7 Atrawaya nə pâ əpʉ lə takpa tə̂ əndje ə pa: «Tshə pâ əpʉ sə rə mbrə ə̂në ä kô amapa kô ne kɔ.»

8 Jezu wûsə̂ əpʉ ə̂në əndje sə̂ kə pa nə kɔ ə pâ: «Mbrə yekɔ də̂ e sə kə pa ashera lə takpa tə̂ e mbrə mapa ə̂në e sə sə də nə ne kɔ? Ah! Azü aya lɔsu! 9 E të të pa ə wusə̂ ərə ne a? E lï tshelə e lï gâ pâ amapa mindû ə̂në azü sake mindû (5 000) zɨ̂ kɔ ne a? E rɔ̂ ə̂dû nə ə sû kakli vəkɔ â e gû na ye də nə kɔ? 10 E lï tshelə e lï gâ pâ amapa mindû amanə bishi ə̂në azü sake vəna (4 000) zɨ̂ kɔ ne a? E rɔ̂ ə̂dû nə ə sû kakli vəkɔ â e gû na ye də nə kɔ? 11 Ə mbrə atâ â e dji tshelə əpʉ ə̂në mə pâ kə e kɔ dji ə pa mə pâ əpʉ pâ gâ pâ mapa ne kɔ? Bale, e gbɔ̈ ndə akwa e tə̂ əyï mapa nə̂ Afariza də Asadusa.» 12 Bale, atrawaya nə djî tshelə əpʉ nə ə pa ə də̂ əyï mapa ndə kə mbrə də mapa də̂ tshə pâ əpʉ nə mbrə nə kɔ ne. Bale, tshə pâ əpʉ gâ pâ kə yisə̂ ərə nə̂ Afariza də Asadusa.

13 Jezu yî kumu ye mâ lə əgɔ Sezare nə̂ Flipə. Tshə yû atrawaya nə̂ ye ə pa: «Azü pa Əgblə nə̂ Əzü sə tə əde?» 14 Əndje kîrə əpʉ ə pa: «Alabə̈ nə pa Zââ Batistə, alabə̈ əndje pa Eli, alabə̈ aata əndje pa Jeremi wala ə̈bə̈ awopandəma Ndjapä.» 15 Bale, Jezu yû əndje ə pa: «Ka ənə̂ e, e pa mə sə tə əde?» 16 Shemɔ Piarə kîrə əpʉ ə pa: «Əbə, bə də̂ Kristə, Ɨrɨ Ndjapä ə̂në tshə sə tə sorô kɔ.» 17 Jezu zâ əpʉ ə pâ kə ətshə ə pa: «Ənə̂ zə tə ə̂rɔ̂nə, Shemɔ, ɨrɨ Zââ. Əpʉ ə̂në bə pâ kɔ, ə də̂ əzü də̂ kə yisə̂ nə gashu kə əbə kɔ ne, bale, Abä əmə ə̂në tshə sə mâ lafɔ kɔ kə yisə̂ nə kə əbə kɔ. 18 Bale, əmə, mə pa kə əbə ə pa, bə sə tə əkpʉ*. Ə sə kə sə gâ pâ əkpʉ səye də̂ mə sə kə mbrə Laglizə nə̂ əmə. Bale, kuzu sə sə də awlra kə ma ə̈bə̈ ərə bale tə̂ ye ne. 19 Mə sə kə ko akrə̂lê Əgɔngerə tshelafɔ kə əbə: ərə ə̂në bə sə kə kânga äwä nə pâ ashɔ, Ndjapä sə kə kânga äwä nə mâ lafɔ-e; ərə ə̂në bə sə kə krɔ äwä nə pâ ashɔ, Ndjapä sə ndje kə krɔ äwä nə mâ lafɔ-e.» 20 Bale, Jezu ngâ kə atrawaya nə̂ ye nə ə pâ: «E pä ndə nə pä kə ə̈bə̈ əzü bale ə pa mə sə tə Kristə ne.»

21 Kʉ pə tə̂ alɔ nə səkɔ, Jezu vɔ̂tə̂ kə yisə̂ nə gashu kə atrawaya nə̂ ye ə pa: «Ə lï ndə kə pa mə na mâ Jeruzalamə, â aâgbɔ̂ azü də aâgbɔ̂ azü nə̂ aawotokrɔ gâ ndə aawoyisə̂ âgbɔ̂ əpʉ nə̂ Mayïzə sə kə gi əyo tə̂ əmə tə bandanə. Əndje sə kə wo əmə â tə̂ vəta əlo nə, mə sə kə she nə.» 22 Piarə nə zâ Jezu ə gî tə̂ ye də ətshə teashe gashe â vɔ̂tə̂ kə nga kə ətshə ə pa: «Ndjapä bäta əbə, Âgbɔ̂ Əyïngerə! Ə sə sə kə wutu gâ tə̂ zə ne!» 23 Bale, Jezu dô tə̂ ye ə pâ kə Piarə nə ə pa: «Gï tə̂ zə ngrʉ̂ gashe tə̂ əmə, Sataa! Bə sə tə ə̈bə̈ ərə kə kânga äwä tə̂ əmə. Mbrə ə̂në kə tegbɔ kumu zə sə sə tə ənə̂ Ndjapä ne, bale, ə sə tə ənə̂ azü.»

24 Bale, mandânə, Jezu pâ kə atrawaya nə̂ ye nə ə pa: «Kədə əzü kə yində kə na mandâ əmə, tshə wə̈ra tə̂ ye tə̂ ye də ə̂tə̂ ye, ə zä masheyɔ nə̂ ye ka ə za äwä əmə. 25 Mbrə ə̂në, əzü ə̂në tshə yində kə bata əwu ye, tshə sə kə tshu nə. Bale, əzü ə̂në tshə sə trö ndə kə tshu nə mbrə əmə, tshə sə kə sə tə sorô. 26 Kədə ə̈bə̈ əzü kə sɔtə̂ aərə tshepashɔ səye nɔ̂ â sə sə tə sorô ne, ərə yekɔ də̂ tshə sə kə sɔtə̂ nə mandânə? Ərə yekɔ də̂ əzü lï ndə kə za nə ndə kə yɔ də sorô? 27 Mbrə ə̂në Əgblə nə̂ Əzü sə kə gu nə də atrawaya nə̂ Ndjapä lə ə̂yî Abä nə. Bale, tshə sə kə kra tə̂ əzü bale bale ə lï də kosəra nə̂ ye. 28 Djatra əpʉ, mə pa kə e: alabə̈ azü bale bale lə takpa tə̂ azü ə̂në əndje ka kotəye kɔ, əndje sə sə kə tshu nə ne ʉrrr, əndje wu Əgblə nə̂ Əzü ə̂në tshə sə kə gu nə də ngerə nə̂ ye kɔ gâ ye kane.»