Mateus 2

Aawopra âdâ aambrepe nâ ə vrɔ̂ Jezu

1 Əndje zû Jezu mâ Beteləyamə lə əgɔ Jude tə̂ alɔ ə̂në Erɔdə sə tə əyïngerə. Mandânə, aawopra âdâ aambrepe âfɔ tə ətshe ə̂në alɔ sə kə afɔ tə̂ nə kɔ, ə yî kumu əndje mâ Jeruzalamə, 2 ə yû ətshe ə pa: «Əyïngerə nə̂ Ajuwufu ə̂në əndje zû ətshə katshä katshä səye kɔ sə kotâ a? Mbrə ə̂në ä wû ambrepe ye tə̂ ətshe ə̂në alɔ sə kə afɔ tə̂ nə kɔ, â ä nâ ndə kə vrɔ ətshə kɔ.»

3 Alɔ ə̂në əyïngerə Erɔdə djî əpʉ səkɔ, kumu ye kpê pâ əndu ye də azü əgɔ Jeruzalamə nɔ̂. 4 Tshə ngbô aâgbɔ̂ azü nə̂ aawotokrɔ də aawoyisə̂ âgbɔ̂ əpʉ nə̂ Mayïzə əgɔ nə gâ tə̂ nə ə yû əndje ə pa: «Əndje sə kə zu Kristə nə mâta a?» 5 Əndje kîrə əpʉ kə ətshə ə pa: «Mâ Beteləyamə lə əgɔ Jude. Mbrə ə̂në əpʉ ə̂në awopandəma Ndjapä tâ kɔ kə səye:

6 "Əbə Beteləyamə, ashɔ əgɔ Jude,

djatra əpʉ, bə sə sə tə aya əgɔ

lə əgbro agala nə̂ əgɔ Jude ne,

mbrə ə̂në, lə zə də̂ ə̈bə̈ əyïngerə sə kə wutu nə

ndə kə yisə̂ äwä kə azü nə̂ əmə, azü əgɔ Isərayalə."»*2.6 Wu Mish 5.1.

7 Bale, Erɔdə ê aawopra âdâ aambrepe nə lə angbanə ə yû əndje tə̂ djatra alɔ ə̂në ambrepe nə wûtu tə̂ nə kɔ. 8 Mandânə, tshə wlâ əndje mâ Beteləyamə nə ə pâ kə əndje ə pa: «E nä ə djï əpʉ gâ pâ aya əgblə nə tə ə̂rɔ̂nə. Alɔ ə̂në e sɔtə̂ ye, e gü ə pa ndə nə kə əmə kanika əmə ndje də ə̂tə̂ əmə, mə na ə vrɔ ətshə.»

9 Mandânə ə̂në əndje djî əpʉ nə̂ əyïngerə nə gâ ye kɔ, əndje nâ na ye. Bale, əndje wû ambrepe nə ə̂në əndje wû ətshinə tə̂ ətshe ə̂në alɔ sə kə afɔ tə̂ nə kɔ. Ambrepe nə sə kə na ətshi əndje ʉrrr ə nâ ə kâ gâ tə̂ ətshe ə̂në əgblə nə sə tə̂ nə kɔ. 10 Alɔ ə̂në əndje wû ambrepe nə kɔ, tshelə əndje mɔ̂ tə bandanə. 11 Əndje lî gâ lə anda nə ə wû aya əgblə nə də əyï nə də Marə̂, əndje gbə̂te ə vrɔ̂ ətshə. Mandânə, əndje djɔ̂ tshelə agbarə nə̂ əndje ə krâ tə̂ ye də lɔrə, də dukanə gâ ndə yombo ə̂në əndje dji əɨrɨ nə ə pa də mirə kɔ. 12 Mandânə, Ndjapä pâ əpʉ kə əndje lə ə̈lü ndə kə pa əndje do tə̂ əndje do djoko ndə Erɔdə nə ne. Əndje zâ ə̈bə̈ ata äwä kpî â gû na ye gâ lə əgɔ nə̂ əndje.

Jozafu kpê də Jezu gâ Ejipətə

13 Alɔ ə̂në aawopra âdâ aambrepe nə gû na ye gâ ye kɔ, ə̈bə̈ trawaya nə̂ Əyïlingû bʉ̂ gâ tə̂ Jozafu lə ə̈lü ə pâ: «Äfɔ ə zä aya əgblə nə də əyï nə, ə kpë na ye mâ lə əgɔ Ejipətə ə sə̈ pə mâ je ʉrrr kədə mə za ama kə əbə gâ ye kane ka bə do tə̂ zə ə gu. Mbrə ə̂në Erɔdə sə kə pra äwä ndə kə wo aya əgblə nə.»

14 Jozafu âfɔ də tsheləbu ə zâ aya əgblə nə də əyï nə ə kpê də əndje na na ye mâ lə əgɔ Ejipətə. 15 Tshə sə pə mâ je ʉrrr â Erɔdə tshû. Ərə nə wûtu ə lï də əpʉ ə̂në Əyïlingû pâ tə̂ äwä awopandəma Ndjapä ə̂në ə pa: «Mə ê ɨrɨ əmə ndə kə pa tshə wutu lə əgɔ Ejipətə.»*2.15 Wu Ɔze 11.1.

Erɔdə wô aneshe lə Beteləyamə

16 Alɔ ə̂në Erɔdə wû ə pa aawopra âdâ aambrepe nə frɔ̂ ətshə gâ ye kɔ, əkɔ zâ ətshə tə bandanə. Tshə zâ ama ndə kə pa əndje wo aya aneshe koshe nɔ̂ ə̂në əndje sə də ə̂ngû bishi də əndje sə̂ ə̂në əndje te te pa ə jo ə̂ngû bishi ne kɔ, ə̂në əndje sə lə əgɔ Beteləyamə də ə̂dû əgɔ nə̂ ye nɔ̂ kɔ. Erɔdə mâ ərə səkɔ ə lï də əpʉ ə̂në aawopra âdâ aambrepe nə pâ kə ətshə gâ pâ əlo kə wutu ambrepe nə kɔ. 17 Bale, əpʉ ə̂në awopandəma Ndjapä Jeremi pâ leme-e kɔ, ndəma nə mbrə̂ gâ ye, tshə pâ əpʉ ə pa:

18 «Əndje djî ə̈bə̈ râwâ mâ Rama.

Əzü sə kə kɨ nə ə sə kə dɨ tshema ye ro pâ nə.

Rashalə kə kɨ mbrə aneshe nə̂ ye kɔ.

Tshə wə̂ra tə̂ ye ndə kə dji əpʉ ə̂në əndje pa kə ətshə ndə kə zɨtɨ lɔsu ye kɔ gâ ye,

mbrə ə̂në aneshe nə̂ ye sə sə je ne.»*2.18 Wu Jer 31.15.

Jozafu tô mâ Ejipətə ə gû mâ Nazaratə

19 Alɔ ə̂në Erɔdə tshû gâ ye kɔ, ə̈bə̈ trawaya nə̂ Əyïlingû bʉ̂ gâ tə̂ Jozafu lə ə̈lü mâ Ejipətə, 20 ə pâ kə ətshə ə pa: «Äfɔ ə zä aya əgblə nə də əyï nə ə dö tə̂ zə ə gü mâ lə əgɔ Isərayalə ye. Mbrə ə̂në azü nə ə̂në əndje yində kə wo aya əgblə nə kɔ, əndje tshû gâ ye.»

21 Jozafu âfɔ ə zâ aya əgblə nə də əyï nə nə â dô tə̂ ye də əndje gu nə mâ lə əgɔ Isərayalə. 22 Bale, ə̂në Jozafu djî ə pa Arkelawusə sə tə əyïngerə gâ pâ əgɔ Jude mandâ abä nə də Erɔdə kɔ, awa ndə kə pa tshə gu mâ lə əgɔ Jude nə mbrə ətshə ə mbrə. Bale, Ndjapä pâ əpʉ kə ətshə lə ə̈lü, tshə gû ə sə̂ lə ashɔ əgɔ Galile. 23 Tshə mâ əgɔ lə ə̈bə̈ gala ə̂në əɨrɨ nə kə də̂ Nazaratə kɔ, ndə kə pa ndəma əpʉ aawopandəma Ndjapä mbrə. Əndje tâ ə pa: «Əndje sə kə e ətshə əzü əgɔ Nazaratə.»