1 «E wü-a! Əgɔngerə tshelafɔ sə mata ə̈bə̈ əyïnga anda ə̂në tshə wûtu pə-e də əzɨ ndə kə ko azü gâ tə̂ kosəra kəndɨ vinyə nə̂ ye. 2 Tshə djî tə̂ ye də alayïkosəra nə ndə kə pa tshə piyi əndje də ngendja ə̂në ə lï də ngendja kosəra nə̂ əlo bale mbrə əzü bale. Mandânə, tshə wlâ əndje gâ lə kəndɨ vinyə nə̂ ye nə. 3 Tshə kwâtə̂ye ə wûtu ə̂në alɔ ô teashe gâ lafɔ kɔ ə wû alabə̈ azü ə̂në əndje kâ gâ ə̂grû tshelagɔ ə wû ərə kə ma nə wû ne kɔ. 4 Tshə pâ kə əndje ə pa: "E-e ndje, e nä na ye gâ lə kəndɨ vinyə nə̂ əmə ə mä kosəra. Mə sə kə piyi e də äwänə." 5 Əndje rô gâ lə kəndɨ nə. Əyïnga kəndɨ nə wûtu kwatə̂ye ə̂në alɔ kâ kpə ə̂grûtshe kɔ, ndje mandânə, ə̂në alɔ nɔ̂nɔ tə̂ ye gâ ə̂grû nə gâ ye kɔ ə mâ kʉ rə. 6 Ə̂në alɔ dɨ̂ gâ ye kɔ, tshə wûtu kwatə̂ye, ə wû alabə̈ aata azü nə ə̂në əndje kâ gâ ə̂grû tshelagɔ nə kɔ. Tshə pâ kə əndje ə pa: "Mbrə yekɔ də̂ e ka kotəye ʉrrr ngbi â ma ə̈bə̈ ərə ma bale ne kɔ?" 7 Əndje kîrə əpʉ kə ətshə ə pa: "Mbrə ə̂në ə̈bə̈ əzü bale ə̂në tshə ko ä gâ tə̂ kosəra kɔ guta gu ne." Tshə pâ kə əndje ə pa: "E-e ndje, e nä na ye gâ lə kəndɨ vinyə nə̂ əmə."

8 «Ə̂në alɔ dɨ̂ gâ ye kɔ, əyïnga kəndɨ nə pâ kə awobata aərə nə̂ ye ə pa: "Ë alayïkosəra nə ə pïyi ngendja nə̂ əndje kə əndje, ə vɔtə̂ nə tə̂ azü tshe mandânə ka ə wutu gâ tə̂ aangbʉlî azü nə." 9 Alayïkosəra nə ə̂në əndje ê əndje də lɔkədɨ nə kɔ nâ, əzü bale bale sɔ̂tə̂ ngendja kosəra nə̂ əlo bale. 10 Aangbʉlî alayïkosəra nə nâ mandânə, əndje wû ənə̂ əndje ə pa alane sə kə ko ənə̂ alane ngendja nə rô pâ nə. Bale, əndje sɔ̂tə̂ ndje, əzü bale bale, ngendja kosəra nə̂ əlo bale. 11 Alɔ ə̂në əndje sə kə ko ngendja nə kɔ, əndje pâ tə̂ əyïnga kəndɨ nə lə wâyâ 12 ə pa: "Azü ə̂në əndje nâ djoko mandânə kɔ, əndje mâ kosəra kʉ mbrə ə̈nü alɔ bale, bə pîyi əndje mata ä, ä-ä ə̂në ä wû əyo də əzɨ ʉrrr ngbi tə̂ ə̈kü alɔ kɔ." 13 Bale, əyïnga kəndɨ nə kîrə əpʉ kə ə̈bə̈ nə bale lə takpa tə̂ əndje ə pa: "Gbɔbəngâ! Mə ma əmbrʉ ərə ma kə əbə ne. Əzə̂ də aəmə djî tə̂ əzə̂ djî gâ pâ ngendja kosəra nə̂ əlo bale ne a? 14 Zä ngendja nə̂ zə ə gü na ye. Mə yində kə za kʉtə̂ ngendja ə̂në mə za kə əbə kɔ kə əzü ə̂në tshə nâ djoko mandânə kɔ. 15 Mə lï lï ndə kə ma ərə ə̂në tshelə əmə yində nə kɔ də ngendja nə̂ əmə ne a? Tshelə zə kô əbə mbrə ə̂në mə sə tə ə̂rɔ̂ əzü kɔ a?"» 16 Jezu kwâtə̂ye ə pâ: «Rəkɔ, azü tshe mandânə sə kə sə tə azü tshitshinə â azü tshitshinə sə kə sə tə azü tshe mandânə.»

17 Alɔ ə̂në Jezu sə̂ kə na na ye mâ Jeruzalamə kɔ, tshə kô atrawaya nə̂ ye morofo amanə bishi kpî tə̂ ətshe gashe ə pâ kə əndje, lə äwä, ə pa: 18 «E wü-a! A sə kə na mâ Jeruzalamə, azü sə kə za Əgblə nə̂ Əzü gâ lə kəna aâgbɔ̂ azü nə̂ aawotokrɔ də aawoyisə̂ âgbɔ̂ əpʉ nə̂ Mayïzə. Əndje sə kə wa ngbanga kuzu gâ lə kumu ye 19 ə sə kə za ətshə gâ lə kəna azü ə̂në əndje wûsə̂ Ndjapä wû ne kɔ ndə kə pa əndje mɔ ətshə, ə da ətshə də djakwa, ə ku ətshə gâ ala masheyɔ â tə̂ vəta əlo nə, tshə sə kə she nə.»

20 Bale, əyï aləvu Zebede nâ də aneshe nə̂ ye gâ ngotə̂ Jezu ə tê gâ tshekudu ye ndə kə yu ətshə tə̂ ə̈bə̈ ərə. 21 Jezu yû ətshə ə pa: «Bə yində yekɔ?» Tshə pâ kə ətshə ə pa: «Zä ama ndə kə pa aneshe koshe nə̂ əmə bishi ə̂në əndje səye, əndje sə gâ tʉ gâ lə Əgɔngerə nə̂ zə, bale gâ ndə ndəkɔ zə, bale gâ ndə gəle zə.» 22 Jezu kîrə əpʉ ə pa: «E wusə̂ ərə ə̂në e yu tshuku nə kɔ wu ne. E lï ndə kə ndju kopo əyo ə̂në mə sə kə ndju nə kɔ a?» Əndje kîrə əpʉ kə ətshə ə pa: «Ä lï ndə kə ndju nə.» 23 Bale, tshə kîrə əpʉ kə əndje ə pa: «Banda əpʉ, e sə kə ndju kopo nə ə̂në mə sə kə ndju nə kɔ. Bale, əpʉ kə sə gâ tʉ gâ ndə ndəkɔ əmə də gəle əmə, ə də̂ əmə də̂ kə za äwä nə kə azü ne. Ətshe səkɔ sə mbrə azü ə̂në Abä əmə gâmba mbrə əndje gâ ye kɔ.»

24 Alɔ ə̂në ə̂dû atrawaya nə morofo nə djî əpʉ səkɔ, tshelə əndje kô əndje tə̂ alaye azü bishi səkɔ. 25 Jezu ê əndje ə pâ: «E wüsə̂ nə ə pa alayïngerə aəgɔ sə kə ma ngerə nə̂ əndje gâ pâ azü aəgɔ nə, â əgbro azü aəgɔ sə də awlra gâ pâ azü aəgɔ nə̂ əndje nə. 26 Bale, ərə rə lï lï ndə kə sə ndje äwä bale lə takpa tə̂ e ne. Bale, əzü nɔ̂ ə̂në tshə yində kə sə tə âgbɔ̂ əzü lə takpa tə̂ e, tshə sə tə əyïkosəra nə̂ angâ nə. 27 Əzü nɔ̂ ə̂në tshə yində kə sə tə əzü tshitshinə lə takpa tə̂ e, tshə sə tə kanga nə̂ e. 28 Âdârə ə̂në Əgblə nə̂ Əzü nâ nâ ndə kə pa azü ma kosəra kə ətshə ne, bale, tshə nâ ndə kə pa tshə ma kosəra kə azü ə za tə̂ ye tə ndogɔ ndə kə yɔ ə̂kpû azü lə kuzu.»

29 Alɔ ə̂në Jezu də atrawaya nə̂ ye wûtu lə gala Jerikɔ gâ ye kɔ, ə̂kpû azü zâ äwä ye. 30 Bale, alabə̈ alayïbula bishi sə̂ gâ tʉ gâ ndʉ äwä, ə djî ə pa Jezu kə ro kɔ, əndje tâ râwâ ə pa: «Âgbɔ̂ Əyïngerə, Ɨrɨ Davidə, wü əyo ä!» 31 Ə̂kpû azü nə ngâ kə əndje ndə kə pa əndje ngbo ama əndje gâ tə̂ nə. Bale, əndje kwâtə̂ndje ə tâ râwâ nə rô pâ nə ə pa: «Âgbɔ̂ Əyïngerə, Ɨrɨ Davidə, wü əyo ä!» 32 Jezu kâ ə ê əndje ə pâ: «E yində nə ə pa mə ma yekɔ kə e?» 33 Əndje pâ kə ətshə ə pa: «Âgbɔ̂ Əyïngerə, ä yində kə lishi.» 34 Əyo əndje mâ Jezu nə â tshə gôro ala əndje nə. Trale, ala əndje sɔ̂ â əndje zâ äwä ye.