1 Alɔ ə̂në Jezu də atrawaya nə̂ ye ndô trö də gala Jeruzalamə kɔ, ə̂në əndje yî kumu əndje gâ lagɔ Betəfaje gâ ye kɔ, mâ tə̂ kaga aayɔ ə̂në əndje ê ə pa ɔlivə kɔ, Jezu wlâ atrawaya bishi 2 ə pâ kə əndje ə pa: «E nä mâ lagɔ ə̂në ə sə ətshi e kɔ. E li gâ lagɔ nə, ngbiɔ, e sə kə sɔtə̂ ə̈bə̈ əyï kunda ə̂në əndje dû ətshə də aya nə ngotə̂ ye kɔ. E wöra əndje ə gü də əndje kə əmə. 3 Kədə ə̈bə̈ əzü kə pa ə̈bə̈ əpʉ kə e, e kïrə əpʉ ə pa: "Âgbɔ̂ Əyïngerə yində ye." Trale, əzü nə sə kə katə̂ əndje ndə kə pa e gu də əndje.»

4 Kandää, ərə nə mâ rə ndə kə pa əpʉ ə̂në awopandəma Ndjapä pâ gâ ye kɔ ndəma nə ma. Tshə pâ:

5 «E pä kə azü gala Siɔ: E wü-a!

Əyïngerə nə̂ e sə kə na gâ ndə e,

tshə ma tə̂ ye tə amba əzü, tshə ô gâ pâ əyï kunda,

gâ pâ aya kunda, aya agia kə ma də kosəra.»*

6 Atrawaya nə nâ ə mâ ərə nə ə̂në Jezu nə zâ ama kə əndje ndə kə pa əndje ma nə kɔ. 7 Əndje gû də əyï kunda nə də aya nə, ə kô aləba nə̂ əndje gâ pâ akunda nə â zâ Jezu tɔ gâ pâ nə. 8 Lə ə̂kpû azü nə, azü ngbatshe sâka aləba nə̂ əndje gâ ala äwä nə; alabə̈ əndje ngɔ̂ amato aayɔ â gâmba gâ ala äwä nə. 9 Ə̂kpû azü nə ətshi Jezu nə də əndje nə̂ mandâ ye nə kɔ sə̂ kə ta râwâ ə pa:

«A mbë Ɨrɨ Davidə!

Ndjapä tö ngwarə gâ pâ ətshə ə̂në tshə sə kə na də əɨrɨ Əyïlingû kɔ!

A mbë Ndjapä ə̂në tshə sə mâ ngâ lafɔ kɔ!»*

10 Alɔ ə̂në Jezu lî gâ lə gala Jeruzalamə gâ ye kɔ, kumu azü gala nə nɔ̂ kpê pâ əndu əndje â əndje yû tə̂ əndje ə pa: «Əde kə sə̂?» 11 Ə̂kpû azü nə kîrə əpʉ ə pa: «Jezu kə sə̂, awopandəma Ndjapä, tshə tô mâ Nazaratə lə ashɔ əgɔ Galile.»Kə li Jezu gâ lə gala Jeruzalamə

12 Jezu lî gâ lə Anda Ndjapä, ə grɔ̂ azü ə̂në əndje sə̂ kə ka aərə də azü ə̂në əndje sə̂ kə yɔ aərə lə Anda Ndjapä nə kɔ. Tshə gêta agbarə ə̂në aawoshandje ngendja sə̂ kə shandje angendja nə̂ əndje pâ nə kɔ ə gêta angende nə̂ aawoka aplejɔ nɔ̂ gâ tʉ. 13 Tshə pâ kə əndje ə pa: «Fraka nə̂ Ndjapä pâ: "Əndje sə kə e Anda nə̂ əmə ə pa anda kə yu Ndjapä lə nə."* Bale, e-e, e dô tə grokpɔ alayïangba.»

14 Alayïbula də alayïgbanu nâ gâ ngotə̂ Jezu lə Anda Ndjapä â tshə grɔ̂ arəka tə̂ əndje. 15 Tshelə aâgbɔ̂ azü nə̂ aawotokrɔ də aawoyisə̂ âgbɔ̂ əpʉ nə̂ Mayïzə kô əndje alɔ ə̂në əndje wû aərə ə̈lü ə̂në tshə mâ kɔ gâ ndə aneshe ə̂në əndje sə̂ kə ta râwâ lə Anda Ndjapä nə kɔ ə pa: «A mbë Ɨrɨ Davidə!» 16 Əndje pâ kə ətshə ə pa: «Bə sə kə dji əpʉ ə̂në əndje pa kɔ a?» Jezu kîrə əpʉ kə əndje ə pa: «Ayî. E dɨ̂ əpʉ səye dɨ̂ alɔ bale lə Əpʉ Ndjapä ne a? Əpʉ nə pâ: "Ndjapä mâ â aaya aneshe də əndje ə̂në əndje sə pə kə ɔ angɔ kɔ tɔ̂lɔ ətshə lə ama əndje."»*Anda Ndjapä

17 Mandânə, tshə kâtə̂ əndje tʉ kôto ə wûtu lə gala nə ndə kə na mâ Betani ə sho mâ je.

18 Də əzɨ, ə̂në Jezu âfɔ ndə kə gu mâ Jeruzalamə kɔ, əgo mî ətshə. 19 Tshə wû ə̈bə̈ ayɔ figə tə̂ ama äwä nə â nâ trö tə̂ nə. Bale, tshə wû kʉtə̂ akako nə â pâ kə ayɔ figə nə ə pa: «Bə sə sə kə kwatə̂zə kə le nə bale ne!» Kʉ pə kôto səkɔ, ayɔ figə nə ôrɔ. 20 Atrawaya nə wû ərə sə̂ rəkɔ, kumu əndje kpê pâ əndu əndje â əndje pâ: «Ə ma atâ â ayɔ figə səkɔ ôrɔ katshä kɔ?» 21 Jezu kîrə əpʉ kə əndje ə pa: «Djatra əpʉ, mə pa kə e: kədə e sə də lɔsu â sə sə də ashera tə̂ lɔsu e ne, e sə sə kə ma kʉtə̂ ərə ə̂në mə mâ gâ tə̂ ayɔ figə səye kɔ ne, bale, alɔ ə̂në e sə kə pa kə kaga səye ə pa: "Äfɔ kotəye ə të gâ lə ə̂ngû əngbrʉ", ərə nə sə kə ma nə. 22 Ərə nɔ̂ ə̂në e sə kə yu tshuku nə də lɔsu tə̂ äwä kə yu Ndjapä, e sə kə sɔtə̂ nə.»

23 Jezu nâ mâ lə Anda Ndjapä â alɔ ə̂në tshə sə̂ kə yisə̂ əpʉ kə azü, aâgbɔ̂ azü nə̂ aawotokrɔ də aâgbɔ̂ azü nâ ə pâ kə ətshə ə pa: «Əde kə za äwä kə əbə â bə ma aərə səkɔ? Əde kə zâ ama kə əbə â bə ma aərə səkɔ?» 24 Jezu kîrə əpʉ kə əndje ə pa: «Əmə ndje, mə sə kə yu e də ə̈bə̈ əpʉ bale. Kədə e kirə də əpʉ nə kə əmə, mə sə kə yisə̂ əzü ə̂në tshə zâ äwä kə əmə ndə kə ma aərə səkɔ kə e. 25 Əde kə wlâ Zââ ndə kə pa tshə za batamo kə azü kɔ? Ndjapä wala azü?»

Bale, əndje pâ lə takpa tə̂ əndje ə pa: «Kədə a kirə əpʉ ə pa: "Ndjapä kə wlâ Zââ", tshə sə kə yu əzə̂ ə pa: "Mbrə yekɔ də̂ e yîndə əpʉ nə̂ ye nə yî ne kɔ?" 26 Bale, kədə a kirə əpʉ ə pa: "Azü kə wlâ Zââ kɔ", əzə̂ mä awa ə̂kpû azü nə kane, mbrə ə̂në azü nɔ̂ wûsə̂ nə ə pa Zââ sə̂ tə awopandəma Ndjapä.» 27 Bale, əndje kîrə əpʉ kə Jezu ə pa: «Ä wusə̂ nə wu ne!» Tshə pâ ndje kə əndje ə pa: «Əmə ndje, mə sə sə kə yisə̂ əzü ə̂në tshə zâ äwä kə əmə ndə kə ma aərə səkɔ kə e ne.»

28 Jezu kwatə̂ye ə pa: «E wu ənə̂ e atâ a? Ə̈bə̈ koshe sə̂ də aneshe koshe bishi. Tshə pâ kə angbʉlî əgblə nə ə pa: "Ɨrɨ əmə, nä na ye kpəsəye ə mä kosəra lə kəndɨ vinyə nə̂ əmə." 29 Tshə kîrə əpʉ ə pa: "Mə yində nə yi ne." Bale, mandânə, tshə kâtə̂ äwä əpʉ sə̂ ə̂në tshə pâ kɔ ə nâ na ye gâ lə kəndɨ nə. 30 Abä aneshe nə pâ kʉtə̂ əpʉ səkɔ kə bishi əgblə koshe nə. Əgblə nə kîrə əpʉ ə pa: "Ayî abä, mə sə kə na na ye", bale, tshə nâ na ye nâ ne. 31 Əde lə aneshe bishi səkɔ kə mâ ərə ə̂në tshelə abä əndje yində nə kɔ?» Əndje kîrə əpʉ ə pa: «Angbʉlî əgblə nə.» Bale, Jezu pâ kə əndje ə pa: «Djatra əpʉ, mə pa kə e: aaworɔ ngendja lapɔ də aəmbrʉ ayashe sə kə li gâ lə Əgɔngerə nə̂ Ndjapä ətshinə tə̂ e. 32 Mbrə ə̂në Zââ Batistə nâ gâ ndə e, ə yîsə̂ ə̂rɔ̂ äwä kə ma tə̂ əzü kə e, e yîndə əpʉ nə̂ ye nə yî ne. Bale, aaworɔ ngendja lapɔ də aəmbrʉ ayashe yîndə əpʉ nə̂ ye. E-e ə̂në e wû aərə səkɔ, e tshî äwä kə ma angbrɔ tə̂ e tshî tʉ, mandânə ndə kə yində əpʉ nə̂ ye nə ne.»

33 «E djï ə̈bə̈ ata əpʉ kəwû nə: Ə̈bə̈ əyïnga kəndɨ djô kəndɨ vinyə. Tshə tɔ̂ ângâ dji ndʉ nə ə djî kudû lə əkpʉ ndə kə pʉ aə̂lê vinyə nə lə nə, ə mâ ə̈bə̈ ətshe gbrâ gâ lafɔ ndə kə pa əzü ka gâ pâ nə ka ə lishi pâ kəndɨ nə. Mandânə, tshə zâ kəndɨ nə gâ lə kəna alabə̈ aawodjo kəndɨ vinyə ə rô lə ə̈bə̈ əgɔ ngrʉ̂. 34 Alɔ ə̂në alɔ kə kɔ ə̂lê vinyə lî gâ ye kɔ, tshə wlâ alayïkosəra nə̂ ye kə aawodjo kəndɨ vinyə nə ndə kə pa əndje ko ə̂sə̂ ənə̂ ye ə̂lê vinyə nə kə ətshə. 35 Aawodjo kəndɨ nə têgbɔ alayïkosəra nə̂ əyïnga kəndɨ nə â dâ ə̈bə̈ nə bale, ə wô ə̈bə̈ nə, â gbô vəta nə də badja. 36 Əyïnga kəndɨ nə kwâtə̂ye ə wlâ alabə̈ aata alayïkosəra nə ə̂në əndje ngbâ tə bandanə ə rô aangbʉlî alayïkosəra səkɔ. Bale, aawodjo kəndɨ vinyə nə mâ kʉtə̂ marä tə̂ ərə ə̂në əndje mâ tə̂ aangbʉlî alayïkosəra səkɔ tə̂ əndje. 37 Djoko mandânə, tshə wlâ ɨrɨ nə kə əndje ə pâ mâ lə ye ə pa: "Əndje kpe rawa ɨrɨ əmə je!" 38 Bale, alɔ ə̂në aawodjo kəndɨ vinyə nə wû əgblə nə kɔ, əndje pâ lə takpa tə̂ əndje ə pa: "E wü-a! Ətshə ə̂në tshə sə kə sə tə əyïnga kəndɨ nə mandâ abä nə kɔ kə səye! E nä gâ əmə, a wö ətshə, ka kəndɨ nə̂ ye nə sə tə ənə̂ əzə̂." 39 Əndje têgbɔ ətshə ə wlî ətshə lə kəndɨ nə gashu ə wô ətshə.» 40 Jezu yû əndje ə pa: «Alɔ ə̂në əyïnga kəndɨ nə kə gu, tshə sə kə ma yekɔ tə̂ aawodjo kəndɨ vinyə nə?» 41 Əndje kîrə əpʉ kə ətshə ə pa: «Tshə sə kə wo aəmbrʉ azü səkɔ ə wu əyo əndje wu bale ne. Mandânə, tshə sə kə za kəndɨ nə gâ lə kəna aata aawodjo kəndɨ vinyə â alɔ ə̂në alɔ kə kɔ ə̂lê rəgo nə kə lï gâ ye, əndje sə kə ko nə kə ətshə.»

42 Jezu pâ kə əndje ə pa: «E dɨ̂ əpʉ ə̂në Fraka nə̂ Ndjapä pâ kɔ dɨ̂ alɔ bale ne a? Əpʉ nə pâ:

"Əkpʉ ə̂në aawombrə anda wə̂ra tə̂ əndje tə̂ nə gâ ye kɔ,

ə dô tə̂ ye tə âgbɔ̂ əkpʉ ə̂në ə sə tə ə̈nü anda nə kɔ.

Ə sə tə ərə ə̂në Əyïlingû kə mbrə̂,

ərə nə fʉ lə ala əzə̂ ə rô pâ nə."*

43 «Âdârə ə̂në mə pa kə e, əndje sə kə za Əgɔngerə nə̂ Ndjapä lə kəna e ndə kə za kə azü ə̈bə̈ əgɔ ə̂në əndje sə kə ma tə̂ əndje ə lï də nə kɔ. 44 Əzü nɔ̂ ə̂në tshə sə kə te gâ pâ əkpʉ səkɔ, tshelə ye sə kə ngɔ nə â əzü ə̂në əkpʉ nə sə kə te gâ pâ ye, ə sə kə gba tshelə ye.»

45 Mandânə ə̂në aâgbɔ̂ azü nə̂ aawotokrɔ də Afariza djî aəpʉ kəwû səkɔ, əndje wûsə̂ nə ə pa tshə pâ aəpʉ səkɔ mbrə alane. 46 Əndje prâ äwä ndə kə tegbɔ ətshə, bale, awa ə̂kpû azü nə mâ əndje, mbrə ə̂në azü nə wûsə̂ nə ə pa Jezu sə tə awopandəma Ndjapä.