1 Alaye əmə, mə sə kə pa əpʉ kə azü ə̂në əndje wûsə̂ âgbɔ̂ əpʉ gâ ye kɔ. E wûsə̂ nə wû ə pa âgbɔ̂ əpʉ sə də awlra gâ pâ əzü ndjɔ ə̂në tshə daka pə də sorô kɔ ne a? 2 Rəkɔ, âgbɔ̂ əpʉ î əwɔ əzü popo äkɔ̈ nə alɔ ə̂në koshe nə daka pə tə sorô. Bale, kədə koshe nə kə tshû gâ ye, yashe nə wûtu tshekudu âgbɔ̂ əpʉ nə ə̂në ə î ətshə popo äkɔ̈ nə nə kɔ gâ ye. 3 Kədə yashe nə kə za ə̈bə̈ ata koshe alɔ ə̂në äkɔ̈ nə nə daka pə tə sorô kɔ, əndje pa tshə mbrə̂ nyaka kə pra koshe gâ ye. Bale, kədə äkɔ̈ nə nə kə tshû gâ ye, tshə dâ dâka pə tshekudu âgbɔ̂ əpʉ səkɔ ne, tshə lï ndə kə pa tshə za ə̈bə̈ ata koshe, bale tshə mbrə nyaka kə pra koshe mbrə ne. 4 Rəkɔ, alaye əmə, e tshû tə̂ âgbɔ̂ əpʉ gâ ye, tə̂ äwä əko Kristə, ndə kə pa e sə tə ənə̂ ata əzü, ətshə ə̂në tshə shê lə takpa tə̂ akuzu gâ ye kɔ, kanika əzə̂ mbrə aərə ə̂në ə fʉ lə ala Ndjapä kɔ. 5 Mbrə ə̂në, alɔ ə̂në a dâka pə kə mbrə aərə Lïndə̂ lɔsu əzə̂ leme-e kɔ, aəmbrʉ aəgo ə̂në ə ka gâ pâ âgbɔ̂ əpʉ kɔ sə̂ kə mbrə aərə lə akwa əzə̂ nɔ̂ â a sə̂ kə mbrə aərə ə̂në kuzu ə na mandâ nə kɔ. 6 Bale kpəsəye, ə̂në a tshû tə̂ aərə ə̂në a sə̂ leme-e tə akanga nə kɔ gâ ye kɔ, a wûtu tshekudu âgbɔ̂ əpʉ nə gâ ye, bale a lï ndə kə pa a mbrə kə Ndjapä tə̂ tafa äwä ə dji əpʉ ama Âgbɔ̂ Yîrə̂, ə də̂ tə̂ angbrɔ äwä kə mbrə ərə, tshekudu âgbɔ̂ əpʉ nə də̂ ne.

7 Rəkɔ a pa atâ a? Âgbɔ̂ əpʉ nə sə tə nyaka a? Bale ne! Bale mə wûsə̂ nyaka kʉ tə̂ äwä âgbɔ̂ əpʉ nə. Mə sə̂ sə̂ kə wusə̂ kəmə əpʉ kə ma əgo ərə nə̂ əzü ne, kədə âgbɔ̂ əpʉ nə kə pâ pâ kəmə ə pa: «Mä əgo ərə nə̂ əzü mä ne.»*7.7 Wu Wutu 20.17; Əpʉ 5.21. 8 Bale, nyaka nə kâ gâ pâ əpʉ səkɔ ə mbrə̂ adongo aəgo aərə nɔ̂ gâ lə əmə, tə̂ äwä âgbɔ̂ əpʉ nə; mbrə ə̂në, kədə âgbɔ̂ əpʉ nə kə sə sə je ne, nyaka nə lîwu gâ ye. 9 Leme-e, ə̂në âgbɔ̂ əpʉ nə sə̂ sə̂ je ne kɔ, mə sə̂ də sorô; bale, alɔ ə̂në əpʉ kə za ama də âgbɔ̂ əpʉ nə wûtu gâ ye kɔ, nyaka nə sə də sorô, 10 â əmə, mə tshû ənə̂ əmə gâ ye. Rəkɔ, əpʉ kə za ama də âgbɔ̂ əpʉ nə ə̂në ə lï ndə kə na də əmə gâ tə̂ äwä sorô kɔ, ənə̂ əmə, ə sə a pa də, ə sə kə na də əmə gâ tə̂ äwä kuzu. 11 Mbrə ə̂në nyaka nə ka gâ pâ əpʉ səkɔ â frɔ̂ əmə tə̂ äwä əpʉ kə za ama də âgbɔ̂ əpʉ nə â, tə̂ äwä nə, ə wô əmə gâ ye.

12 Rəkɔ, ngâ, âgbɔ̂ əpʉ nə sə tə ərə ə̂në ə sə kpî, â kə za ama də âgbɔ̂ əpʉ nə sə tə ərə ə̂në ə sə kpî ə sə də äwänə â sə tə ə̂rɔ̂nə. 13 Rəkɔ, ə̂rɔ̂ ərə nə kə dô tə̂ ye tə kuzu mbrə əmə kɔ a? Bale ne! Nyaka nə kə sə̂ â mbrə̂ kuzu nə gâ lə əmə tə̂ äwä ə̂rɔ̂ ərə kɔ, ndə kə pa a wusə̂ nyaka nə ngâ tə̂ nyaka nə. Tə̂ äwä kə za ama də âgbɔ̂ əpʉ nə, nyaka nə mâ tə̂ ye gashu də awlra ye nɔ̂ nə̂ nyaka nə.

14 Mbrə ə̂në a wusə̂ nə ə pa âgbɔ̂ əpʉ nə sə tə ənə̂ yîrə̂; bale əmə, mə sə tə əzü də dɔ̂ngɔ̂ tə̂ əmə, ə̂në əndje kâ əmə tə kanga kə nyaka nə gâ ye kɔ. 15 Mbrə ə̂në mə wusə̂ âdâ ərə ə̂në mə mbrə kɔ wu ne. Ərə ə̂në tshelə əmə yində nə, mə sə sə kə mbrə nə ne, bale mə sə kə mbrə ərə ə̂në tshelə əmə wəra tə̂ ye tə̂ ne. 16 Kədə mə sə kə mbrə də̂ ərə ə̂në tshelə əmə yi yində nə ne kɔ, mə wusə̂ nə kôto ə pa âgbɔ̂ əpʉ nə sə tə ə̂rɔ̂ ərə. 17 Rəkɔ, ə də̂ əmə də̂ kə mbrə ərə nə rə kɔ ne, bale nyaka nə ə̂në ə sə lə əmə kɔ kə sə̂ â mbrə ərə nə rə kɔ. 18 Mbrə ə̂në mə wusə̂ nə ə pa ə̂rɔ̂ ərə sə sə lə əmə ne, lə akwa əmə də̂ əzü ne. Mbrə ə̂në mə sə də əgo kə mbrə ə̂rɔ̂ ərə, bale mə lï lï ndə kə mbrə nə ne. 19 Ə də̂ ə̂rɔ̂ ərə ə̂në mə sə də əgo ndə kə mbrə nə kɔ də̂ mə sə kə mbrə nə ne, bale mə sə kə mbrə də̂ əmbrʉ ərə ə̂në tshelə əmə wəra tə̂ ye tə̂ nə kɔ. 20 Kədə mə sə kə mbrə də̂ ərə ə̂në, əmə, tshelə əmə yi yində nə ne kɔ, ə də̂ əmə də̂ kə mbrə rə kɔ ne, bale nyaka nə ə̂në ə sə djoko lə əmə kɔ kə sə̂ â mbrə rə kɔ.

21 Rəkɔ, mə sɔ̂tə̂ âgbɔ̂ əpʉ səye: əmə ə̂në tshelə əmə yində kə mbrə ə̂rɔ̂ ərə kɔ, əmbrʉ ərə kə sə̂ trö ndə mə mbrə nə. 22 Mâ tə̂ lɔsu əmə, âgbɔ̂ əpʉ nə̂ Ndjapä fʉ ə fʉ tə̂ əmə. 23 Bale, lə akwa əmə nɔ̂, mə sɔ̂tə̂ ə̈bə̈ ata âgbɔ̂ əpʉ ə̂në ə sə kə mbrə awlra tə̂ ənə̂ sə̂ ə̂në lɔsu əmə yində nə kɔ, â mbrə əmə tə kanga âgbɔ̂ əpʉ nyaka nə ə̂në ə sə djoko lə əmə kɔ. 24 Mə sə tə əyïəyo â sə ye! Əde kə djɔ əmə lə tshekotə̂ səye ə̂në ə sə kə na də əmə trɔ kuzu kɔ? 25 A zä mərshe kə Ndjapä tə̂ äwä Jezu Kristə, Âgbɔ̂ Əyïngerə nə̂ əzə̂ nə!

Rəkɔ, tə̂ äwä kə wusə̂ ərə, mə sə tə kanga âgbɔ̂ əpʉ nə̂ Ndjapä nə, bale lə əzü tə̂ əmə, mə mbrə ərə Lïndə̂ âgbɔ̂ əpʉ nyaka nə.