1 Mwaalongo bangu', kilu'lu' sangu' no lu'ba kwangu' kwa Nnu'ngu', nipala panga Baisilaili bakosopolelwe. 2 Kwa mwanjaa, nikong'ondelya panga bendabinia munomuno kwipiya kwa kuntumikia Nnu'ngu', lakini banaikwipwali ndi'la ya kakape. 3 Bembe baaitangiteli ndi'la ya Nnu'ngu' yaabalangilya bandu aki na baaibi'ngi'yiteli, ila baapalike kwipata aki kwa ndi'la ya kwiyu'wa amuli ya Musa. 4 Salya yaaikite kuundi'la yake palu' Kilisitu paayomoli mabinio gake. Nambi'yambi' kila ywamwu'bi'lya abalangilwa aki nnu'ngi' ya Nnu'ngu'.

5 Musa aandike bu'kana no balangilwa aki kwa kwiyu'wa salya kabaya, "Kila mundu ywaiyu'wa salya aalama kwa kwikamwa salya yo." 6 Lakini yi'lu' aki yaipatikana muimani ibaya nnyinya, "Kaneubaye mumwoyo wako, ‘Nga nyai ywaalu'a u'bu'ka kunani?’" (yani li'nga kunneta Kilisitu pai'.) 7 "Au ‘Nyai ywaalu'a elya yenda kumambi'?’" (yani li'nga kunneta Kilisitu bu'ka kumambi'.) 8 Amo nga mwagabaya Maandiko Mapeleteu panga, "Liyi'gi'yo lya Nnu'ngu' libile papipi nawe, libile munkano wako na pamwoyo wako," (yani nga galu' mayi'gano ga imani gatugaala.) 9 Mana wayi'ki'tya kwo longela pankano wako panga, "Yesu nga Bwana," no u'bi'lya pamwoyo wako panga Nnu'ngu' aannyu'yite bu'ka kumambi', walu'a kosopolelwa. 10 Mwanjaa, kwa mwoyo mundu endau'bi'lya no balangilwa aki, kai' kwa nkano endalongela no yi'ki'tya, na kwa nyo pata ukosopoli. 11 Kati mwagabaya Maandiko Mapeleteu, "Mundu ywoywoti ywaalu'a kumwu'bi'lya katu aaisikali." 12 Bai, ntu'pu' ubauli kati ya Ayahudi na bangali Ayahudi, mwanjaa ywembe nga Bwana wa boti, na nnogau kwa bandu boti babannu'ba. 13 Kwa mwanjaa, "Kila mundu ywankema Bwana li'nga yangatiyilwa aalu'a kosopolelwa."

14 Bai, balu'a kunkema buli yu'lu' ywabakotwike kumwu'bi'lya? Kai' balu'a kumwu'bi'lya buli manaitei banaiyu'wali abali yake? Na balu'a kwiyu'wa buli abali yake manaitei ntu'pu' ywa kwaalya? 15 Na balu'a ala buli mana banatumilwali? Kati mwagabaya Maandiko Mapeleteu, "Lola, mwagagolwike magu'lu' gabe balu' babaala Abali Inannoga." 16 Lakini bandu botili babapoki Abali yo Inannoga. Na aso nga kitumbu sa Isaya baya panga, "Bwana, nyai ywagau'bi'li galu' gatwaawanikiye?" 17 Kwa nyo imani ipatikana kwo yu'wa Abali Inannoga. Na bandu baiyu'wa Abali Inannoga pansimu waala mundu bu'kana na Kilisitu. 18 Lakini nendalaluya, "Buli bandu bo baaiyu'wine Abali Inannoga?" Eloo kakape baayu'wine, kwa mwanjaa Maandiko gabaya,

"Malobe gabe gaatipita no yu'wanika padunia yoti.

Mayi'gi'yo gabe gayu'wanike kila pandu mudunia yoti."

19 Nilaluya liswali li'ngi', "Buli bandu ba Isilaili baatangite?" Eloo, baatangite. Nnu'ngu' aalongoli longela ga kwo pitya Musa,

"Naalu'a kumpanga mwabi'ki bwigu

kwo pi'tya bandu bangali nni'ma.

Naalu'a kumpanga mwakasiliki,

kwo pi'tya abo bangalitanga sosoti."

20 Kai', Isaya aabaite kwa ukangamau paali pa Nnu'ngu' panga,

"Bandu babakotwike kunipala nga babanipatike.

Na bandu bangali nilalukia abali yangu', nga baniilayite kasabe."

21 Lakini bu'kana na bandu ba Isilaili Nnu'ngu' aatibaya panga,

"Masu'ba goti napalite sikisana na bandu bangu',

lakini bembe ambu'ku'su' na bakani kuniyu'wa."