1 Bai, tubaye buli bu'kana na tati' bitu Bulaimu. 2 Kwa mwanjaa, manaitei Bulaimu aabalangilwe aki kwa iyendo yake bai, aabile na kikowe sa kwipunia, lakini nnu'ngi' ya Nnu'ngu' lili. 3 Kwa mwanjaa Maandiko Mapeleteu gabaya panga, "Bulaimu aamwu'bi'li Nnu'ngu', ngabalangilwa panga mundu mwene aki nnu'ngi' yake." 4 Bai, mundu mana apangite kasi, liposo lyake libalangilwali panga upo, ila aki ya lyusu lyake. 5 Lakini kwa mundu yu'lu' ywangali u'bi'lya iyendo yake ila amwu'bi'lya Nnu'ngu' ywaabalangilya aki alau, imani yake ibalangilwa panga aki. 6 Kati mu'lu' mwalongela Daudi, nantali yake mundu yu'lu' ywabalangilwa aki na Nnu'ngu' pangali panga kyendo sosoti.

7 "Nantali balu' babasamilwe makosa

no putilwa masambi gabe.

8 Nantali mundu yu'lu' Bwana ammalangilyali masambi gake."

9 Nantali yi'no kwenda kwa bandu babainilwe bai lili, ila ata kwa bandu bangali inilwa. Kwa mwanjaa tuyomwike baya panga, "Bulaimu aabalangilwe panga mwene aki kwa ndi'la ya imani yake." 10 Buli, pakubawi paabalangilwe ywembe panga aki? Buli, yaai balo inilwa au ainilwe? Yaabile abile balo inilwa. 11 Bulaimu aainilwe nsu'gu' yake, no inilwa kwo yaai alama yaikong'ondeli panga aayi'ki'tilwe na Nnu'ngu' kwa kitumbu sa imani yaabile nayo paabile anainilwali. Kwa nyo, Bulaimu aapangike tati' ba balu' boti babau'bi'lile pamope no panga bai banainilwali li'nga babalangilwe aki nnu'ngi' ya Nnu'ngu'. 12 Kai' ywembe tati' ba balu' babainilwe, lakini kwenda kwa kitumbu so inilwa bai lili, ila kwa kitumbu sa bembe baibi'ngi'ya ndi'la yi'yi'lu'yi'lu' ya imani ya tati' bitu Bulaimu pabaabile banainilwa lili.

13 Nnu'ngu' aannagi Bulaimu na lubelekwo lwake panga, dunia yoti ilu'e panga mali yabe. Lilagano lyo lyapangilwe kwa kitumbu sa Bulaimu aaiyu'wine salya lili, ila kwa mwanjaa aamwu'bi'li Nnu'ngu', ngayi'ki'ti'lwa panga mundu ywa aki kwa Nnu'ngu'. 14 Kwa mwanjaa manaitei balu' babaiyu'wa salya ngababaapokya kili'be sakilagilwe, bai, imani ipwaikali, na malagyo ga Nnu'ngu' ntu'pu' kili'be. 15 Kwa mwanjaa, salya iyumuya nyongo ya Nnu'ngu' kwa balu' kingayu'wa, lakini kenda ikakotoka baa salya, ti'kwana salya kulu'e baali.

16 Kwa nyo, lilagano liisa kwa ndi'la ya imani li'nga libe kwa ngu'ngu', na baapeyilwe lubelekwo lwa Bulaimu, kwenda kwa balu' bababile ba salya kisabeli, ila kai' kwa balu' bababile ba imani ya Bulaimu. Ywembe nga tati' bitu twenga twaboti. 17 Kati mwagabaya Maandiko Mapeleteu, "Nikubi'i ube wa tati' ba mataipwa gambone." Lilagano lyo lya kakape nnu'ngi' ya Nnu'ngu' yu'lu' ywamwu'bi'lya Bulaimu, Nnu'ngu' ywayu'ya bandu bu'ka kuuwi'li, na kwa amuli yake ikowe yangalibaa yenda baa. 18 Bulaimu aatiu'bi'lya no pi'kanilya makowe gangali wesa u'bi'li'ka, kwa nyo ngabaa tati' ba mataipwa gambone. Bu'kana na mayi'gi'yo go, Nnu'ngu' ammakiye, "Amo nga mwalwalu'a yoloka lubelekwo lwako." 19 Ywembe aabile mpi'ndo ywa kunako myaka mya yimo, lakini imani yake yai ikang'alang'atya pamope no tanga panga yi'ga yake yaai kati itewaa, na nnyumbowe Sara aabile ntonga. 20 Lakini Bulaimu aati'kwanikeli mwoyo bu'kana na lilagano lyalagilwe na Nnu'ngu', ila imani yake yayongiye kumpeya utukupu Nnu'ngu'. 21 Aapangite nyalu' kwa mwanjaa, aatangite kakape panga yu'lu' ywampei lilagano lyo abile na uweso wo timisa. 22 Kwa kitumbu so, "Aabalangilwe panga mwene aki." 23 Mayi'gi'yo ga, "Gaabalangilwe kwake panga aki," gaandikilweli kwa kitumbu sa ywembe kisake, 24 ila na kwitu twenga kai', Nnu'ngu' aatupeya aki twenga twatumwu'bi'lya ywembe ywankosopoli Bwana witu Yesu bu'ka kuuwi'li. 25 Aapiyilwe awee kwa kitumbu sa masambi gitu, nembe aayu'yilwe bu'ka mukiwo li'nga tubalangilwe aki.