1 Bai, wenga wawaukumu bandu bi'ngi', ntu'pu' ndi'la ya kwikengya ata ukapangite wanyai. Kwa mwanjaa, pawaukumu bi'ngi' na wamwene kaupanga gogo, wiyi'ya wamwene muukumu. 2 Bai, tutangite panga ukumu ya Nnu'ngu' ya aki, kwa bandu babapanga makowe kati go. 3 Wenga wa mundu wawaukumu balu' babapanga go na wenga kaupanga gogo, buli! Uwasa panga waawesa kwiyepa ukumu ya Nnu'ngu'? 4 Au uyolou wa unogau wake, tu'ya no komeya kwa Nnu'ngu' ukubonali kili'be? Utangiteli panga unogau wake ulu'e wesa kukulongoya ata upate galambuka bu'ka musambi? 5 Lakini wenga wannonopau na ubile na mwoyo wangali yi'ki'tya galambuka. Kwa nyo, wibi'kya mbwatyo ngu'lu' lisu'ba lya Nnu'ngu' paalaya nyongo yake na ukumu yake ya aki. 6 Kwa mwanjaa, Nnu'ngu' aalu'a kunni'pa kila mundu bu'kana na iyendo yake. 7 Bandu bi'ngi' batotokelwali panga manogau kwo pala utukupu waubu'ka kwa Nnu'ngu', isima na maisa gangali alabika. Nnu'ngu' aalu'a kwapeya ukoto wangayomoka. 8 Lakini kwa balu' babapala makowe gabe bene na babakana kweli no bi'ngi'ya ndi'la akau, yalu'a kwatu'mbu'kya nyongo ya Nnu'ngu'. 9 Kwalu'a baa na tabu na siki kwa kila yumo ywapanga maakau, tumbulya Ayahudi, bu'kapo kwa bandu bangali Ayahudi. 10 Lakini kila mundu ywapanga manogau aapata utukupu, isima na amani, tumbulya Ayahudi, bu'kapo kwa bandu bangali Ayahudi. 11 Kwa mwanjaa, Nnu'ngu' ammawali mundu ywoywoti.

12 Boti babapanga sambi pangali kwitanga salya ya Musa, baalu'a langanyika pangali ukumilwa na salya yi'lu'. Lakini boti babapanga sambi ku'no kabaitanga salya, baaukumilwa bu'kana na salya. 13 Kwa mwanjaa kwipi'kania salya bai, kumpangali mundu abalangilwe aki kwa Nnu'ngu', ila balu' babaiyu'wa salya na kwikamwa nga bababalangilwa aki. 14 Uwase kwa bandu bangali Ayahudi, bembe ntu'pu' salya ya Musa. Lakini kila pabatimisa mwaipala salya yi'lu' bu'kana na maganio ga pamwoyo wabe, bembe nga salya kwa kitumbu sabe bene, pamope no panga kwabe ntu'pu' salya yi'lu'. 15 Kwa mwanjaa balaya panga, malagyo ga salya gaandikilwe nkati ya myoyo yabe. Maganio gabe gendakwaukumu na mawaso gabe bene gendakwasitakya au gendakwayi'mya. 16 Nyo, ngamwayalu'a pitya lisu'ba li'lu' Nnu'ngu' lyaaukumu kwa ndi'la ya Yesu Kilisitu, makowe ga iyo ya bandu gagaiyilwe kati mwaibaya Abali yangu' Inannoga.

17 Lingulya, manaitei wenga ukemelwa wa Nnyahudi, wiu'bi'lya salya na kwipunia panga ulu'mbine na Nnu'ngu', 18 wipunia panga utangite gapendi Nnu'ngu' no tanga makowe gagapwaika, kwa mwanjaa uyi'ganilwe na salya. 19 Wenga wibona nga wa nnongokeyi wa kimbulibuli, na bweya kwa balu' bababile mulubi'ndu'. 20 Wenga wibona panga wamwalimu wa alalo na bangali komala, kwa mwanjaa ubile na utangi woti wa kweli kwa ayo salya. 21 Bai, wenga wawayi'gana bi'ngi', mboni wiyi'ganali wamwene? Wenga wauala panga mundu kaneayibe, mboni wamwene wendayiba? 22 Wenga waubaya panga mundu kaneapange upege, mboni wenga wamwene upanga upege? Wenga wausukya kilikitya inyago lakini wenga uyiba inyago mumayumba ga kinnu'ngu'! 23 Wenga wawipunia salya, umpeya oni Nnu'ngu' kwa kwiti'kwana salya! 24 Kwa nyo, kati mwagabaya Maandiko Mapeleteu panga, "Lina lya Nnu'ngu' litukanilwa na bandu bangali Ayahudi kwa kitumbu sa malau gamugapanga." 25 Inilwa kubile na pwaila mana kawiyu'wa salya, lakini mana kauti'kwana salya, inilwa kwako kupanga kwa bule. 26 Manaitei balu' bangali inilwa baikamwa salya yaipalikwa, buli, kotoka inilwa kwabe kwa balangilwa nsawani no inilwa? 27 Mundu ywangali inilwa kiyi'ga lakini aiyu'wa salya, aalu'a kuukumu wenga wauti'kwana salya, pamope no panga utiinilwa na kwitanga muno salya. 28 Kwenda bonekana kwa panja ngo panga wa Nnyahudi wa kweli lili, wala inilwa yi'ga ngo inilwa kwa kweli lili. 29 Lakini Nnyahudi wa kweli, nga yu'lu' ywapanga Nnyahudi kwa nkati, no inilwa kwa kweli nga ku'lu' kwakupangika na Loo Mpeleteu nkati ya mwoyo wa mundu, kwenda ku'lu' kwakupangika kwa maandiko ga salya bai lili. Mundu ywa kubi nnya, alumbilwali na bandu, ila na mwene Nnu'ngu'.