1 Bai nilaluya panga, buli, Nnu'ngu' aatekwakana bandu bake? Lili ata pasene! Nenga namwene nga na Mwisilaili bu'ka mulubelekwo lwa Bulaimu, na mulukolo lwa Benyamini. 2 Nnu'ngu' aakanili bandu bake baasawile bu'ka kwai'mbu'. Buli, mwendaku'mbu'kya mwagabaya Maandiko Mapeleteu bu'kana na Elia, nsimu waanku'ku'li'ki Nnu'ngu' kwa kitumbu sa Isilaili? 3 "Bwana, bandu ba baabulige alondoli bako na basengwaniye ibi'ki'lyo yako. Nenga kisangu' bai naniigali nankoto, na kai' bapala kunibulaga." 4 Lakini Nnu'ngu' annyangwi ki'li'? Ngammakia panga, "Niibi'kile bandu elupu saba babakani kunkilikitya nnu'ngu' Baali." 5 Ata nambi'yambi' nyinyonyo baigali Baisilaili asene bai babaasaulilwe na Nnu'ngu' kwa ngu'ngu' yake. 6 Baasaulilwe kwa ngu'ngu' ya Nnu'ngu', kwenda kwa iyendo yabe lili. Ikapangage baasaulilwe kwa iyendo, bai ngu'ngu' ilu'e pangali ngu'ngu' kai'.

7 Kwa nyo, Baisilaili baapalike panga bene aki kwa Nnu'ngu', lakini baapatikeli. Ila balu' bai babasaulilwe na Nnu'ngu' nga babaapatike. Bi'ngi' boti babaigile, Nnu'ngu' aapangite babe na myoyo minonopau. 8 Kati mwagabaya Maandiko Mapeleteu panga,

"Nnu'ngu' aapangite babe kati bandu babalobi lugono,

na aawiliwitiye minyo li'nga kanebabone,

kai' aaibike makutu li'nga kane bayu'we.

Amo ngamwababile ata li'no."

9 Naywembe Daudi abaya,

"Makalamu gabe gapange kitapa so kola,

batu'mbu'ke no pwatilwa.

10 Minyo gabe gayi'yilwe lubi'ndu' li'nga

kanebakombwe bona.

Migongo yabe iunjame masu'ba goti, kwo topelwa na igombo ya tabu yabe."

11 Bai, nambi'yambi' nilaluya panga, Baisilaili baatiku'bala li'nga batu'mbu'ke no langanyika munomuno? Lili, ata pasene! Ila, kwo bu'kana no ku'bala kwabe, ukosopoli waisili bandu bangali Ayahudi. Mabinio gano ga Nnu'ngu', gabile ga kwaapanga Ayahudi babe na bwigu. 12 Manaitei bandu bangali Ayahudi baapatike ngu'ngu' ngu'lu' kwa kitumbu so ku'bala kwa Ayahudi, bai, baalu'a pata ngu'ngu' ngu'lu' muno palu' Ayahudi boti pabaapangika bandu ba lukolo lwapala Nnu'ngu'.

13 Bai, nilongela na mwenga mwabandu bangali Ayahudi, panga nenga nga nanitumilwe na Nnu'ngu' nibe nantumilwe kwa balu' bangali Ayahudi. Nilu'a panga kwo binia muno kwiisimu kasi yangu'. 14 Kwa nyo nipi'kanilya kwapanga bandu bangu' babe na bwigu. Kwa ndi'la yo yendawesekana kwayangatia Ayahudi bi'ngi' babe, bakosopolelwe. 15 Kwa nyo manaitei kanilwa kwa Ayahudi na Nnu'ngu' kwaipangite dunia iawanilwe na ywembe, bai, yi'ki'ti'lwa kwabe, kwaalu'a panga ukoti bu'ka kuuwi'li.

16 Manaitei mundu kampikia Nnu'ngu' mili'mbu' ya ilalyo yake, bai ilalyo yoti yapanga kwa kitumbu sa Nnu'ngu'. Kai', manaitei ngi'ga ya nkongo ipeletike, na ndambi' yake yapanga mbeleteu. 17 Lakini manaitei ndambi' ya nkongo wa munng'unda yaatikatilwa no namatika ndambi' ya nkongo wa mmwitu paali pake li'nga ulu'lu' wake ulye pamope na ndambi' ya muliina. Mwenga lelo nga mwandambi' ya nkongo wa mmwitu. 18 Kwa nyo kanemuisalawe ndambi' yayaakatilwe. Kanemwipune, muku'mbu'ki panga mwengali mwamulilisa liina, ila liina ngalinnisa mwenga.

19 Mala yi'ngi' walu'a baya panga, "Ndambi' yaakatilwe kwa kitumbu sangu' li'nga ninamatikilwe paali pake." 20 Likowe lyo lya kakape. Ndambi' yo yaakatilwe kwa kitumbu so kotoka u'bi'lya, na wenga ubile kati mwaubile kwa mwanjaa wendau'bi'lya. Kwa nyo kanewipune, ila uyi'me kwo yogopa. 21 Manaitei Nnu'ngu' aaibi'kili kiya ndambi' ya kibelekwe, wala wenga aalu'a kubi'kyali kiya. 22 Lola Nnu'ngu' apangya bi'ngi' manogau, bi'ngi' aapwatya kwa ukali'. Aapwatya kwa ukali' balu' babakana kumwu'bi'lya, na apangya manogau babayendelya kumwu'bi'lya. Lakini mana mwaakotoka kumwu'bi'lya mwaakatilwa. 23 Manaitei Ayahudi bo baagalambuka na kumwu'bi'lya Nnu'ngu', baalu'a namatikilwa kai' munkongo wabe, kwa mwanjaa Nnu'ngu' abile na uweso wa kwanamatika kai'. 24 Lakini mwenga mwangali Ayahudi mubile kati lutambi' lwalukatilwe bu'ka munkongo wa mmwitu, na mwaanamatikilwe na nkongo wa munng'unda. Lakini Ayahudi nga kati ndambi' yaibu'kana na nkongo wa munng'unda. Kwa nyo, buyangania ndambi' munkongo wake wa kibelekwe kai', inonopali.

25 Mwaalongo bangu', mbala mutange ukweli gu' wauiyilwe li'nga mwakane kwiibona mwabene malango muno. Umbu'ku'su' wa Ayahudi waabile pasene bai, likowe li' lyaagalambuka palu' isabu ya bandu bangali Ayahudi payaalu'a timya li'nga pokya ukosopoli wa Nnu'ngu'. 26 Kwa ndi'la yo, Baisilaili boti baalu'a kosopolelwa. Kati mwaiandikilwe,

"Nkomboli aalu'a isa bu'ka Sayuni,

aalu'a kuubu'ya ulau wa lubelekwo lwa Yakobi.

27 Li'no nga lilagano lyanalu'a kulipanga nabo

nsimu panaalu'a kwasamya masambi gabe."

28 Kwa nambi'yambi' Ayahudi babakana kwipokya Abali Inannoga bapangike andumu ba Nnu'ngu'. Likowe li' lipitike li'nga limpwaike mwenga mwangali Ayahudi. Lakini balo panga Ayahudi asaulilwa na Nnu'ngu', na endakwapenda kwa kitumbu sa malagano gaagabi'i kwa akinatati' babe. 29 Nnu'ngu' mana aasawile bandu bake na kwayalya, akombwali galambuka. 30 Kwai'mbu' mwenga mwannyu'wineli Nnu'ngu', ila nambi'yambi' mupoki kiya sa Nnu'ngu', kwa mwanjaa Baisilaili bannyu'wineli. 31 Nyinyonyo ngamwailu'a panga kwabe. Nambi'yambi' bannyu'wali Nnu'ngu', lakini baalu'a pokya kai' kiya sa Nnu'ngu' kwa mwanjaa, baalu'a kwibona ndi'la yamupokeli mwenga kiya sake. 32 Nnu'ngu' antabi kila yumo muutabilwe wo kotoka yu'wa. Lakini apangite nyo kwa kitumbu so laya kiya sake kwa boti.

33 Eloo, utayili wa Nnu'ngu' nga nku'lu' muno! Ikima na utangi wake ntu'pu' uyomokyo! Ntu'pu' ywakombwa awanikia galu' gagaamwa Nnu'ngu', na ntu'pu' ywakombwa tanga mali'la gake! Kati mwagabaya Maandiko Mapeleteu,

34 "Nyai ywapatike kugatanga maganio ga Bwana?

Nyai ywawesa tama kitamo simo na Nnu'ngu'?"

35 "Au nyai ywaalongoli wi'ti' kumpeya Nnu'ngu' kili'be,

ata awese li'pi'lwa kai' kili'be so?"

36 Eloo, Nnu'ngu' nga ywaumbite ili'be yoti. Na kila kili'be kiyendelya baa kwa ndi'la yake na kwa kitumbu sa ywembe. Utukupu ube kwa Nnu'ngu' milele yoti! Amina.