1 Tumbwelelo tubaye buli? Tuyendeli tama musambi li'nga ngu'ngu' ya Nnu'ngu' ipate yongekeya? 2 Nyinyoli ata pasene! Twenga tupangike kati twawaa kwa abali ya sambi. Kwa nyo, tuwesali yendelya tama kai' musambi. 3 Mutangite kakape panga, twaboti twatubatisilwe mu Kilisitu Yesu, twaalu'mbine nakwe mukiwo sake. 4 Patwaabatisilwe twaalu'mbine na kiwo sake no sikilwa pamope nakwe, li'nga kati mu'lu' Kilisitu mwayu'yilwe bu'ka kuuwi'li kwa utukupu wa Tati', nyinyonyo na twenga kai' tuwese tama mumaisa gayambi'.

5 Kwa nyo ntu'pu' kyukala, manaitei twaalu'mbine nakwe kwa ndi'la ya kiwo kati ywembe, twaalu'mbana nakwe kai' kwa ndi'la yo yu'yi'lwa kwake. 6 Kwa mwanjaa tutangite panga wu'lu' umundu witu wa kwai'mbu' waabambilwe pamope na Kilisitu, li'nga twakanetawalilwa na sambi no pangilwa twaabanda ba sambi kai'. 7 Kwa mwanjaa, mundu ywoywoti ywawile, abi'kilwe maulu bu'ka mumakakala ga sambi. 8 Bai, manaitei twaawile pamope na Kilisitu, tuu'bi'lya panga twaatama kai' pamope nakwe. 9 Kwa mwanjaa tutangite panga Kilisitu aayu'yilwe, nembe awesali waa kai', kwa nyo kiwo kibileli na uweso kai' kwake ywembe. 10 Kiwo sake saai sa mala yimo bai, li'nga kugasinda makakala ga sambi yoti, na nambi'yambi' atama mumaisa ga kumpulaisa Nnu'ngu'. 11 Nyinyonyo, mwibalangili mwawaa musambi, lakini mwabau'mi kwa Nnu'ngu' mu Kilisitu Yesu.

12 Kwa nyo, kanemwiyi'ki'ti'ye sambi itawale nkati ya yi'ga yinu yaipalikwa waa, li'nga kumpanga mugayu'we maminyikio gake. 13 Kanemupiye ili'mbi'li'mbi' ya yi'ga yinu itumike kati yombo yo panga sambi, ila mwipiye mwabene kwa Nnu'ngu' kati mwabandu mwamuyu'yilwe bu'ka mukiwo no yingya muukoto wayambi'. Muntumikiye Nnu'ngu', na ili'mbi'li'mbi' yoti ya yi'ga yinu ipange kasi kati yombo ya aki. 14 Kwa nyo, sambi yaabali na makakala kwinu mwenga, kwa mwanjaa mubileli pai' ya salya, ila pai ya ngu'ngu'.

15 Tumbwele tubaye buli? Buli, tupange sambi kwa mwanjaa tubileli pai' ya salya ila pai' ya ngu'ngu'? Lili, ata pasene! 16 Kakape mutangite panga, mana mwipiyite mwabene panga mwaabanda no palikwa yu'wa, kakape mupanga mwaabanda ba yu'lu' ywamunnyu'wa. Manaitei ubanda wa sambi, kuundi'la yake kiwo, na manaitei ubanda wa kunnyu'wa Nnu'ngu', kuundi'la yake maisa ga aki. 17 Lakini Nnu'ngu' ywakunsukulu, kwa mwanjaa pamope no panga mwaabile mwaabanda ba sambi, lelo mwendayu'wa bu'ka nkati ya myoyo kwa mayi'gano gamupokile. 18 Mubi'kilwe ulu bu'ka muubanda wa sambi, na nambi'yambi' mugalambuki muubanda wa aki. 19 Nilongela mu'lu' mwaumbilwe mundu kwa kitumbu sa ukigopi wa yi'ga yinu. Kati mu'lu' mwamwiipiyite ili'mbi'li'mbi' yinu itumike na usapu na ulau li'nga mupate panga malau, nyinyonyo nambi'yambi' mwipiye ili'mbi'li'mbi' yinu itumike na aki li'nga mupate peleteyelwa na Nnu'ngu'.

20 Pamwabile mwaabanda ba sambi, mutawalilwageli na aki. 21 Lakini mwapatike ki'li' kwa makowe go gamugabona ga oni nambi'yambi'? Kuundi'la wa makowe go, kiwo. 22 Lakini kwa mwanjaa nambi'yambi' mubi'kilwe ulu bu'ka sambi no pangilwa mwaabanda ba Nnu'ngu', pwaila yinu upeleteu wauyomokya kuukoto wangayomoka. 23 Kwa mwanjaa, liposo lya sambi kiwo, na kiya sa Nnu'ngu', ukoto wangayomoka bu'ka kwa Kilisitu Yesu Bwana witu.