1 Nilongela ukakape sika panga nilu'mbine na Kilisitu, na nilongelali ubu'su'. Zamili yangu' kailongoyelwa na Loo Mpeleteu ikong'ondelya likowe li' kai'. 2 Nitwi'li usuni na maminyo gangali yomoka mumwoyo, 3 kwa kitumbu sa bandu bangu'. Abo nga alongo bangu' ba kimundu. Niminyikia kwayangatia kwo lu'ba no pokya lasi yo baulwa na Kilisitu mana ilu'e wesa kwayangatia. 4 Abo nga Baisilaili, bandu babaasaulilwe na Nnu'ngu' babe bana bake. Aalayite utukupu wake na aapangite malagano nabo, kai' aapei salya yake, pamope na malagano gake, na aawanikiye ndi'la ya kunkilikitya. 5 Baisilaili nga lubelekwo lwa kiu'ku'lu' bitu na Kilisitu aabelekwi kimundu mulubelekwo lwo. Ywembe nga nku'lu' pi'ta boti na nga Nnu'ngu' ywalumbilwa milele! Amina.

6 Nibayali panga lilagano lya Nnu'ngu' linatimyali. Kwa mwanjaa, Baisilaili boti lili babayi'ki'tilwe na Nnu'ngu', 7 wala botili babauma mulubelekwo lwa Bulaimu panga kakape bana ba Bulaimu. Kwa mwanjaa Nnu'ngu' aannagi Bulaimu, "Kwa ndi'la ya Isaki walu'a pata lubelekwo lwalwaakemelwa lwako." 8 Mayi'gi'yo gano galombolya panga kwenda bana botili bababelekwi kimundu kwa Bulaimu nga bana ba Nnu'ngu', ila lubelekwo lwake lwalwabu'kine na lilagano lya Nnu'ngu'. 9 Lilagano lyene lyabaite, "Manisa nsimu kati wu'no naalu'a isa kai', naywembe Sara aapanga abile na mwana nnalu'me."

10 Kai' alyo baili, ila naywembe Rebeka ammeleki u'ku'lu' witu Isaki bana mapaga. 11 Mapaga bo babile balo belekwa wala panga kikowe kilau au kinogau, ila kwo laya panga Nnu'ngu' ankema mundu kati mwabini mwene, kwenda kwo bu'kana na nnyendo wa mundu li, 12 Nnu'ngu' ammakiye Rebeka panga, "Nku'mundu alu'a kuntumikia nnunawe." 13 Kati mwagabaya Maandiko Mapeleteu, "Nimpendi Yakobi, lakini Esau ninsukile."

14 Buli, tubaye Nnu'ngu' ywa aki li? Lili ata pasene! 15 Nnu'ngu' ammakiye Musa panga, "Nalu'a kummi'kya kiya yu'lu' ywanipendi kummi'kya kiya, nalu'a kunnemu yu'lu' ywanipendi kunnemu." 16 Kwa nyo Nnu'ngu' apangali makowe gake kwo u'bi'lya mwapala mundu au lyusu lya mundu, ila kwa kiya sake bai. 17 Nnu'ngu' mu Maandiko Mapeleteu ammakiye Falao panga, "Naakubi'i ube wankulungwa li'nga kugalaya makakala gangu' kwa bandu pi'tya kwako, na lina lyangu' liyu'wanike mudunia yoti." 18 Kwa nyo Nnu'ngu' ammi'kya kiya yu'lu' ywampala, na ywi'ngi' kumpanga mwene mwoyo nnonopau kati mwapala mwene.

19 Mala yi'ngi' mwanilaluya panga, "Manaitei ibile nyo, Nnu'ngu' akombwa buli kummi'kya mundu lukoolo? Nyai ywakombwa kugakana gagapendi Nnu'ngu'?" 20 Lakini wenga wamundu! Wenga wanyai ata ulowe kuntaukya Nnu'ngu'? Buli kiteleko kiwesa kunnaluya muukuli wake panga, "Mboni uniukwi nnya?" 21 Buli, muukuli ntu'pu' aki yo ukwa ili'be ya utu'pi', yi'ngi' yo kolelya kwa isima na yi'ngi' yo kolelya kila lisu'ba?

22 Amo nga mwaibile kwa Nnu'ngu'. Aapalike kwalaya bandu nyongo yake na makakala gake, lakini aakomiye balu' babamusile babaabi'kilwe wiso langamiswa. 23 Aapangite nyo li'nga aulaye utukupu wake nku'lu' kwa bandu baasawile pokya kiya sake. Aabi'kite wiso bu'ka kwai'mbu' panga kiselele muutukupu wake, 24 nga twenga twatukemilwe nakwe kwenda bu'ka kwa Ayahudi kisabe baili, ila ata bu'ka kwa bandu bangali Ayahudi. 25 Aso Nnu'ngu' nga sakibaite mukitabu sa nnondoli wake Hosea panga,

"Bandu bababile bangu'li, naalu'a kwakema bandu bangu'.

Na balu' bangali kwapenda naalu'a kwakema apendwa bangu'.

26 Palu' Nnu'ngu' paalongei kwai'mbu', ‘Mwenga mwabandu bangu'li,’

apo baakemelwa bana ba Nnu'ngu' ywai nkoti."

27 Kai' nnondoli wa Nnu'ngu' Isaya bu'kana na Isilaili aabaite panga,

"Ata ikatei Baisilaili bambone kati lwangi lwa kumbwani,

babaakosopolelwa asene bai.

28 Bwana Nnu'ngu' aalu'a kwapeya bandu boti ba dunia

mbwatyo yaitimile pangali si'ya kati mwaalongei."

29 Kati mwabaite Isaya panga,

"Manaitei Bwana mwene uweso woti akakotoka kwayi'ki'ti'ya bandu asene balame,

tupelepanga tulangamiswe muno, kati ilambo ndau ya Sodoma na Gomola."

30 Kwa nyo aga goti galombolya namani? Tubaye panga, bandu bangali Ayahudi baakasineli panga aki nnu'ngi' ya Nnu'ngu', lakini Nnu'ngu' aabalangili panga bene aki kwa kumwu'bi'lya Kilisitu. 31 Baisilaili baakasine kwikamwa salya ya Musa li'nga babalangilwe bene aki nnu'ngi' ya Nnu'ngu', lakini baakombwili. 32 Kwa mwanjaa buli bakotwike balangilwa bene aki kwa Nnu'ngu'? Kwa mwanjaa baau'bi'li yendo yabe na baamwu'bi'li lili Kilisitu. Kilisitu nga liwe li'lu' lyabaaku'bile, 33 kati mwaiandikilwe mu Maandiko Mapeleteu,

"Lola, nibi'ka liwe mu Sayuni. Liwe lyo nga li'lu' lyabaliku'bala bandu,

na mpi'mbi' wa kwatu'mbu'ya bandu.

Lakini mundu ywamwu'bi'lya ywo aaibonali oni."