Balaka ya kumwu’bi’lya Nnu’ngu'
1 Kwa nyo, kwa mwanjaa tuyomwike balangilwa aki kwa imani, tubile na amani na Nnu’ngu' kwa ndi’la ya Bwana witu Yesu Kilisitu. 2 Kwo pi’tya imani yitu, Kilisitu atuyu’gu’li nniango wo yingya mungu’ngu' ya Nnu’ngu' yatutama nambi’yambi', na tuu’pi’la kwa kitumbu sa liu’bi’lyo lyo panga kiselele muutukupu wa Nnu’ngu'. 3 Kwenda nyinyo bai lili, ila tupulaikya kai' ngu’su’mbu' kwa mwanjaa tutangite panga ngu’su’mbu' ileta ukomeyi, 4 na ukomeyi uleta aminika, no aminika ku’lu' kuleta mau’bi’lyo.