1 Hano nhyi ye ya puYelusalema, popepi noshilando Betfage naBetania, oye ya pondudu yeeholivi. Yesus okwa tuma yaali yomaalongwa yaye, 2 ndele ta ti kuyo, "Indeni komukunda mbu wuli komeho yeni. Shaa mwa fiki ko, amu ka mona okandoogi oshona ya mangwa, ina yi kayilwa nande onale komunhu. Ka mangululeyi mo, nye mu ka ete nghu. 3 Ndele ngeege opu na ngu e mu pula kutya, ‘Amu shi ningile shike?’ Mu lombweleni kutya, Omwene okwe ka pumbwa, Ye ote ka yalula viya."

4 Oya ya ko, ndele oya mona okandoogi yamangelwa pondje momweelo weumbo. Mhanga ya li ta ye ka mangululamo,

5 aanhu yamwe mba ya li ya fikama mho, oye ya pula ya ti; "Amu ningi shi hano nhyo, oshishi a mu mangululamo okandoogi?"

6 Aalongwa oya yamukula nganhyi ya lombwelwa kuYesus, ndele naanhu oye ya efa ya ye. 7 Nhyi ya eta okandoogi kuYesus, oya yala eenguwo vawo pombuda yokandoogi, Yesus okwa londa ko.

8 Aanhu oyendji oya yala eenguwo vao mondjila, mhanga yamwe ya teta oitai yoihwa momapya, ndele taye yi yala mondjila. 9 Aanhu mba yali komeho namba ya landula mo, oya ingiva taa ti, "Kalunga na hambelelwa, Omuyambekwa oye ngu te ya mevina lyOmwene! 10 Kalunga na yambeke ouhamba womukwaniilwa David mbu tawu ya! Kalunga na hambelelwe, omukombadambada!"

11 Yesus nhyi a fika muYelusalema, okwa ya motembeli, ndele ta tala ayihe, nomolwanhyi etango olya li lya toka, okwa ya naalongwa yaye omulongo nayaali kuBetania.