Rut 4

Ọbada kw’Boaz ọttạra Rut

1 Ma wọ Boaz ubin ofona k’ẹbhama ọta uninga eyạr. Okpe kw’ọkkaan-ichimma kw’obeni kk’ukwa o, Boaz oben-ẹ bẹ́, "Aye, kwu ininga eyạr ka." Ma wọ ọkkaan-ichimma nwọ ukwu uninga eyạr.

2 Boaz orengi adennạng p’ofhon ncho jobh, obẹ, "Aninga ẹyạr ma." Abẹ aninga. 3 Ukwu oben ọkkaan-ichimma nwọ bẹ́, "Naomi kw’ubin k’Moab ukwuna, n’oben bẹ́ okpe isisek s’Ẹlimẹlẹk kw’ode nwotte kwamạna. 4 Ẹgwọ nkkẹ bẹ́, nsi-ọ asonga, ọfha adebh sẹ ma ititikha s’anạng mba p’aning eyạr ma, ọttạra k’ititikha s’adennạng p’anạng paam. De ọdaakh-ọ bẹ́ abhek sẹ, abhek. De nạnárora, tekh-m, ọfha nsonga. Ukwuru bẹ́, ọnạng ọdwạkh-ọdwạk kóde kw’ọkhaam efa bẹ́ ọbhek sẹ oyongu ọma, ọ́pọhn ka, n’ode amma."

Ọkkaan-ichimma ọbhina bẹ́, "Amma m’mmek sẹ obhek."

5 Ma wọ Boaz obẹni bẹ́ "Ma iwu ch’m’adebh isisek nnọ k’mbọhk s’Naomi, ma agba adebh Rut kw’Moab kw’ode opokwa, ọfha osenga ma ọtera echo ch’ọnạng kwamạna kw’kk’upua, ọfha eche chẹ ọttạra ẹkhaama chẹ nạngẹ idimi."

6 Ma wọ ọkkaan-ichimma nwọ obeni bẹ́, "De n’ode mạnna, amma dạk mạ́mmek, ọfha dạmadạma nạngẹ uning k’ẹkhaama chaam. Amma mạ́mmekh e."

7 Ma okpe ngwọ, wa ode ọmaanadik kw’anạng p’Israẹl bẹ́, brasẹ ọnạng obhek ẹkhaama ch’ọnạng ọdwạkh-ọdwạk, ọnạng wạnọ, ọbaan bẹ́ ọwạra ofhok gwạnọ kw’mkpafhok ọnạng ọnạng nwọ kw’m’obhek ọttọhk pfẹ.

8 Ma wọ, ọkkaan-ichimma nwọ n’obeni Boaz bẹ́, "Ọma oyeni bhek isisek nnọ." Ọwạra ọkpafhok gwạnọ kwẹ ọnạng Boaz.

9 Ma wọ Boaz ọkpaakhẹ adennạng p’ofhon ọttạra anạng phyibh bẹ́, "Chemma, abạnga made nttẹnsẹ bẹ́, amma kk’ẹkhaama ch’Ẹlimẹlẹk, ọttạra ch’Kiliyọn, ọttạra ch’Malọn mmekha bẹ́, phyibh k’Naomi k’mbọhk. 10 Kk’Rut kw’ubin Moab, kw’ode opokwa kw’Malọn, mbạra ntạkha masẹ ikwanạng kwaam, ọfha osenga ma otera eche ch’ọnạng kwamạna kw’kk’upua, ọttạra ẹkhaama chẹ, ọfha eche chẹ nạngẹ idimi k’ichimma chẹ, ọttạra k’ọnwẹr pf’ofhon. Chemma, abạnga ade nttẹnsẹ o!"

11 Ma wọ adennạng mbọ ọttạra anạng phyibh p’aning k’ẹbhama aben-ẹ bẹ́, "Uwe e, amạna ande attẹnsẹ e. Tte Ọvaar Ubinọkpaabyi usi ikwanạng nwọ kw’m’ọnwa kakhọ k’ọchọhm ode masẹ Rachẹl ọttạra Lea, p’akpạr mbọhk asi efonamma ch’Israẹl ẹbạr. Tte akhaama abạrada k’Ẹphrat, tte eche chọ ebạr k’Bẹtẹlẹhẹm. 12 Tte Ọvaar Ubinọkpaabyi osenga ma iva p’ikwanạng nwọ m’ọmaan, usi efonamma chọ ẹbạr ekhera ch’Pẹrẹz kw’uwa Tamar ọmaanẹ ọnạng Juda."

Rut ọttạra Boaz atạk ayok

13 Ma wọ Boaz ọtạk Rut ode ikwanạng kwẹ. Masẹ uyim abẹ, Ọvaar Ubinọkpaabyi usi-ẹ utima ifhạr, ọmaan ujunung. 14 Ma wọ ipanạng abeni Naomi bẹ́, "Tte Ọvaar Ubinọkpaabyi ọtạkha ẹtọhnga, kw’kk’ọ ọkkaan-ichimma ọnạnga chemma! Tte nnwa nwọ uyin eche k’Israẹl ọbaabh-ọbaabha! 15 Ẹma wọ m’ofhona akpen pọ, ọbạra okker-ọ k’atạm. Ọnyẹ kw’adaakhẹ idik, kw’ọbạra ujibh ọnạng-ọ ọyọhnga ajunungva asenọfa, kk’nnwa nwọ ọmaana."

16 Ma wọ Naomi ọtạk nnwa nwọ ọdọhkha k’ntaak, ọrạkh-ẹ. 17 Ipanạng p’arukhu ma aben bẹ́, "Naomi kk’ujunungnwa ọkhaama e." Abẹ akpẹ-ẹ Ọbẹd. Ọbẹd wa n’ukwu ode otte kw’Jẹsẹ. Jẹsẹ ode otte kw’Devid.

Ab’otte p’Devid

18 Maa wọ n’ode ẹnạmma ch’Pẹrẹz:

wa Pẹrẹz ofhonu Hẹzrọn,

19 Hẹzrọn ofhon Ram,

Ram ofon Aminadab,

20 Aminadab ofon Nashọn,

Nashọn ofon Salmọn,

21 Salmọn ofon Boaz,

Boaz ofon Ọbẹd,

22 Ọbẹd ofon Jẹsẹ,

Jẹsẹ n’ukwu ode otte kw’Devid.